SUU KAƁAKŊA 9 - Boy Lonana

Abimelek kak mulna hu Sekem

¹ Abimelek goŋ Yerubaalna tuɗ Sekem kay mbas sumu, ɓak ndusuyum halaŋ ana,

² «Tuɗ dagi ha ki maŋ maliyaŋ mbassa Sekemba halaŋ. Irigi a jivira ni taarage? Agi min a goryoŋ Yerubaal suu dok-kiɗisiyana halaŋ kak mulla kagi ni asi su? Ɗowba sa ma dewna ti mulla kagi ni nam su? Agi wi ana anni tliwigiya.»

³ Ndusuyum suu vi summa tuɗ cuɗ boy ma Abimelek dasina namma ki maŋ maliyaŋ mbassa Sekemba halaŋ. Hurusi tok ki u Abimelekŋi na gaw. Asi ɓak duk tasi ana, «Nammi wayaygina.»

⁴ Asi ɦam gursura dok-kiɗisiya ni gursura ay hu ziŋ loosina Baal-Beritta. U gursu ndaɗta ni Abimelek yow suu poy kolo ɦawana kay ceremu, warakasi u ndaɗu.

⁵ Nam tuɗ ndug ziŋ bumma hu Ofra. Nam ci gorsem suu vi bum Yerubaal suu dok-kiɗisiyana ki hu buu ma dewna halaŋ. Sa ma maa dewna ni Yotam toɓo ma vi Yerubaalna, kay nam ŋgay tam kiyo.

⁶ Suu ŋgolo suu Sekemma halaŋ u suu Bet-Millona halaŋ tok tasi ay mba tin Abimelek a mul ma Sekemma kakam tok eg ɦoyna eg ɦinira ceɗi ta suuna goɓoɗta hu zi ma Sekemma.

Boy ma Yotam damma

⁷ Yotam hum dla ndaɗta na ni, nam tuɗ ɗiŋ ki kolo kay ɦinira Garizimba. Nam tli delem ha kolo sawalla di ana, «Agi suu ŋgolo suu hu Sekemma humugi haa, ko Lona humugi ha ki may.

⁸ Ŋgusugina cuk tasi tuɗta a tuɗ fuu gu ma kak fokosi a mulnana. Asi di gu conona ana aŋ kak a mulna kamiya.

⁹ Conona hoŋosi dira ana, an ndak a noy mbulun ma suuna ŋga loosina u nam lay, fuu suuna u nam layna ki su? An ndak a kak kolo kay ndarayan ŋgusugina mayɗi su?

¹⁰ Ŋgusugina hin di tulumma ana, aŋ mbay kak a mulna kamiya.

¹¹ Tulumma hoŋosi dira ana, An ndak noy ŋgusun u vuɗun ma jivina ki su? An ndak a kak kay ndarayan ŋgusugina mayɗi su?

¹² Ŋgusugina hin di gugutluna ana, aŋ mbay kak mulla kamiya.

¹³ Gugutluna hoŋosi dira ana, An ndak a noy sumun ma furi loogina u suuna ɦayna ki kay a kak ŋgolla kay ŋgusugina su?

¹⁴ Ŋgusugina hin di ɦoɦolomma ana, Aŋ mbay kak mulna kamiya.

¹⁵ Ҥoɦolomma hoŋ dira maŋ ŋgusugina ana, lini gasi ni ɗegee ana agi a fuurun u mbulna ana an li a mul magina ni, agi mbay lakagi ga u ŋgusun ɗaŋgi su? Li ka naɗi ni, kura hin kal ay ki duk ɦoɦolomma. Ndaɗ hin ŋgal gu sedre ma Libanna kiyo».

¹⁶ Yotam hin dasi hu ana, «Cemi ni agi li ni ɗegee a tin Abimelek a mul maginara may kala. Agi li dla ndaɗta ni u hurugi ma jivina daŋ may kala. Humugi gagi kay dlara bun Yerubaal lagirara ko may kala? Agi li dlara eg suu mamsina gasi ni ko nam lagi jivira kagi wanda na may su?

¹⁷ Nam duu kagi cocoo. Nam ɦal iiri mamba ki kagiya. Nam suɗugi ay ki hu duk ko suu Madiyanna.

¹⁸ Agi may ni hin duu u suu mamsina. Agi cam goryom suu dok-kiɗisiyana ki hu buu ma dewna kolo kay ɦinira tani. Agi hin tin Abimelek goŋ mbaɓu mambana a mul ma Sekemma, kay nammi go ndusu magina.

