1 Samueli 27 - KITAABA WAAQA

¹ Daudini waan ufiini jed'e, Guyya toko anini harkuma Saulotini dua, wonti dansaani anini tahu male aka lafa Filistiti baqad'u. Yo akasi tahe, Sauloni barbaada lafa Israeli keesa na barbaadu kana lakise, anini harka isaa nagayaani jalaa baha.

² Jennaani Daudifi jari isaa ka d'ibba jaa hojuma suni kaani, Akishi ilma Maoki, ka hayyu Gathiti dabrani.

³ Achi Daudifi jari isaa kaani worra ufi woliini qubatani. Daudini nad'eeni isaa lachu woliini jira, Ahimaamu ta Yezreeli d'ufteefi Abigaili ta Nabalini iraa due, ta Karmelii baate.

⁴ Sauloni aka Daudini Gathiti baqate d'agaye jennaani barbaadu lakise.

⁵ Daudini waan Akishini jed'e, Hojja atini jaala kiyya taate, dira diqa toko naa kenni aka anini keesa tau; wonti dira gudda kana keesa anini si woliini taufi injirtu, aabbo.

⁶ Jennaani Akishini dira Ziklagi isaa kenne, tanaafi Ziklagini arti asi dira hayyoota Yudaa taate.

⁷ Daudini addeesafi dukana kud'ani jaa lafa Filisti keesa tae.

⁸ Bara suni Daudifi jari isaa worra Gesharitifi ka Girisitifi ka Amaleki, ka haguma duriti lafa suni keesa tau, d'aqani had'ani. Innii lafa worraa haga Shuri fuud'e Misiriti d'aabe had'e,

⁹ d'iirafi nad'eeni worrale fit'e, ree, looni, harree, gaalafi woyale ch'ufa boojie. Duuba inni gara Akishi deebinaani

¹⁰ Akishini Atini lafa tami baate galte? jed'e gaafate. Duuba Daudini waan jed'uuni, Anini bita lafa Yuda d'aqe yokhaani lafa worra Yerameeli yokhaani lafa worra Keni d'aqe jed'aani.

¹¹ Daudini nama ch'ufa fit'e, d'iirafi nad'eenile, aka nami tokoleeni dira Gathi d'aqe waan isaafi jari isaa tolche namuti inhimne. Daudini haga lafa Filisti keesa tae ch'ufa akasuma tolche.

¹² Ammo Akishini guddo Daudi d'ugeefate waan ufiini jed'e, Gochiti isaa yayu isa jibbite, tanaafi inni haga jiru ch'ufa naa hojata.