YOORA 3 - Boy Lonana

Yoora u tin huuna

¹ Anni sa wara ma wihawra, nam poŋon u yaamba cocoo.

² Anni sa nam vama tuɗum duk ndufunda, ka tuɗum hu li ma kiɗikŋaɗi.

³ Gasi kan anu nam tin um dum kom goɗoɓoŋga kan hu buuna halaŋ.

⁴ Nam komon tliwin ki u bakanu, nam toon sokon ki lay.

⁵ Nam ŋguyun yan ki u dlara ci suuna u wihawra.

⁶ Duk ndufunda nam hinin an kakira ko ndal suu miɗina duk njeŋgera hu li ma ay jewna na.

⁷ Nam gan gulumunna kanu kay an kal kiɗi. Nam mbuɗun gali ma senna nekka.

⁸ An tii coco lay, yi kolo ana suuna mbay njununu lay, nam bulumun cen manda kiyo.

⁹ Nam gi gulumunna ki kay voɗ manda u gogoyra ceɗira. Nam ɓeŋen voɗta ki fokonu.

¹⁰ Nam kanni ko ndal bosogoona dleɓ kaŋgara na, ko ndal dlona dleɓ kaŋgara na.

¹¹ Nam viɗin voɗta ki irinu. Nam hinin an da wa, u voɗta ka irinɗi.

¹² Nam tli gu mbuuru mamba komu. Nam hin tinin vun mbuurura kan ko mbuu ma nam duurumma na.

¹³ Nam selen tlesuu ay hu kul mbuuru mambana hurun halaŋ.

¹⁴ Gola an mbuɗ ki va sanda fok su mansina halaŋ, san un hu buuna tew tew.

¹⁵ Nam murɗun ki u dla cora, nam gurɗun ki u boy ma dira.

¹⁶ Nam ɦeɓen an muɗ jeremma u siinu. Nam toson ki kaŋga duk buɗna.

¹⁷ Aŋ dikin ki day eg li ma heɓma an maa jivira ki wa.

¹⁸ An hin di ana an daɓmi na ga ka tuɗ fok olo u tin huu ma col ay fok Yawenaɗi.

¹⁹ Humuŋ gaŋ ay kay zolo manna u talal manda guruɗta u cira ci suuna.

²⁰ Humun ka ganu, humun ka ganu, an vi tan kaŋga u dlara ni anu.

²¹ Gola humun hin gijaŋ gan kay dlara an saa gin kaɗta.

²² Jivira vi Yawe ka daɓ kiɗi, ni ana li umba ka daɓbi.

²³ Maɗii tew tew ni ndaɗ wiliya. Ɗegee maŋga ŋgol cocoo.

²⁴ An joɓ tan ana va konna ni Yawe. Ni kay ndaɗta an hin tin hurunni kamu.

²⁵ Yawe jivi kay sa juɓumma kay sa ka halamma.

²⁶ Ni jivi a tin huruŋ seŋi selewen kay suɗta vi Yawera.

²⁷ Ni jivi kay sana a tli mbalna kelem u goo tamba.

²⁸ Nam ndak kak ki keŋ na en hu li ma Yawe min ana nam tlamuna.

²⁹ Tin vunuŋŋi kaŋga duk ndaŋgara, kala tin huuna ka huwa.

³⁰ Tin kiriŋiŋ maŋ sa a camma, ko ŋgulla su ki kaŋu.

³¹ Kay ana Bu Suuna ka hin noy sana ki a fafaɗtaɗi.

³² Lini nam li dla cora lay ni, hurum oyra u oora u jivi mamba ŋgolla.

³³ Nam mbuɗ suu warna ki zolona lay, lasi dla cora egesi lay ni ka u huu ma jivinaɗi.

³⁴ Hu li ma asi tay suu daŋgay suu hu mbassana ki kaŋgana.

³⁵ Hu li ma asi ɓeŋ dlara jivira vi sanara ki fok ma kolo dayna.

