VUN ŊGOLNA 31 - Boy Lonana

VUN ŊGOL LEMUWELNANA Vun ŋgol ma vi mulna Lemuwelna

¹ Boyna vi mulna Lemuwel, haɗta sum haɗamba kara.

² Ҥa haa, goonna, goon ma hurunna, ɦa haa goon ma an fam u suu tarana.

³ Ba saɓak maŋŋa u bege maŋga ki kay dlara vi boyoginaraɗi. Daɓ buu maŋ ma kay ndaŋgarana ko boyogi suu ci mulina kinaɗi.

⁴ Mul manna, Lemuwel, sum veŋŋa ni ka va ma vi mulɗi, ergena ni ka va ma ci muliɗi.

⁵ Kay hu li ma asi cam wa ni, humusi maa ki kay gaɗta gaw. Ka li ɓak ma vi suu gorina jivi oloɗi.

⁶ Sum ergena ɦammi maŋ sa ma ka las a ba kina. Veŋŋa cami suu ka laki hu yoorana.

⁷ Nam camu, maa hahaw mamba kiyo. Ka saa kay las mamba oloɗi.

⁸ Aŋ ɓak kay sem suu vunusi ki ndumuna, kay asi ni sa ma njunusi kaɗi.

⁹ Aŋ mba ka ii ɓakŋa ni u ɗegeera. Kay suu hoŋ yasi gana u suu hawra.

CARA JIVIRA Cara seɗ tii ki ɦayra

¹⁰ Cara gasi vi malaɗnara sana faɗ ni gege? Ndaɗ ni jivi su heɗewra halaŋ.

¹¹ Njufuɗ ɦal hurum ki maɗ halaŋ. Fiim ma vo hu ziimma um ka doɗi lay.

¹² Ndaɗ li sunda halaŋŋi kay jivi mamba vora. Ka kay a mbaa dlara yoo ay voɗi. Hu iiri maɗta halaŋŋi ko ndaɗta na.

¹³ Ndaɗ hal gi baraw dlemba u baraw cili u tlimiɗ timigiina ay voo, li sun maɗta ni u furira.

¹⁴ Ndaɗ ni ko lum kawi ma suuna li paara u namma na. Ndaɗ mbaa tlesuu tira vo ni col ay ni na day.

¹⁵ Ndaɗ col ki kolo ni ŋgarpii a li tina fun suu maɗsinara. Di gaɗta jivira maŋ boyogi maɗ suu li sunda fokoɗna.

¹⁶ Ndaɗ saa kay sene ma jivina, gusumu, u sun maɗta ndaɗ laɗ u bik koɗta ndaɗ pi gu gugutluna.

¹⁷ Ndaɗ njun baraw dam maɗta li saɓakŋa ki huruɗu. Ndaɗ so uɗ ki hu sun maɗta cocoo.

¹⁸ Ndaɗ wi ki ana va ma ndaɗ hin famma ni jivi ɦay. Pindil maɗta ka tew ki njeŋgeɗi lay.

¹⁹ Ndaɗ vi barawra koɗ may, koɗ ma hiniŋŋa ha ni kay mbuurra a paara gaw may.

²⁰ Ndaɗ mal koɗ ki maŋ suu wi hawra, maɗ koɗ maŋ suu hawra may.

²¹ Ndaɗ ka ŋgay ndaa til semeɗnaɗi lay, kay suu maɗsina halaŋ u baraw ma semeɗna tasiya.

²² Ndaɗ cil borgo maɗna ni u taɗta, baraw maɗna cili ni u baraw dlemba dereŋga, u baraw ma tlawna.

²³ Njufuɗ tuɗ duk suuna hu tokka vi suu ŋgolona ni suuna ŋgaam cocoo. Nam kakŋi duk suu ŋgolo suu hu li nammana.

²⁴ Ndaɗ cil baraw ma gussa lay, cil gandina maŋ suu li paara lay.

²⁵ Saɓakŋa u bibiŋilla cuki kaɗu. Ndaɗ saa dlara fokka ha ni u sanda ɦawaa.

²⁶ Ndaɗ di dlara halaŋŋi u yalna, vunuɗ haɗ ni haɗta jivira.

²⁷ Ndaɗ ka gol dlara li hu ziiɗta tew tew. Ndaɗ ka ti ni fu ma zolombaɗi.

²⁸ Goroyoɗ halaŋ laɗ uɗ coco ana, sura jivi ɦayra. Njufuɗ ŋgaaɗ coco ɦay lay.

²⁹ «Boyogi suu li jivina ka vasi may. ndak su ki kasi bel bel.»

³⁰ Oora mbaɗ iira ɦawara kaa, jivna ni dla ka huɗi. Cara li ndaa Yawera ni cara suuna hin ŋgaaɗ cocora.

³¹ Ca ndaɗta sunda ndaɗ laɗta fiiɗna halaŋŋi maɗ daŋ may. Sun maɗta tiiriɗ seɗ ha ki ni ndaɗu.