SUU KAƁAKŊA 8 - Boy Lonana

Dee suu vi Efrayimma hurusi ɓeŋ ki eg Gedeon

¹ Suu vi Efrayimma di Gedeon ana, «Aŋ a lami egemi na ni dla mege? Aŋ yami ka a ami tuɗ duu suu Madiyannaɗi ni kay mege?» Asi ɓakam u saɓakŋa cocoo.

² Gedeon hoŋosi dira ana, «Va ma an lam egegina ni mege? Sunda agi laɗ wanda vaɗ ew lay ni sura vi goryoŋ Abiyezerra kaɗi su?

³ Gola, Lona ɦagi gi Oreb u Zeb ki hu duk kogiya, dlara ami laɗ ayra halaŋ tew ka ura agi laɗ wandaraɗi lay.» Hu li ma nam vasi u dlara nana ni hurusi ma yara hin cuk gaa.

Gedeon duu suu ii u maɗiina ŋgoo mbo lum ma Yurdanna

⁴ Gedeon mba fun lum ma Yurdanna u suu mam suu kis kis hindina. Asi taɓa lumma ha kiyo. Asi ki vasi loɓi coco may ni asi ka dik u suu hinna tuwa.

⁵ Nam di suu hu Sukotna ana, «An cenegiya ɦangi funa ay maŋ suu man suu un wanna, kay cemi ni asi ki loɓi cocoo. An ka dikŋi gi Zeba u Salmuna, muli suu Madiyanna, tuwa.»

⁶ Muli suu Sukotna hoŋom dira ay ana, «Aŋ vi gi Zeba u Salmuna ka tuɗi lay ni ami ɦaŋ tlesuu tira maŋ suu maŋsina gaw su?»

⁷ Gedeon hoŋosi dira ana, «Jiviya, hu li ma Yawe ɦan gi Zeba u Salmuna ay ki hu duk kon wa ni an hin waɗagi ni u njewɗek wayra ŋgoo bagi hu fulla wandara u gi meera may.»

⁸ Ay hu li namma ni nam jak ay kolo hu Penuwel. Nam di suu hu zi nammana ni ko ndaɗta na olo. Suu Penuwelna hoŋom dira ni ko ndal suu Sukotna dam ayra na olo.

⁹ Suu Penuwelna ana, «Lini an hoŋ ay jivi wa na hoŋo ni an hin toogi ziigi ma mini wanna ki gaa.»

¹⁰ Zeba u Salmuna ha laki ni hu Karkor u suu duu masisina. Asi halaŋŋi 15.000. Ni suu asgaa suu vi suu may suu u maɗiinana halaŋ halaŋ. Suu casi ay kina ni 120.000 suu wi duuna ɦayna.

¹¹ Gedeon tli ni kolo hu voɗta vi suu taa yoorina na u maɗiina ii Noba u Yogboha na. Nam ci suu duuna kiyo. Suu asina saa ginni ana va ka lasi oloɗi.

¹² Zeba u Salmuna piira ni nam Gedeon cuɗusi usi gak gak, tuɗ vi muli suu mba' suu Madiyan asina ay kiyo ni gi Zeba u Salmuna. Ndaaram kal ki kay suu duu suu daŋŋa halaŋ halaŋ.

¹³ Gedeon, goŋ Yoasna, daɓ duuna daɓmi, hoŋ vo ni tli ni voɗta kolo Heres nara.

¹⁴ Nam vi goozoŋŋa dew col ay ni hu Sukot. Nam joɓom dla ɦoŋzi ma Sukotna. Goozoŋ namma ɓiirim sem suu ŋgolo suu huna ki kom halaŋ. Suu njufiina ni dok-kiɗisiya yam kiɗisiya.

¹⁵ Nam hoŋ eg suu Sukotna dasi ana, «Gologi ɗaŋŋi Zeba u Salmuna, suu agi dooron ki kay tina di ana, ‹Aŋ bay dik muli asina ki tu lay ni,› ami ɦaŋ funa gaw suna.»

¹⁶ Nam yow suu ŋgolo suu hu zi nammana, ka wayra u meera ay may. Nam waɗ suu Sukot asina a takasi kira.

