SUU KAƁAKŊA 7 - Boy Lonana

Gedeon su kay suu Madiyanna

¹ Yerubaal ni Gedeon col kolo maɗii feɗet, nam u suu mam suu umma halaŋ. Asi tuɗ buu fun mbo ma Harodna. Suu Madiyanna ha ki buuri ii mbayaw ŋgoo mbura Morena hu mbassa na may.

² Yawe di Gedeon ana, «Suu uŋ wanna kal bolow coco a an hinisi suu Madiyanna kosira, li wa na ni suu Israelna hin ŋga tasi ana, ami dik suuna ni u saɓakamiya.

³ Kay ndaɗta aŋ di suu Israelna sa ma vun digim ka ɓikim dlak ndaanana nam tuɗ ki voo.» Gedeon gasi jaŋ tukka, suuna tuɗ ki vo ni 22.000. Suu hinna ni buɓ buɓ doogo may.

⁴ Yawe di Gedeon ana, «Suu hin wanna kal ni bolow coco tu olo. Aŋ tuɗusi ha fun mbona hu li namma ni an hin tukuŋsina olo. Sa ma an di ana nam tuɗ uŋuna hin tuɗ may, sa an daŋ ana nam tuɗ uŋgina hin ka tuɗɗi may.»

⁵ Gedeon tuɗ suuna ha fun mbona halaŋ. Yawe hin di Gedeon ana, «Suu may suu dlak yona u kosi ko diginina nana aŋ cukusi ki zeɗ, suu may suu goɓ ga u vun givisi ci yona u vunusina aŋ cukusi ki zeɗ may.»

⁶ Doli ɗini suu go yona kolo funusi u kosina ni kis kis hindi. Suu hinna halaŋ goɓ ga u vun givisi ci yona u vunusina.

⁷ Yawe di Gedeon ana, «An hin suɗugi ki ni u bik ko suu kis kis hindi wanna, suu go yona vunusi u kosina, an hin hiniŋ suu Madiyanna ki hu duk koŋu. Suu bolow coco wanna gegelay ni hoŋ vo hu ziimu.»

⁸ Gedeon hin suu kis kis hindina ka um may, bolow suu belna nam hinisi hoŋ vo may. Suu hin ka na yow tlesuu vi suu tuɗ ki vona u tokolom masi ma duuna ka kosiya. Suu Madiyanna ay laki ni ga usi hu ɦuɗugumba na may.

Ҥeɓ suu Madiyanna a suu kasira

⁹ Njeŋge ndaɗta ni Yawe di Gedeon ana, «Col koloo tuɗ ndug suu Madiyanna, an hiniŋsina ki hu duk koŋ wa.

¹⁰ Lini taŋ laŋ ndaa a tuɗ dukusira ni tuɗugi u tagi u saaŋ ma sunda Pura.

¹¹ Aŋ hin hum dlara asi ka daɗta ni saɓakaŋ hin mba huwa, aŋ ndak a tuɗ usi ga hu kaŋ masina.»

¹² Suu Madiyanna, suu Amalekŋa u suu ay u maɗiinana halaŋ moli hu li namma ni zuli a su jeena. Sa ka ndak a ndumusi jambal masiraɗi, ndaɗ zuli a su ŋgetl ma doŋ lummana.

¹³ Hu li ma Gedeon mbana may ni fi sana cuɗ vun doyra maŋ banamma ana, «Aŋ gola doyra dan kaa ana an wi komnjodina ŋguy hu kaŋ ma vi suu Madiyanna mba daɓ u mbutluɓma, pukum ki kaŋgaa an wi li ma nam kal huna kaɗi, mbutluɓ namma ki ni bowi kaŋga may.»

¹⁴ Banam namma hoŋom dira ana, «Kala li ka ni ŋgew ma vi Gedeon ma goŋ Yoas ma Israelna kalage. Lona ɦam suu Madiyanna u kaŋ masina halaŋ ki ni hu duk komu.»

¹⁵ Hu li ma Gedeon hum vun doy ndaɗta u sa ma gaɗ uɗ kina na ni nam goɓ ga cen Lona, hoŋ ay vo duk suu Israelna dasi ana, «Yowogi koloo, kay Yawe hinigi kaŋ ma vi suu Madiyanna ki ni hu duk kogiya.»

Suu Madiyanna viɗ li ma asi liŋ huna kiyo

¹⁶ Gedeon ɓorow ii suu duu suu kis kis hindina ki ni hindi may. Asi halaŋŋi nam ɦasi tokolomma kosi dew dew u gegel ma va ka huɗina dew dew may, tosolomba gi hu gegelna dew dew halaŋ may.

¹⁷ Nam dasi ana, «Agi golongi ni anu, lagi ko ndal an lira na may. Hu li ma an tew eg kaŋŋa wa toko ni dlara an laɗta ni agi laɗ may.

¹⁸ An hin bu tokolomma, ami u suu unna halaŋ, agi may ni hin buugi tokolomma ki ŋguy kay kaŋŋa na cutl, agi hin cagi lulura may ana, Maŋ Yawe, maŋ Gedeon.»

¹⁹ Gedeon u suu ay um kisna mba tew fun kaŋŋa ni duk ŋgikka hin na tok, ni hu li ma suu juɓpa a mbuɗ tasina may. Asi bu tokolomma may, to gegeli suu ay kosina ki ga may.

²⁰ Suu irisi ki ɓorowi hindina halaŋ bu tokolomma, to gegeli masina kiyo. Asi vi tosolomba ki kosi ma gulna, tokolomma a bura kosi ma njufna may, asi ci lulura may ana, «Ŋgew ma vi Yawena, ma vi Gedeonna.»

²¹ Hu li ma asi coli kay kaŋŋa nana ni gegelay ni coli ni hu liimma liima. Kaŋŋa u tamba halaŋ gijaŋ liŋŋa u lulura kolo hal li ma piira.

²² Hu li ma suu kis kis hindina bu tokolomma na ni, Bu Suuna pereɗ ii suu hu kaŋŋana u tasiya, gegelay ni mbuɗ ŋgew mamma ni kay ndaramma gaw. Suuna halaŋ pii tuɗ ta ta hu Bet-Sitta keŋ mbassa Serarara. Tuɗ tew ay ki fun lum ma Abel-Meholana tok eg Tabbat.

²³ Suu Israelna yi suu vi Neftalina, suu vi Aserna u suu vi Manasena halaŋ. Asi tuɗ dik u suu Madiyanna.

²⁴ Gedeon sun vun sunda eg suu kay ɦinira vi Efrayimba dasi ana, «Diŋigi ay ga ŋgafagi suu Madiyanna ay, baaragi ki fokosi fun mbo ma Bet-Barana ta ta fun lum ma Yurdanna.» Suu Efrayimma tuɗ ay halaŋ halaŋ. Asi mba lak ki fun mbo ma Bet-Barana u lum ma Yurdanna lay.

²⁵ Asi yow muli suu Madiyan suu mbana gi Oreb u Zeb, asi ci Oreb ki kay ɦinira vi Orebpa may, ci Zeb ki hu li ma em summa vi Zebna may. Asi dikisi ta ta tewesi ki hu Madiyan hin sun yam gi Oreb u Zeb ay maŋ Gedeon ŋgoo lum ma Yurdanna may.