SUU KAƁAKŊA 4 - Boy Lonana

Debora u Barak

¹ Ehud miɗ ki miɗni, suu Israelna gijaŋ li dlara ka ii Yawe jiviɗira.

² Yawe ɦasi ki ko Yabin, mul ma Kanaanna. Nam ay kaki mulla ni hu zi ma Hasorna. Saam ma ŋgol asgaana ni Sisera. Nam ay ki cuki ni hu Haroset-Goim.

³ Suu Israelna yow tiina eg Yawe kay Sisera u pus pus kawina kom na kis kis dleeŋe. Nam las suu Israelna cocoo, basara na dok-mba'.

⁴ Debora, cara jok vun Lona caŋ Lapidotta, kaasi ɓakŋa kasi asi suu Israelna.

⁵ Ndaɗ cuki ni Manawra vi Debora duk ɦoŋ zi ma Ramana u Betel na, kay ɦinira Efrayimba. Suu Israelna tuɗ ay kolo egeɗ a joɓ u dlara.

⁶ Ndaɗ yi Barak ma goŋ Abinoamma hu Kedes ta Neftalira, dam ana, «Yawe, Lo ma vi suu Israelna, di ana, aŋ tuɗ kay ɦinira Tabor, tok suu njufiina na buɓ buɓ doogo duk njaf suu vi Neftali u Zabulonna.

⁷ An hin mbaɗaŋ Sisera ma ŋgol asgaa suu vi Yabinna ay egeŋ hu lokka Kisonda u suu mamsina u pus pus mamsina lay halaŋ. An hin hiniŋsina ki hu duk koŋu.»

⁸ Barak hin daɗ ana, «Lini ndak tuɗ u an may ni, an hin tuɗa, lini ndak ka tuɗ u anɗi ni, an ka tuɗɗi may.»

⁹ Ndaɗ hin dam ana, «An hin tuɗ u aŋ hu voɗta aŋ hin tuɗ hura. Na may bibiŋil ndaɗta ni ka maŋgi, kay Yawe hin ɦal Sisera ki ni hu duk ko cara.» Debora hin col kolo tuɗ u Barak hu Kedes.

¹⁰ Barak yi dee suu vi Zabulonna u suu vi Neftalina ay egemu. Suuna tuɗ ha kolo egem hu Kedes na buɓ buɓ doogo. Debora tuɗ ha kolo hu may.

¹¹ Coki ndaɗta ni Heber ma Kenna ka cuki eg Kedes na tok. Nam ɓorow dukum ay ki u suu Kenna suu hiniŋŋa suu hu njaf Hobab ma tanaŋ Moizna. Nam pi mbutluɓ mamma ki eg ɦoy ma Sananimma na tok eg Kedes.

¹² Suuna tuɗ di Sisera ana Barak ma goŋ Abinoamma ka kolo kay ɦinira Taborra.

¹³ Nam tok pus pus mam suu kulumina suu kis kis tleeŋena ay egem halaŋ halaŋ u suu mam suu duuna lay hu Haroset-Goim. Asi yow ay hu li namma mbay ki hu lokka Kisonda.

¹⁴ Debora di Barak ana, «Col kolo, gola ni buu ma Yawe ɦaŋ Sisera ki hu duk koŋŋa. Na daŋ may Yawe kal ay ki fokoŋ wa.» Barak ɗiŋ ay ki ga kay ɦinira Taborra u suu mam suu buɓ buɓ doogona kay cerem may.

¹⁵ Hu li ma Barak tew egesi tok may ni, Yawe gi ndaa ma ŋgolna huu Sisera u suu mamsina. Asi viɗ ki na viɗ ka wi li ma asi a liŋ hunaɗi. Sisera cuk ay ki ga hu pus pus mamma cani, pii liŋŋa ŋgayra ni u semu.

¹⁶ Barak dikisi usi u pus pus masisina ta ta tuɗ tinisi ha ki hu Haroset-Goim. Suu duu suu vi Siserana halaŋ casi ki u ŋgewna. Sa ma suɗ ka na dewɗi.

¹⁷ Sisera pii na ni, tuɗ ŋgay tammi ii Yael ta caŋ Heber ma Kenna kay duk ɦoŋosi ni heɓpa u Yabin, mul ma Hasorna u suu vi Heber ma Kenna.

¹⁸ Yael kal ay ki ŋgaf Sisera dam ana, «Cola, sa ŋgol manna, cola, li ndaaɗi. Mbay kak varan tani.» Nam kak vo varaɗ hu mbutluɓ maɗna. Ndaɗ baaram yam ki u barawna may.

¹⁹ Nam daɗ ana, «Ndak ndak a ɦan yo ma ci na nde su? Kay laara can cocoo.» Ndaɗ mal vun mbu bak mayra mbiira, ɦam mbiira. Nam ciya, hoŋ baaram barawna kamu.

²⁰ Nam daɗ ana, «Col ha ki vunna, lini sa ma joɓok ana, Sa kal ka varaki su? Ni ndak dam ana, Ҥawaa, sa mba ka taniɗi.»

²¹ Yael ta caŋ Heberra tli kawi ma ɓal mbutluɓma gana, tli mortora may, kal ha kalafi u Sisera na en, tuɗ kalamma ha humum ɓalam yam ha ki ga duk ndaŋgara na hanak. Sisera ay ki loɓi cocoo, buu senna, wanni ka dliɗɗi, hin jak ha miɗna ni na gaw.

²² Gola ni Barak cuɗ sem Sisera ay cow. Yael kal ay ki ŋgafam dam ana, «Mbaya an min takaŋ saaŋ ma aŋ halamma.» Nam kal ha vo varaɗu. Gola ni Sisera gi ga miɗi si, u kawina ɓali humum may.

²³ Hu buu namma Lona hoŋ yam mulna Yabin, mul ma Kanaanna, ga fok suu Israelna.

²⁴ Bik suu Israelna mbuɗ nek coco kay Yabin, mul ma Kanaanna, ta ta asi dik Yabin kiyo.