¹⁷ Nam to zi ŋgol ma Penuwelna ki may, ci suu njufii suu huna ki may.

¹⁸ Nam hin di gi Zeba u Salmuna ana, «Suu may suu agi casi ay hu Taborna ni arage?» Asi hoŋom dira ana, «Suu asina ay ni ko ndal aŋ na may, irisi gol ko goryoŋ mulinana na.»

¹⁹ Nam hoŋosi dira ana, «Ni gorsenna, ni goryoŋ sunna, u sem Yawe lini agi hinisi ni iiriya ni an ka ndak a cagi kiɗi may.»

²⁰ Nam hin di goorom ma ŋgolna Yeter ana, «Col kolo, casi kiyo.» Na may goozoŋŋa ka paɗ ŋgew mamma kiɗi kay ndaana lamu. Nammi gogona ɦawaa.

²¹ Zeba u Salmuna hin di ana, «Aŋ u taŋga col kolo cami ki ni aŋu, kay sa njufna ndak a li njuffa ni nam daŋ may.» Gedeon col kolo ci gi Zeba u Salmuna kiyo. Nam fokosi tlesuu ay gi kel jambal masisinana.

Suu Israelna min kak Gedeon a mulna. Nam min kaɗi

²² Suu Israelna di Gedeon ana, «Aŋ kak a mulna kamiya, gooroŋ hin kak ka lay, gor ŋgologi maŋsina lay, kay aŋ suɗumi ki ko suu Madiyanna.»

²³ Gedeon hoŋosi dira ana, «An ka kak a mul magina ni an ɗi, ka gooronɗi lay. Yawe ni mul magina.»

²⁴ Gedeon hin dasi hu olo ana, «An min joɓogi va dew, duk tlege suu agi ɦurumusi ayna halaŋŋi gegelay ni ɦan kaaɗum ay dew dew.» Kay suu asi dikisina ni suu u kaaɗum lorra kosi ɦayna. Kay asi ni njaf ma vi Ismaelna.

²⁵ Asi hoŋom dira ana, «Na daŋ may ami hin taaraŋga aya.» Asi tok vun barawna kolo na ni gegelay ni taa kaaɗum mamba ay huwa.

²⁶ Nek kaaɗumba Gedeon joɓoɗ asi taaramba ayra li ii va ma kelo dok-mba'. Ni ndum tlesuu humba u baraw tlaw ma mulla vi muli suu Madiyanna ka huɗi. Ndum gi ɦedew ma ay kel jambal masisinana ka huɗi lay.

²⁷ Gedeon min efodna u lorra asi taaramba ay ndaɗta, tinim hu ɦoŋziimma Ofra. Suuna gijaŋ a goɓ va namma, mbuɗ kay Gedeon u suu mamsina ni a va ma daɓasi sesina.

²⁸ Ni ko ndaɗta na suu Madiyanna yasi hom kaŋga fok suu Israelna wa. Asi ka ndak a tli yasi kolo oloɗi. Mbassa Israella fi koɗ tara ta ta basara dok-fiɗi hu li ma Gedeon ka iiri tuna.

Miɗ ma Gedeon miɗna

²⁹ Yerubaal goŋ Yoasna gi tam hoŋ vo tuɗ kak hu ziimu.

³⁰ Gedeon goryom suu nam vuɗusi u tambana na dok-kiɗisiya. Kay boyogina um bolow cocoo.

³¹ Caamba sunda nam hiniɗ ha ki hu Sekem ndaɗ vuɗum go njufna dew. Nam tinim sem ana Abimelek.

³² Gedeon goŋ Yoasna miɗ ni hu maara u furira. Asi pammi hu zulla vi bum Yoassa hu Ofra-Abiyezer.

³³ Ŋgoo miɗ ma Gedeon miɗ kina ni suu Israelna hoŋ balamasi a goɓ fok Baal olo. Asi cenni Baal-Berit a loosina.

³⁴ Suu Israelna humusi ka gasi kay Yawe, Loosina, ma tuɗusi ay ki ko suu babali masi suu ŋguyusinaɗi.

³⁵ Asi ka wi dla mayra li eg Yerubaal-Gedeon hu ziimba na ndeɗi lay. Jivira nam laɗ kay suu Israelnara asi ka waɗɗi.