SUU KAƁAKŊA 5 - Boy Lonana

Soolla Debora gaɗta

¹ Hu buu namma ni Debora u Barak ma goŋ Abinoamma gi soolla ana,

² «Hu li ma suu ŋgolna cuk tasi fok suu Israelna. Hu li ma suu Israelna ɦal tasi u hurusi wa ni. Gagi deɓpa maŋ Yawe.

³ Humugi haa agi muli suu ŋgolona. Tin humugi ha huma, agi mulina. An gi soolla ni maŋ Yawe. An min geleɗ Yawe, Lona vi suu Israelna.

⁴ Yawe, hu li ma aŋ kal ay ki hu Seirna, Hu li ma aŋ tuɗ ki hu sene ma Edomma, ndaŋgara dlak cocoo, huulona si mbona lay, ɗugulla si mbona cocoo.

⁵ Ҥinira geŋeɗ fok Yawe, ɦinira Sinayra lay. Fok Yawe, Lona vi suu Israelna.

⁶ Hu cokira vi Samgar ma goŋ Anatna, hu cokira vi Yael, suu kulumina viɗ voɗ masira kiyo. Suu tuɗ koyra tli ni voɗta gunira.

⁷ Mulina ka oloɗi, mul ka vi suu Israelna oloɗi. Ta ta hu li ma ndak Debora col kolona. Ta ta hu li ma ndak mbuɗ a su suu Israelna.

⁸ Suu Israelna man loogi suu daŋŋa na gaw ni, duuna ndi ni na gaw. Suu Israelna suu buɓ buɓ dok-fiɗi a fi mbarina kosi na dew ɗowba saɓpara ni loɓ cocoo.

⁹ Hurunni u gaɗta vi suu Israelnara u suu ɦal hurusi u min masirana. Gagi deɓpa maŋ Yawe.

¹⁰ Agi suu ful kay korra haɓpa, agi suu laki kay baraw ma doɓolokŋa, agi suu ka tuɗ hu voɗtana yagina semu.

¹¹ Tok eg goloŋga, suu may suu ka ɓorow mbo ma cira kina. Asi ka ŋga sunda Yawe laɗta. Nam njun u suu ŋgolo suu fok suu Israelnana. Suu vi Yawena ka cuk hu vun grekŋa vi ɦoŋzinana.

¹² Col koloo, cola, Debora, dliɗ kiyo, dliɗ ki kolo, gi soolla. Aŋ, Barak, may ni coli koloo, hoŋ suu maŋ suu aŋ yowosi ay balnana aya, goŋ Abinoamma.

¹³ U suu may suu hin iirina hoŋ ay eg mulina. Suu vi Yawena tok tasi ay egem ko ndal suu bigawlagina na.

¹⁴ Suu may suu su kay suu Amalekŋa col ay ni Efrayim, njaf suu vi Benjaminna ay dukusi may. Suu vi Makirna sun mulina aya. Njaf suu vi Zabulonna sun suu duuna ay may.

¹⁵ Muli suu hu njaf Issakarna ka u tasi u Debora. Issakar hurum min Barak ɦay. Nam tuɗ um u suu mamsina hu lii duuna. Na may njaf suu vi Rubenna ci wayra dukusira ka daɓbi.

¹⁶ Agi cologi eg kaana na tokŋi kay mege? A hummi suu taa yoorina ka yi yoori masisinara su? Na daŋ may njaf suu vi Rubenna ci wayra dukusira ka daɓbi.

¹⁷ Ha hu Galaad ŋgoo mbo lum ma Yurdanna ni suu hiniŋŋa jok usi kaɗi. Njaf suu vi Danna ka cuki hu lumba gak gak. Suu vi Aserna ka cuk fun lumma li sunda u lum kawi masina, tok fun mbo lum ma ŋgol ma Mediteranena.

¹⁸ Suu vi Zabulonna ni suu ɦal iiri masira ki fun miɗnana, u suu vi Neftalina ni suu ka juɓ u suuna ay kolo kay ɦinira na may.

¹⁹ «Suu mulina mbay li duuna, muli suu Kanaanna mba duura. Asi duu ay ni hu Taanak tok eg mbo lum ma Megidona. Va jo na ew lay, gursu lay ni asi fi ka kosiɗi.

²⁰ Ay kolo huulona ɗugulla si mbona ay a duu Sisera. Ciciwra ay kolo hu liiɗ day ni duu u Sisera lona ka si may.

²¹ Mbo lokka Kisonda kaa u asi wa. Ni lokka day dayna mbo lokka Kisonda ni li ma duuna. An tuɗ foko, ŋgusun tuɗ ni u saɓakŋa.

²² Sem kulumina soo ga jaŋŋa giɗibik giɗibik. Asi jaŋa, jaŋ yow piira hin pupusna duk lubuna.

²³ «Sa sunda vi Yawe di ana, gagi vunna maŋ ɦoŋzi ma Merosna. Gagi vunna maŋ suu hu zi nammana, kay asi mbay ka a njun u Yaweɗi. Asi mbay ka a njunum u suu masi suu wi duunaɗi.

²⁴ Paɗvunna ka kak duk ndarayak boyogina halaŋ, Yael caŋ Heber ma Kenna. Duk boyogi suu ka buu hu mbutluɓmana halaŋŋi ko paɗvunna li ha kaku.

²⁵ Nam joɓmi yona, ndaɗ ɦammi mbiira. Hu va ma ci mbona vi mulna, ndaɗ ɦam mbul mbiira huwa.

²⁶ Ndaɗ maɗ koɗ paɗ kawi ma ɓal mbutluɓma gana, koɗ ma njufna a tli mortora vi suu li sunda gaw may. Ndaɗ waɗ yam Sisera, toom yam kiyo. Ndaɗ coom yam, ɓalam yam kaŋgaa.

²⁷ Nam puk kaŋga u seɗu, nam puk kaŋgaa, buuri gaa. Nam puk ga u seɗu. Nam puk ga ni hu li ma nam maŋ ki huna. Li ma nam puk ga huna nam miɗ ki wa, ka oloɗi.

²⁸ «Su Sisera ka gol ay hu ii zira ka yoo taɗu, ana pus pus ma kulumina ka hoŋ ay karam vo ɗi ni nanage? Pus pus asina tuɗ karam loɓma na ni nanage?

²⁹ Cara wi yalna duk boyogi suu vi mulnana dew hoŋoɗ dira ana,

³⁰ Ni kay ana asi ka ɓorow ni tlesuu asi ɦurumusi hu jonana tu kalage. Go tamara dew ɗowba gorɓiina mba' maŋ sa dewna. Baraw ma jivi cocona maŋ Sisera, baraw ma tam ndalina. Baraw ndali ma njun kelenna lay.

³¹ «Yawe suu babali maŋsina ba ni ko ndaɗta na. Ko banayaŋŋa lini ko faɗta day ay kolo u saɓak maɗnara na may.» Mbassa vi suu Israelna fi koɗ tara ta ta basara dok-fiɗi.