³⁶ Hu li ma asi li dla cora eg sana hu li ma kaam ɓak mamma ni Bu Suuna ka wiɗi su?

³⁷ Sa ɓak wa ni dla ndaɗta li na gawna ni gege? Bu Suuna ka gaɗaygi ni nambi su?

³⁸ Ay fun ma Kolo Dayna dla cora u jivira kal ay ki ni naɗi su?

³⁹ Va sa war ma iirina hin yoo tam kam coli kolo a ɓak kay dlaamba cora na ni mege?

⁴⁰ Miniygi voɗ maygira kiyo, miniygi taygi hoŋoygi eg Yawe.

⁴¹ Yowoygi koygi koloo, pereɗeygi eg Lo ma kolo huulonana.

⁴² Ami mbuɗ tami ki babalira u aŋu. Ami gaŋ vunuŋ kiyo. Aŋ may ni ka wi hahaw saɗi.

⁴³ Aŋ huruŋ mbuɗ ay yara wa ni aŋ lasamiya. Aŋ cimimi ki ka saa kamiɗi.

⁴⁴ Aŋ mbuɗ yara ay kolo duk ɗugulla wa ni cenda ka tew egeŋ oloɗi.

⁴⁵ Aŋ mbuɗumi ki ko sotna na, ko va noyom ki duk suunana na.

⁴⁶ Suu babali mamisina halaŋ mal vunusi ki kamiya.

⁴⁷ Dlara ndaana faygi wa, ni dla cora a caygi kira.

⁴⁸ An tii u simina ni kay suu man suu jivina asi casi ki wa.

⁴⁹ An tii u simina irin ka soɗi ni kay ana sa dew lay ni suɗ ka kiɗi.

⁵⁰ Ta ta Yawe ay kolo huulona humum gam ay kami wami aya.

⁵¹ Irin mbuɗ lan coco ko golla an gol dlara li eg gorɓii suu hu ɦoŋzi manna halaŋ halaŋga.

⁵² Asi dikinu, asi dikin un ko ndal layra na. Suu babali mansina bay dla kanu.

⁵³ Asi viɗin iiri manda ki kaŋga hu zulla. Asi duurun gogoyra kaŋga kanu.

⁵⁴ Mbona sulul ki kolo kay yanu. An di ana an viɗ ki wa.

⁵⁵ An yaŋ seŋ ay kaŋga hu zulla, Yawe.

⁵⁶ Aŋ humun delen ana, Tin koŋ eg humun hu li ma an ka musuk helef helefnaɗi, hu li ma an yi kolo ana mbay njununaɗi.

⁵⁷ Aŋ ɦuɗ taŋ ay hu buu ma an yaŋŋa di ana, Li ndaanaɗi.

⁵⁸ Aŋ doo kanu, Bu Suuna, aŋ kaɓak ma suɗun iiri manda ni aŋu. Aŋ gusun iiri manda ay wa olo.

⁵⁹ Aŋ golla, Yawe, ko asi lan dla cora egen na ni, aŋ gan ii dlaanda u ɗegee manda.

⁶⁰ Aŋ wasi sa sugul masina ki halaŋ. Dla cora asi landa egenda halaŋ halaŋ.

⁶¹ Aŋ hum ŋgulla asi ŋgulunda, Yawe, dla cora asi landa egenda halaŋ halaŋ.

⁶² Vun suu lan dla cora egenna u gurnira asi gurni unda daɓ buuna ki u ndaɗta.

⁶³ Lini asi ki kaŋga kaki lay, lini asi ki kolo coli lay ni aŋ golosiya. Anni sa asi panamma.

⁶⁴ Aŋ hin hoŋosi dla cora asi laɗta kasiya, Yawe.

⁶⁵ Aŋ hin puluɗusi kiyo, aŋ hin gasi vunna.

⁶⁶ U huruŋ ma ɓeŋina aŋ hin lasasiya, hin daɓasi cira ki kay ndaŋgara vi Yawera.