SUU KAƁAKŊA 6 - Boy Lonana

Suu Madiyanna las suu Israelna

¹ Suu Israelna li dlara ka ii Yawe jiviɗira, Yawe hinisi ki hu duk ko suu Madiyanna ta ta basara kiɗisiya.

² Suu Madiyanna las suu Israelna saɓak cocoo. Ko ndaa suu Madiyanna ni suu Israelna mbee kolo kay ɦinira tuɗ ŋgay tasi ki hu zul ɦinira. Ŋgay ki hu li ma zuzulna a suɗ tasira.

³ Hu li ma suu Israelna zaa tlena ki ga wa halaŋŋi suu Madiyanna u suu Amalekŋa u suu ay ŋgoo bagi u maɗiinana mba ndugusi ni na gaw.

⁴ Asi mba vi mbutluɓ masisina ki vo vi suu Israelna, ɓalakasi sene masina ki halaŋ halaŋ ta ta tew ay ki fun ndaŋgara Gazara. Asi ka hin va ma ti hu mbassa vi suu Israelnaɗi. Timigiina, mbutlugina u korra lay asi yowosi kiyo.

⁵ Asi tum ay ni u yoori masisina halaŋ, ugi mbutluɓ masina lay, suuna mbay ni bolow cocoo ka ndumbi, zulira ko njeena na. Asi u jambal masisina lay ni zuli cocoo. Asi cuk hu mbassa a ɓalakaɗ kira.

⁶ Kay ndaɗta suu Israelna mbuɗ ki maŋi coco ko suu Madiyanna. Suu Israelna tii eg Yawe.

⁷ Hu li ma suu Israelna tii eg Yawe ana nam buɗusi ki ko suu Madiyanna nana,

⁸ Yawe sun sa ma jok vun Lona ay eg suu Israelna dew mba dasi ana, «Yawe, Lo ma vi suu Israelnana, di ana, Anni ka sa ma cukugi ay ki hu mbassa Egiptera ɗi su? An buɗugi ay ki hu mbaɓura ni ka an ɗi su?

⁹ An suɗugi ay ki ko suu Egiptena ki ko suu lasagina halaŋ halaŋ, an dikigisina ki fokogiya, an ɦagi mbas masira kiyo.

¹⁰ An dagi anaba, Anni Yawe, Loogina, agi lagi ndaa loogi suu Amorna suu agi cuki dukusina ɗi. Agi may ni humungi vunun kaɗi.»

Lona man Gedeon a suɗ suu Israelna kiyo

¹¹ Sa sunda vi Yawe mbay hu ɦoŋzi ma Ofrana mba kak ga u ɦoyna ŋgus namma duk sene ma vi Yoasna, hu deera vi Abiyezerra, Gedeon gooromma coli to wa blena hu zulla a ŋgayam ki ko suu Madiyanna.

¹² Sa sunda vi Yawe ndi ki iirimu hin dam ana, «Yawe ka u aŋu, sa njuf ma duuna.»

¹³ Gedeon hin dam ana, «Bu suu manna heɓ huruŋ egenu, lini Yawe ka u amiya ni dlara lami cocora ko wandara na ni kay mege? Dlara mbuɗ mbuɗta somoyomi cuɗumira coco wanda hin li ni nanage? Ana Yawe cukumi ay ki hu Egipte ni namu ni ka gasi ɗi su? Cemi ni Yawe hinimi ki hu duk ko suu Madiyanna na walaɗ ni nanage?»

¹⁴ Yawe pereɗ irim egem dam ana, «Tuɗ u saɓak maŋ namma suɗ suu Israelna ki ko suu Madiyanna. An sunuŋŋi an daŋ may.»

¹⁵ Gedeon hoŋ dam ana, «Bu Suuna manna heɓ huruŋ egenu, an ndak a suɗ suu Israelna ki ni ana mege? Deeren duk suu vi Manasena ni na ew daŋ. Hu ziŋ bunna anni ma goo dukusina.»

¹⁶ Yawe hoŋom dira ana, «An hin tuɗ u aŋu. Aŋ hin dik suu Madiyanna ni ko sa ma dewna ɦawa na.»

¹⁷ Gedeon dam ana, «Lini gasi aŋ wan hahawanu ni aŋ daŋ may ni takan va ma tak ki ana aŋ ɓakanni aŋu na aya.

¹⁸ An ceneŋu ka aŋ jok uŋ ka kiɗi ta ta an mbaaraŋ ɓivun manna ay fokoŋ tani tuwa.» Yawe dam ana, «An kak tani ta ta aŋ hoŋ ay ki tuwa.»

¹⁹ Gedeon mba ŋgaɗ goo ɦuna may, yow fuɗta kelewna dok-hindi li fu ma bay kuffa dukumma may. Nam cuk tliwna ay hu goo kalamba may, vo mbalara ay hu goo doyra may. Nam mbaarasi ay u ŋgus ɦoy namma, fok Yawe.

²⁰ Sa sunda vi Lona dam ana, «Tli tliwna may, yow fu ma bay kuffa dukumma may, tli mbalara may, tinisi ha kolo kay yam ɦinira, vo mbalara ha ki kay ɦinira may.» Gedeon li ko ndaɗta na may.

