Aayubu 11 - KITAABA WAAQA

¹ Jennaani Sofariini, ka gosa Naamathi, waan jed'eeni:

² Nami tokoleeni ka dubbi hagana geetu tana si jalaa qabu injiru? Nami akana dubbi d'eeresu kunini d'uga inargata?

³ Mala keeti, waan dubbini tante, ta woma keesa injirre sunini, nu ch'allisiftu seeta? Yo atini nama goyeesite waan si ch'eersani inseetu?

⁴ Atini waan Waaqaani jettu, D'ugefachaani tiyya aabo inqabdu, ammalle anini si durati qulqullo.

⁵ Ato Waaqi siini dubbate anini akami gammada!

⁶ Inni aka qaroomi aka heddu jiru si barsiisa; waan nami dandae inhubanne ka d'ossaati jira. Hubad'u, gaargali kanke kunini haga sila sii male ingahu.

⁷ Waan Waaqa ka d'ossani, dandeete keesa imbeeta? Atini dandeete guddinnaafi jabeenna Waaqaa muumme inhubata?

⁸ Wonti sunini muumme inqabdu, gubbale ira olfago. Atini maani dandeete taata re? Ammo Waaqi fulla ekheraa imbeekha, ammo atini imbeetu.

⁹ Guddinni Waaqaa lafa ira ballaa baariile ira d'eera.

¹⁰ Yo Waaqi si qabe si hid'e gaadisa koraati si geese eenuti jalaa si baasa?

¹¹ Inni nama seseega woma keesa injirre imbeekha; inni huji worraa hamtu ch'ufa inarga.

¹² Yo harreeni diidaa matat'e worrati galtu, daalleeni wo hubati.

¹³ Garaa toli, harka kanke Waaqati olqabad'i.

¹⁴ Ch'ubbu keesa jirtu ufi ira fageesi, waan hamtu mana kanke keesaa baasi.

¹⁵ Duuba ch'eera male biyya dura ejite, soda male garaa jabaate biyya keesa deemta.

¹⁶ Duuba gaargala kanke ch'ufa, yo suni deete, aka lola fooqateti heredda.

¹⁷ Jireenni kanke adu guyya gudda ira ifse, dukantileeni barii siti fakaati.

¹⁸ Waan atini abdi guddo qabdufi, soda male nagayaani teeta. Waaqi si qorqorate hafuura sii baasa.

¹⁹ Bultiini tante soda womatu inqabdu, nami hedduleeni qarqaarsa si kad'ata.

²⁰ Ammo worri ch'ubbu qabu ufi jibbaate, ufi d'aatu mimilate, kara bahuuni d'aba, wonti worri abdatu duuma.