SUU KAƁAKŊA 3 - Boy Lonana

Njaf suu ɦawa suu hin ka hu mbas ndaɗta

¹ Gola ni njaf suu ɦawana suu Yawe hinisi ka a tuk suu Israelna u asina, suu may suu wi duu ma Kanaanna kaɗina halaŋ.

² Li dla ndaɗta na ni a ɦaɗ gor suu Iraelna, ni a haɗasi dla duuna kay asi ni suu wi dlara duuna ay ka fok jewɗina.

³ Suu hin ka hu asina, suu hu mulla Filistinda iriɗ zeɗ zeɗ vadl. Suu Kanaanna, suu Sidonna, suu Hivna, suu cuki kolo kay ɦinira Libanda, col ay kay ɦinira Baal-Hermon day ta ta hu Lebo-Hamat.

⁴ Suu asina hinisi ni a tuk suu Israelna a wasi ki ana gasi asi hum u gaɗta vi Yawe ta nam ɦaɗ ka maŋ somoyosi fun saam ma sunda Moizza sura?

⁵ Suu Iraelna cuki ni duk suu Kanaanna, suu Hitna, suu Amorna, suu Perizna, suu Hivna u suu Jebusna.

⁶ Asi ɗumusi goryosiya, asi ɦal goryosi masi may. Asi sunusi loogi masisina may.

Dlara kay suu kaɓakŋa Otniyel

⁷ Suu Israelna li dlara ka ii Yawe jiviɗira. Asi maa Yawe, Loosina kiyo. Asi gijaŋ sunni Baal u Asera.

⁸ Yawe hurum ɓeŋ ki eg suu Israelna. Nam hinisi ki hu duk ko mulna Kukan-Rikataim, mul ma Mesopotamina. Nam ti mulla kasi ta ta basara kalavandi.

⁹ Suu Israelna tii eg Yawe. Yawena ɦasi sa ma suɗusina aya. Ni Otniyel ma goŋ Kenazna. Nammi wayaŋ Kaleb ma goona.

¹⁰ Musukka vi Yawe mbay kamu. Nam kaɓakŋa kay suu Israelna. Nam tuɗ a duuna. Yawe ɦam mulna Kukan-Rikataim ay ki komu.

¹¹ Suu Israelna tasi koɗ ta ta basara dok-fiɗi. Ŋgoo dagan Otniyel goŋ Kenazna hin miɗa.

Ehud

¹² Suu Israelna hoŋ li dlara ka ii Yawe jiviɗira olo. Yawe ɦal saɓakŋa ay maŋ Eglon, mul ma Moabma, kasiya. Kay ana asi li ni dlara ka ii Yawe jiviɗira.

¹³ Eglon yow goryoŋ Amonna u suu Amalekŋa, asi tuɗ duu suu Israelna su kasiya. Asi tli ɦoŋzi ma Jerikona kiyo.

¹⁴ Suu Israelna li sunda u Eglon, mul ma Moabma ta ta basara doogo yam kalavandi.

¹⁵ Suu Israelna tii eg Yawe. Yawe hin ɦasi sa ma suɗusi kina, ni Ehud ma goŋ Gerana. Nammi hu dee suu vi Benjaminna, kom gulu wa. U cen mamba suu Israelna sun taa masira eg Eglon, mul ma Moabma.

¹⁶ Ehud tli ŋgew ma siim mbana komu. Fiyekem nus meterra. Nam njunum ɓalam ma njufna hu baraw mamma.

¹⁷ Nam tuɗ ɦal njun ndaɗta maŋ Eglon, mul ma Moabma. Eglon ni sa ma ɗoori ŋgol cocoo.

¹⁸ Hu li ma asi ɦal njun ndaɗta ha may ni, Ehud hoŋ ay ki dagan u suu zii njun ndaɗta hana ni na gaw.

¹⁹ Mbay tew eg li ma li ɓivunna maŋ fulina tok eg Gilgal tana may ni, Ehud hoŋ ha dagan gaw mba di ana, «Mulna, an boy ma ŋgay maa ka kon an a daŋŋa.» Mulna hin di suu mamsina ana asi cuk ha ki bunsuwa. Suu may suu coli kam a juɓum umma halaŋ cuk ki bunsuwa.

²⁰ Ehud mbay eg Eglon nam kaki ga hu zira ɦuruɗ heɓ ɦayra. Ni hu zira ha kay ndaraɗta kolora. Zi ndaɗta ni mam nam mulna doy hol. Ehud dam ana, «Boy ma vi Lonna ay ka funun a daŋŋa.» Mulna col ay ki kolo hu dlam mamba.

²¹ Ehud sun kom ma guluna paɗ ŋgew ma ay njuni hu ɓalam ma njufna, cok hay mulna u nam na ɦuk gaw.

²² Ŋgewna ti na halaŋ halaŋ. Mbulna cil ha ki kayammi, soɗom vo ay ki kiɗikŋi na gaw. Ehud paɗ ŋgewna ay ka kiɗi, hinimma ha ŋgaari hurummi na gaw. Ehud kal ki kiɗik, dugum vun goŋga ha kammi na gaw may.

²³ Hu li ma nam dug vun goŋga ha na, gaɗ vunuɗ ha ni na gaw may.

²⁴ Nam kal ki kal ni, suu sun suu vi mulnana, mbay a golomba. Gola ni vun zira kolo kay ndaraɗtara dugiya. Asi ɓak tasi ana, «Nam li ka kakŋi bagi hu li ma heɓma kalage.»

²⁵ Asi juɓ na ta ta ni va ka ŋgenɗi lay. Asi mbuɗ saa cocoo. Gola nam ka mal vun zira kolo kay ndaraɗta kiɗi lay. Asi yow vun goŋga ay mbay malaɗ ki na ni fi mul masina ki gi ga duk ndaŋgara miɗiya.

²⁶ Hu li ma asi vi yasi juɓ tu nana ni, Ehud pii ni na gaw may. Nam calaɗ ki kay liisi ma li ɓivunna maŋ fulina, tuɗ irim ha ki hu mbassa Seirra na.

²⁷ Hu li ma nam tew vo may ni nam bu tokolomma kay ɦinira Efrayimba. Suu Israelna ɗiŋ ay ki ga kay ɦinira u namu. Nam ay fokosi a ŋgol masira may.

²⁸ Nam dasi ana, «Tuɗugi ay unu, kay Yawe ɦagi suu babali magisina, suu Moabma, ki kogi wa.» Asi tuɗ ga um halaŋ. Asi tuɗ buu ki fun voo lumma Yurdanna ma suu Moabma taɓa huna, ka hin sa a taɓa lum ma Yurdannaɗi.

²⁹ Hu coki ndaɗta, asi ci suu Moabma va ma buɓ buɓ doogo ni njufiina ni suu vokŋa bigawlagina sak sak. Sa ma suɗ ka ki na dewɗi.

³⁰ Hu li namma ni suu Moabma hoŋ ga u suu Israelna, mbassa vi suu Israelna fi heɓpa ii basara dok-kalavandi.

Samgar

³¹ Hu li ma Ehud miɗ kina, sa ma varakamma ni Samgar, ma goŋ Anatna. Nam ci suu Filistinna suu njufiina na kis kis karkiya. Casi ni u njewɗekka dik u mbutlina ɦawaa. Nammi sa ma suɗ suu Israelna kina may.