¹⁹ Lini agi li dla ndaɗta eg Yerubaal ni jivi u ɗegeera ni, lam dlara eg suu mamsina ni jivi may ni. Agi hin li furira u Abimelek may. Nam hin furi ugi may.

²⁰ Li ka naɗi ni, kura hin kal ay ki huu Abimelek, ndaɗ hin ŋgal suu ŋgolo suu hu Sekemma kiyo, hin ŋgal suu Bet-Millona ki lay. Kura hin kal ay ki huu suu ŋgolo suu Sekemma u suu Bet-Millona, hin ŋgal Abimelek ki may.»

²¹ Yotam di boy namma di ni, pii tuɗ kak ha ki Beer, ha ki na day eg wayamma Abimelek.

Abimelek ti mulla kay suu Sekemma

²² Abimelek ti mulla kay suu Israelna basara hindi.

²³ Lona gi ŋgussa cora duk hoŋ suu ŋgolo suu Sekemma u Abimelek. Suu ŋgolo suu Sekemma ka min a hum u Abimelek oloɗi.

²⁴ Lini kay Abimelek ci gorsem suu vi bumma goryoŋ Yerubaalna ki na dok-kiɗisiya u suu ŋgolo suu Sekemma suu zuɗum um a nam li suluk nammana, asi hin fi kaɓak ma cona kay coosi ndaɗta.

²⁵ Suu ŋgolo suu Sekemma tuɗ buu Abimelek ha ki kolo kay ɦinira. Asi ka hin sa a jak egesi hu voɗ ndaɗtaɗi. Suuna tuɗ jok boy namma maŋ Abimelek.

²⁶ Hu buu dew ni Gaal ma goŋ Ebedna mbay hu Sekem u gorsemma. Suu ŋgolo suu hu Sekemma tin saa masira ki ni kamu.

²⁷ Suu asina halaŋ tuɗ ki ŋgoo bagi hu senena a em veŋ masina. Asi em sum veŋŋa may, tin luuna a li furira may. Asi mbay hu ziŋ loogi masisina ti may, ci may, pan Abimelek may.

²⁸ Gaal ma goŋ Ebedna di ana, «Abimelekŋi ge ma aygi suu Sekemma a hoŋ yaygi ga umba ge? Nammi goŋ Yerubaalna u Zebul, saam ma ŋgol asgaarina. Asi ay ni mborɓii suu vi Hamor ma bu Sekemmaɗi su? Aygi hin mbuɗ ki a suu mam suu sunumma ni nanage?

²⁹ Lini an kak a mulna kay suu asina wa ni, an hin dik Abimelek dam ana, yow suu duu ay kay suu maŋsina huwa, mbay duurumiya.»

³⁰ Zebul, mul ma hu zinana, hum boy namma, ma Gaal ma goŋ Ebedna damma na ni, hurum beŋ ki cocoo.

³¹ Nam gi goo vun sunda eg Abimelek dam ana, «Gola Gaal ma goŋ Ebedna mbay hu Sekem tani u gorsemma. Cemi nam di vun suuna ki um a duu u aŋga.

³² Cemi ni agi u suu duu maŋsina yowogi njeŋge ni tuɗ buurusi ha ki gaa.

³³ Maɗii feɗet faɗta day ay ki na ni, agi ndugusi ni na gaw. Lini Gaal u suu mamsina cuk ay ki a ŋgafaŋ duuna ni, aŋ li dlara huruŋ minda egesi ni na gaw.»

³⁴ Abimelek u suu duu mamsina yow njeŋge ni na gaw, tuɗ buu ha ki ŋgoo zi ma Sekemma, ɓorow ii suu mamsina ki na cuɓ cuɓ fiɗi.

³⁵ Gaal ma goŋ Ebedna kal ay ki maɗii feɗet mba col ki vun grek ma kay ɦoŋzinana. Gola ni suu vi Abimelekŋa nususi ni na gaw.

³⁶ Hu li ma Gaal wi suuna ay na ni, nam di Zebul ana, «Gola suu duuna ka ɗiŋ ay ki ga kay ɦinira wanna.» Zebul hin dam ana, «Aŋ wi ko suu warna na ni ŋgus ɦinira ɦawaa.»

³⁷ Gaal hoŋ di olo ana, «Gola suuna cuk ay ki ga keŋ ɦinira kay yam ndaŋgara wanna. Suu hiniŋŋa ay hu voɗta gu ma yam sennana wan mayna.»

