1 Samueli 19 - KITAABA WAAQA

¹ Sauloni ilma isa Yonathanifi hojattu isa ch'ufa wolti yaame waan jed'e, Anini Daudi ijeesu fed'a. Ammo Yonathanini guddo Daudi jaalata,

² tanaafi waan Daudini jed'e, Aabbooni si ijeesu fed'a bori diirama ufi eegad'i, fulla tokoti d'okhad'i, achuma tai.

³ Anini deeme fulla atini iti d'okhatu suni aabbo bira eje waan kanke iti haasaa. Yo anini wo d'agaye siti hima.

⁴ Yonathanini dansuma Daudi Sauloti haasae waan jed'eeni, AABBO, hojattu tante Daudi waan hamtu intolchini, wonti inni tolche ch'ufti guddo si qarqaarte.

⁵ Inni lubbu ufi ded'e Goliathi ijeese, akasiini duuba AABBO Waaqi worra Israeli harka nyaapa keesaa baase dabsachiise. Atinileeni waan suni agarte jennaani gammadde. Atini maanifi amma nama woma iyyakini iti ch'ubbamte fayyuma tana Daudi ijeesu feeta?

⁶ Sauloni dubbi Yonathani ch'aqase, maqa AABBO Waaqatini kakhate, Daudi inijeesu jed'e.

⁷ Jennaani Yonathanini Daudi yaame dubbi suni ch'ufa iti hime; duuba isa Saulo duraani d'ufe. Daudileni akuma duri kaani Saulo hojate.

⁸ Ammalle woraani worra Israelitiifi ka Filisti kaani kae. Daudini worra had'e aka d'uga dabsate baqachise.

⁹ Guyya toko ato Sauloni mana isa keesa tau, ka inni woraana harkaa qabu, ato Daudini tae kiraari d'au jinnini AABBO Waaqi erge taani isa ira buute,

¹⁰ Sauloni Daudi woraanani had'e manati mat'ansu fed'e, ammo Daudini duraa miliqe woraani sunini mana woraane keesati hafe. Duuba Daudini halkanuma suni kae baqate.

¹¹ Jennaani Sauloni nama mana Daudi eegu erge, aka boriyyaate isa ijeesu, ammo niitiini isaa Mikalini waan jetteeni yo atini halkani kana imbaqatini bori indoota.

¹² Duuba isiini deresha manatini gabuufte, inni kae baqate.

¹³ Jennaani isiini waan harkani mid'aasani ka kad'atani fuute, sire gubba keete, boraati rifeensa reetini mid'aasani mata jala keete woya iti uyifte.

¹⁴ Worri Sauloni erge kaani Daudi qabu d'ufe jennaani Mikalini, inni fayyaniti jetteeni.

¹⁵ Ammo Sauloni worra keesa deebise waan jed'eeni, Isani iluma teesaniini isa arga, sire isaa woliini baad'a, kootaani inijeesa.

¹⁶ Worri d'ufe mana olseene waan boch'ani kad'atani kaani ka boraati rifeensa reetini mid'aasani mata saabate ch'iisu sire irati arge.

¹⁷ Sauloni waan Mikalini jed'e, Atini maanifi akana na sobde nyaapa kiyya baqachifte. Isiini waan jetteeni, isati, yo atini na gad'iisu baate si ijeesa nani jed'e, jette.

¹⁸ Daudini baqate Samueli ka Rama jiruni bahe, waan Sauloni isa tolche ch'ufa iti haasae. Jennaani isaafi Samuelini Nayothi d'aqani achi taani.

¹⁹ Sauloni aka Daudini Nayothi ka arda Rama keesa jiru iti himani

²⁰ jennaani inni nama isa qabu iti erge. Worri raagoota ta lalabde sirbuti jirtu ka Samuelini gudda worra arge. Jennaani lubbuuni AABBO Waaqa jara Saulo ira buute worrileeni lalabe sirbe.

²¹ Sauloni akasi d'agaye jennaani nama d'ibile erge, worri sunileeni akasuma lalabe sirbe. Inni maro sadeesole nama erge worri suleeni akasuma tahe.

²² Duuba eege innileeni kae deeme, Ramati iti d'aabate. Eela gudda toko ka Deku jed'ani geennaani Samuelifi Daudi odeefate, jennaani Nayothi jira jed'aniini,

²³ Ato inni achi deemu lubbuuni Waaqa isale ira buute, inni kara Nayothi lalabe sirbaa iti d'aabate.

²⁴ Inni woya ch'ufa ufi ira yaase, Samueli durati sirbe, guyya sunifi halkani suni qulla qunquma ch'iise. (Akanaani jechi, Sauloleeni ya raaga tahe jed'ani ga bahe.)