1 Samueli 9 - KITAABA WAAQA

¹ Namicha dureesa tokoti jira, ka Kishi jed'ani, ka gosa Benjamini, ka guddo gurra qabu; inni ilma Abieli, ka ilma Zerori, ka ilma Bekorathi, ka ilma Afia.

² Inni ilma toko ka kaima, ka maqaani isaa Saulo, ka ammalle guddo mid'aaga qaba, Sauloni nama guddo d'eeratu nami Israeli keesa jiru ch'ufti ka gurmu isaa dabru injiru. Ammalle nama lafa suni keesa jiru ch'ufa inni ira mid'aaga.

³ Duuba gaafa toko harreeleni toko ta Kishi badde jennaani inni waan Sauloni jed'e, Worra hojatu kana toko fud'ad'i, harreele tana barbaaduu d'aqi.

⁴ Worri lafa gaareeni Efraimutifi ta d'aatu Shalisha ch'ufa barabaade woma d'abe; jennaani arda Shalimule d'aqe, ammo achile d'abe duuba lafa Benjaminile barbaada d'aqani achile d'abani.

⁵ Arda Sufu geennaani Sauloni waan hojattu isaatini jed'e, Nu galchi, hegeri aabbooni harre ded'e yoona waan keenna yaadu jirafa.

⁶ Namichi hojattu kaani waan jed'eeni, Eegi, dira kana keesa nama Waaqa tokoti, ka nami guddo d'ugeefatu ka dubbini isaa ch'ufti d'ugooftu jira gara isaa nu yaasi, hegeri inni dandae fulla harreeni tunini jirtu nuti hima.

⁷ Sauloni waan jed'eeni, Yo gara isaa yaane maani dandeenne kenninafi? Sagaleeni tokoleeni subba keenna keesati inhamne waan isaa kenninu woqamna?

⁸ Namichi hojatu kaani waan jed'eeni, Qarsi diqo toko qaba, sunuma namicha Waaqa suni kenna, duuba inni gara harreeni jirtu nuti hima.

^9-11 Sauloni, dansa, nu yaasi jed'eeni, Jennaani dira namichi Waaqa kaani keesa tau d'aqani, ato worri gaara kore dirati oliyau dubra bisaani worabachu yaatuuni fuula keesa wold'ufani. Jaarsi wo himu kaani dira kana jira? Jed'ani dubra suni gaafatani. (Gaafasi Israeli keesa raagani, nama wo himu jed'aniini, Tanaafi hojja nami Waaqa wo gafaachu fed'u, nami sunini waan jed'u, gara nama wohimu nu yaasa jed'a.)

^12-13 Dubarti waan worraani jette, Ee, inni armuma jira, kuno, diquma isani dura deema, yo arifatani ind'aqabdani, akuma dira seentanini gartani, wonti inni arra dira d'ufeefi waan biyyiti fulla sorio iti qalani ta gaara gubbati sorio qalu feetufi. Worri sorioti yaamani haga inni d'ufuti woma inyaatu, wonti akanatiifi inni qara sorio suni eebisuu male. Yo huriftani yaatani, ato inni gaara kore fooni sorio inyaanne d'aqabdani.

¹⁴ Duuba Saulofi namichi hojatu isaa kaani dirati iti d'aabatani; ato dira seenu jiranu Samueli ka fulla eebati deemu fuula keesa wold'ufani.

¹⁵ Aka kaleeti qara AABBO Waaqi waan Samuelini jed'e,

¹⁶ Bori hojja tana anini nama gosa Benjamini siti erga; Duuba atini isaa muudi, hayyu worra kiyya ka Israeli tolchi, isati worra kiyya harka worra Filisti keesaa baasa. Anini yayu gaargala worra kiyya arge boha worrale d'agaye.

¹⁷ Samuelini Saulo arginaani AABBO Waaqi waan jed'eeni, Nami anini baanu kaani kuno kana, isati worra kiyya fida.

¹⁸ Jennaani Sauloni gara Samueli ka fulla fullo eju, d'aqe waan jed'eeni, Jaarsi wo himu kaani eesati gala?

¹⁹ Samuelini waan jed'eeni, Inninu anuma, beeni fulla eeba d'aqi anini faana si d'ufa. Isani lachu arra sagale na woliini nyaachu maltani. Bori diirama anini waan isani nagafatani ch'ufa isaniti hime gadi isani d'iisa.

²⁰ Waan harre haga bade sadi bulte iyyaadina, isiini yayu mullate. Ammo nami worri Israeli guddo barbaadu eenu? Siiniti? Siifi worra abba keeti.

²¹ Sauloni waan jed'eeni, Anini gosa Benjaminiti, gosa Israeli ch'ufa ira diqo; ammalle gosa teenna suni keesale balbalti teenna balbala ch'ufa ira diqo. Atini maanifi dubbi aka tana nani jette re?

²² Jennaani Samuelini Saulofi hojatu isatini d'ufe, mana gudda olnaqe, mesa fulla keessumaani nami sodoma tatu tetesise fulla ulfinna.

²³ Samuelini waan nama fooni d'aabuuni jed'e, Fooni anini, koba kayi sini jed'e kaaniini kooti.

²⁴ Jennaani namichi fooni d'aabu kaani fooni miila dansaani d'ufe Saulo dura kaye. Samuelini waan jed'eeni, Fooni olsikayani kana nyaad'i. Anini fooni kana sifi olkaye, aka atini hojja tana nama anini yaame kana woliini nyaatu. Duuba guyya suni Saulofi Samuelini sagale woliini nyaatani.

²⁵ Worri fulla eeba suni kae dirati gabue jennaani, Saulo sire mana gubbati mid'aasanifi,

²⁶ inni achi rafe. Lafti bariite jennaani Samuelini Saulo ka mana gubba jiru yaame waan jed'eeni, Kai, si galcha. Sauloni kae, isaafi Samuelini dirati gabuani.

Aka Samuelini Saulo muude

²⁷ Worri moga dira gahe jennaani Samuelini waan Sauloni jed'e, Namicha hojattu keeti kanaani, Nu dura dabri jed'i. Namichi dabre jennaani Samuelini waan Sauloni jed'e, Diqo miila d'aabad'u, waan Waaqi jed'e siti hima.