³⁸ Zebul dam ana, «Aŋ sa ma li pan Abimelek ana nammi me may ge aygi a hoŋ yaygi ga um na ni kay megena, tuɗ ay ni suu aŋ panasi asina ɗaŋgi su? Kal ki tuɗ duu u asi ɗaŋgi su?»

³⁹ Gaal kal ay ki fok suu ŋgolo suu Sekemma gijaŋ duuna u asiya.

⁴⁰ Abimelek dik u Gaal gak gak nam pii fokomu. Asi ci suuna cocoo ta ta tuɗ tew maɗ ma cira ki ni vun grek ma ɦoŋzinana.

⁴¹ Abimelek tuɗ vi ziimmi hu Aruma. Zebul dik Gaal u gorsemma ni na gaw, hinisi ka a lak hu Sekem oloɗi.

⁴² Vin maɗii ni suu Sekemma min tasi a tuɗ ŋgoo bagi hu sene masina. Suu nde ndeŋŋa jok boy namma ha ki maŋ Abimelek ni na gaw.

⁴³ Abimelek yow suu duu mamsina, ɓorowosi irisi ki duk hindi, tuɗ buurusi ha ki gaa. Hu li ma asi wi suuna cuk ay ki hu senena may ni, Abimelek ndugusi ni na gaw, casi cocoo.

⁴⁴ Abimelek u suu umma mba ndug ɦoŋzina ni na gaw. Asi u suu hiniŋŋa ndug suu ha ŋgoo bagina gaw may, ci suuna cocoo.

⁴⁵ Abimelek ndi faɗta ga a duu u suu hu ɦoŋzi nammana, ci suu hu ɦoŋzi nammana ki halaŋ halaŋ. Nam hawaɗ ɦoŋzi namma kiyo. Nam zaa vuvuna ki hu ɦoŋzi namma.

⁴⁶ Hu li ma suu cuki hu zi ma eŋ cocona hum boy namma na ni, asi hin Sekem tani tuɗ cuk ki hu zira mini ga hu zulla ga u zira vi ful masina Baal-Beritta.

⁴⁷ Asi di Abimelek ana suuna ka ki ŋgay ga hu li namma.

⁴⁸ Nam u suu mamsina tuɗ kolo kay ɦinira Salmonda. Nam tli njetna tani ka ko guna, waɗam kolo kelemu. Nam di suu umma ana asi li ko nam li wandara na may.

⁴⁹ Gegelay ni ka guna kelemu, tuɗ u Abimelek halaŋ. Asi tuɗ mol gu namma fun zira vi ful namma ta u gara, gaɗ kura, ŋgal suu huna ki halaŋ halaŋ. Suu hu ɦoŋzi ma Sekemma miɗ ni ko ndaɗta na, njufiina u boyogina li va ma buɓ.

Miɗ ma Abimelek miɗna

⁵⁰ Ŋgoo dagan Abimelek tuɗ a duu u suu Tebekŋa. Nam tuɗ buurusi ga duu u asiya.

⁵¹ Hu ɦoŋzi namma ni zira ŋgolla ka mini duk gayra. Suuna halaŋ tuɗ ŋgay tasi ki huwa. Boyogina u njufiina, u suu ŋgolo suu hu zi nammana lay. Hu li ma asi dug vun grekŋa ay dugŋi, asi ful ki kolo kay yam zira mbuyra.

⁵² Abimelek mbay ki ta ta fun zi ndaɗta min a gi kura fun zira a ŋgalaɗ kira.

⁵³ Cara gikim yam ay u goo ɦinina, toom yam kiyo.

⁵⁴ Abimelek yi sa ma ziirim ɓagi mammana na zak dam ana, «Paɗ ŋgew maŋŋa, dogon kiyo kay sa hin di ana canni cara ɦawaa naɗi.» Goozoŋ namma hin cokomu. Nam miɗ kiyo.

⁵⁵ Hu li ma suu Israelna wi ana Abimelek miɗ ki wa ni, gegelay ni hoŋ vo hu ziimu ziimu.

⁵⁶ Lona hoŋ dla cora Abimelek laɗ eg bum cam goryom ki na dok-kiɗisiyara ni kamu.

⁵⁷ Lona hoŋ dla cora vi suu ŋgolo suu hu Sekemma ta asi laɗta ni kasi may. Givun ma vi Yotam ma goŋ Yerubaalna vasi ni ko ndaɗta na.