²¹ Sa sunda vi Yawe maɗ fun tokolora komba ŋgen tliwna u fu ma bay kuffa dukumma na ni kura kal ay ki duk ɦinira ŋgal tle asina ki halaŋ. Sa sunda vi Yawe viɗ ii Gedeonni na gaw.

²² Gedeon wi ki ana gasi ni sa sunda vi Yawe, nam di ana, «Ҥa ɦa, Bu Suuna Yawe, an wi sa sunda vi Yawe ki u irinu.»

²³ Yawe dam ana, «Heɓpa li u aŋu, li ndaaɗi, aŋ ka miɗ ɗi.»

²⁴ Gedeon min givin ma togolla hu li namma maŋ Yawe. Nam yi li namma ana, «Yawe ni heɓpa.» Ta ta cemi ni givin ma togolla namma ka hu Ofra Abiyezer.

Gedeon to ziŋ lo ma yam ana Baalna kiyo

²⁵ Njeŋge ndaɗta gaw ni Yawe di Gedeon ana, «Vi mbutl ma jeŋ wilina may, vi bolo mbutl ma basaɗam kiɗisiyana may. Aŋ tuɗ to ziŋ Baal ta buŋ miniɗta u li ma ŋgal ɓivunna ki may. Gu ma vi Aserna aŋ kaam ki may.

²⁶ Aŋ hin min givin ma togolla maŋ Yawe Looŋŋa tu ɗaŋ. Ni kolo kay lii mbuy namma. Aŋ vi bolo mbutl ma mbana, ŋgalam kolo kay gu ma vi Aserna ma aŋ kaam ay kina.»

²⁷ Gedeon yow suuna doogo duk suu sun mamsina. Nam li ko ndal Yawe damba na. May ni nam ŋgay ndaa suu vi bumma u suu hu zinana, nam hin dlara li dla ndaɗta faalira tani hin laɗ ni njeŋgee.

²⁸ Maɗii feɗet ni suu hu ɦoŋzinana cuk ay kiyo ni wi li ma ŋgal ɓivunna maŋ Baalna ki hawaɗiya, gu ma vi Aserna ki kaay kaŋga may. Bolo mbutl ma mbana ŋgadi, gi kay givin ma togolla ma minim wilina may.

²⁹ Suuna joɓ tasi na zeɗ zeɗ ana, «Sa ma li dla ndaɗta nana ni gege?» Hu li ma asi hal u sa namma ta ta tuɗ fiya ni ana, «Gedeon ma goŋ Yoasna li dla ndaɗta ni namu.»

³⁰ Suu hu ɦoŋzi nammana di Yoas ana, «Ҥami gooroŋŋa Gedeon ay ki bunsu ami cam kiyo kay nam hawaɗ li ma li ɓivunna maŋ Baalna kiyo, ka gu ma vi Aserna ma coli keŋŋa ki lay.»

³¹ Yoas di suu moli vun grekemma ana, «Agi a njun kay Baal ni agi su? Hinigi ni a agi suu duu kay semma ɗaŋ su? Sa ma min a njun kay Baalna lini gegelay ni cam ki ni ciya, sa namma ka fo maɗiiraɗi. Lini Baal gasi ni Lona ni nam ka doo kay tam u tambaɗi su? Kay ana Gedeon hawaɗam liimma li ɓivunna kiyo.»

³² Hu buu namma gaw ni asi tin semma kay Gedeon ana Yerubaal ni ana Baal sa sukulum u namu, kay nam hawaɗam liim ma ŋgal ɓivunna kiyo.

Min tara a duu u suu Madiyanna

³³ Suu Madiyanna u suu Amalekŋa u suu may suu u maɗiinana taɓ vunusi dew, taɓa lumma Yurdanna ay ki mba vi ziisi ki hu ɦuɗugumba Jizreella.

³⁴ Musukka vi Yawera mba kay Gedeon, nam bu tokolomma dee suu vi Abiyezerna yasi ay a asi tuɗ kay ceremu.

³⁵ Nam sun suuna kay dee suu vi Manasena halaŋ yasi aya, asi tuɗ um may. Nam hin sun suu daŋŋa kay dee suu vi gi Aser, Zabulon u Neftali, asi ŋgafasi ay may.

³⁶ Gedeon di Lona ana, «Lini aŋ min a suɗ suu Israelna ki u bik kon ko aŋ dira na ni,

³⁷ gola an min cuk tlimiɗ timiina kolo hu maɗakŋa wanna, mbaɗagira li ay egem wa na hol ka ki hu li ma daŋgi ni an wi ki ana aŋ min gasi a suɗ suu Israelna ki u bik konu ko aŋ dira na may.»

³⁸ Nam li ko nam dira na may. Vini maɗiira ni Gedeon em tlimiɗ timii namma na ni tam ki laɓii u mbaɗagira, mbaɗagi ndaɗta oy kop ma ci yona.

³⁹ Gedeon di Lona ana, «Ko huruŋ ɓalak egen ɗi, lini an a di dlara daŋ ha hu dew olo, an min a tuk dlara daŋga u tlimiɗ timii namma hu dew. Vini wanni ko tlimiɗ timii namma hin sooyra ni nam dew li ma halaŋŋa li ki u mbaɗagira may.»

⁴⁰ Njeŋge ndaɗta ni Lona li ko ndal nam dira na may. Tlimiɗ timiina hin sooyra ni nam hol, li namma halaŋŋi ki laɓira u mbaɗagira.