1 Samueli 20 - KITAABA WAAQA

¹ Jennaani Daudini dira Nayothi ka arda Rama keesa jiru kaye, baqate Yonathanini bahe, waan jed'eeni, Anini maani yake? Wollaali kiyya maani? Wonti hamtuni anini abba kanke tolche, ka inni na ijeesu fed'ufi, maani?

² Yonathanini waan jed'eeni, Waaqi duu si didinna! Abbaani kiyya waan tokole ato isiini diqo taate guddo taate ka nati inhimini intolchu. Tanaafi tante tanale na ind'ossu, dubbini sunini injirtu, d'ara!

³ Ammo Daudini waan jed'eeni, Abbe imbeekha aka atini na jaalatu, tanaafi inni waan na tolchu fed'u kana siti himu dide, aka atini hameenna iraa ingarre. Anini maqa AABBO Waaqa jirutini kakhad'a, aka dooti diqole fago nara injirre!

⁴ Yonathanini waan jed'eeni, Waan atini feetu ch'ufa anini sii tolcha.

⁵ Daudini waan jed'eeni, Bori guyya jila baatiti, anini hayyu woliini sagale soorachu male. Naa eebisi, anini deeme oobru keesati d'okhad'a, haga galgali iftaani gahuti.

⁶ Yo abbe na d'abe aka anini worra keenna ka Bethlehemu d'aqe sorio woga d'aqabad'u, jennaani atini na gad'ifte, iti himi.

⁷ Yo inni haye ha deemuti jed'e, anini ya bahe; ammo yo inni dallane, aka inni na balleesu fed'u sunini beeta.

⁸ Ammo atini gama kanketini naa nahi kakhu jabdu nu AABBO Waaqa durati wolti kakhanne jabeesi guuti. Ammo yo anini wollaala qabaad'e atumaani na ijeesi; maanifi abbeetiti na geesita?

⁹ Yonathanini waan jed'eeni, Laki, abbo akasi injed'ini! Yo d'uguma anini aka aabbooni siballeese beekhe ani siti inhimu?

¹⁰ Jennaani Daudini waan jed'eeni, Yo abbe dallansuuni si jalaa dubbate eenuti nati hima?

¹¹ Jennaani Yonathanini waan jed'eeni, Kooti, gara oobru nu yaasi. Jennaani worri woliini yae,

¹² Yonathanini waan Daudini jed'e, AABBO Waaqi Israeli d'uga nu tahinna! Borifi iftaani hojja tana anini abba kiyya dubbi taani iti hima. Yo anini aka garaani isaa siti dansa arge, qonqo si erga.

¹³ Yo ammo garaani isaa siti hamaa arge, AABBO Waaqi na ijeesinna yo anini si d'osse lubbu tante imbaasini. AABBO Waaqi si woliini jiraatinna, akuma inni abba kiyya woliini jiraate!

¹⁴ Haga anini jiru kakhu atini kakhate jabeesi naa nahi; ammo yo anini due;

¹⁵ naasu na agarsiifte worra kiyyale garsiisi. Ammalle eegi AABBO Waaqi nyaapa keenna ch'ufa balleese,

¹⁶ kakhuuni nu wolti kakhanne ha akuma ufi jiraatu. Hojja kakhuuni sunini ch'abde AABBO Waaqi gaargalani siti d'ufa.

¹⁷ Ammalle Yonathanini aka haguma jiru ch'ufa Daudini isa jaalatu isa kakhachise, wonti akanatiifi Yonathanini akuma ufi jaalatu Daudi jaalata.

¹⁸ Jennaani Yonathanini waan Daudini jed'e, Jilti baati bori yo fulla sagaleti si d'abani imbeekhani aka atini arti injirre.

¹⁹ Iftaani d'abisi kanke haga kalele ira mullata; tanaafi fulla atini qara iti d'okhate taani d'aqi, d'akhaye wolti tuulani duubati d'okhad'i.

²⁰ Anini duuba t'iya sadiini had'a, aka waan abbiru.

²¹ Duuba anini gurba toko erge, beeni, t'iya suni gaguuri jed'aani, Hojja anini ilaali, t'iyiti moga tante tana jirti, guuri, isaani jed'e, lafti nagaya, gabahi jechu. Anini maqa AABBO Waaqa jirutini kakhad'a, wonti atini sodaatu injirtu.

²² Ammo yo anini t'iyiti moga tante suni jirti jed'eeni, Kai deemi, AABBO Waaqi ya si deemsise.

²³ Ammalle kakhu nu wolti kakhanne taani qabad'i, AABBO Waaqi d'uga teenna, naafi si jiddu.

²⁴ Duuba Daudini oobru keesati d'okhate, jilti baati geennaani hayyichi Sauloni mana sagale iti nyaatani d'ufe,

²⁵ fulluma isaa ta duri taani manati aane tae. Abinerini d'aatu isaa tae Yonathanileeni isa dura tae. Fullaani sila Daudini tau duwa,

²⁶ ammo Sauloni guyya suni woma injenne; Wonti akanatiifi inni waan Daudini wo tahe akasiini qulqullooma d'abe jila hanqate sehe.

²⁷ Boriyyaatele, guyya addeesa lama, fullaani Daudini tau akuma kaani duwa. Duuba Sauloni Yonathanini, Daudini arafi kalele maanifi sagale jila nyaachu ind'ufini? jed'e gaafate.

²⁸ Yonathanini waan jed'eeni, Inni, anini Bethlehemu deemu fed'a

²⁹ na gad'iisi jed'e na kad'ate. Ammalle waan naani jed'e, Wonti anini deemu maleefi, worri keenna arra sorio woga qalata, oboleesi kiyyaleni yayu si ind'abini jed'e qonqo nati erge, tanaafi yo atini jaala kiyya taate na gad'iisi aka anini fit'a tiyya argu d'aqu nani jed'e. Wonti inni fulla sagale ind'ufinifi tana.

³⁰ Sauloni aka hama Yonathaniti dallane waan jed'eeni, Ilma ch'abana! Anini imbeekha aka atini Daudi gula baate ufifi, haad'a si d'altele ch'eersitu!

³¹ Atini ingartu, aka atini hayyu lafa tanati intaane, haga Daudini jiru? Amma beeni deemi, isa gafuud'i inni duu male!

³² Yonathani waan jed'eeni, Inni maanifi duu male? Maani yake?

³³ Inni akasi jed'e jennaani Sauloni isa ijeesu fed'e woraanani had'e. Duuba Yonathanini aka abbaani isaa d'uguma Daudi ijeesu fed'u hubate.

³⁴ Yonathanini aka hama dallane, sagale biraa kae guyya addeesa lama suni agabu ole, inni waan Sauloni akana Daudi ch'eerseefi guddo iraa laalefate.

³⁵ Boriyyaate Yonathanini kae oobru d'aqe, aka Daudi argu, dubbi qara wolti qabatani taani gula. Gurba diqa toko ufi gulaani deeme

³⁶ waan jed'eeni, Utali, t'iya anini darbu gadi na fuud'i. Gurbaani utaale, Yonathanini t'iya darbate isa bira dabarse buuse.

³⁷ Gurbaani fulla t'iyiti iti lafa d'oofte gahe jennaani Yonathanini iti lalabe waan jed'eeni, T'iyiti artini dura injirtu?

³⁸ Arti ini ejini, durati utali barbaadi! Gurbaani t'iya fuud'e gara abba ufi deebie,

³⁹ ka dubbi suni tokole inhubatini; dubbi suni Yonathanifi Daudi ch'allati beekha.

⁴⁰ Yonathanini miha isa gurbati kenne, dirati naa geesi jed'eeni.

⁴¹ Eegi gurbaani deeme, Daudini d'akhaye duubati d'okhate taani duubaa gabahe jilbifafate maro sadi mataani lafati gajed'e. Isaafi Yonathanini wold'ungatani bobohani, ammo Daudini isa ira bohe.

⁴² Jennaani Yonathanini waan Daudini jed'e. Nagayaani deemi, nu yayu maqa AABBO Waaqatini wolti kakhanne aka woljaalanu. Kakhu suni AABBO Waaqi jiddu tiyyafi tanteetifi ta d'aloota kiyyatiifi ka kanketile nuu d'uga. Jennaani Daudini kae deeme, Yonathanileeni gara dira deebie.