SUU KAƁAKŊA 21 - Boy Lonana

Njaf suu vi Benjaminna hoŋ kolo balamasiya

¹ Hu li ma suu Israelna ay hu Mispana, asi suu tasi ki ana, «Suu Israelna halaŋŋi sa ɦal goorom a ɗum maŋ njaf suu vi Benjaminnaɗi.»

² Suu Israelna mbay hu Betel hu li namma asi lak ga maɗii day ta ta fiɗigiya fok Yawe. Asi tiira, hurusi haɗ cocoo.

³ Asi di ana, «Yawe Lona vi suu Israelna, deera vi suu Israelna ta dew cemi ka dukumiɗi ni kay mege?»

⁴ Vini maɗiira ni suu Israelna min givin ma togolla hu li namma. Asi li ɓivun ma ŋgalam ki ŋgalina u ɓivun ma mbaa heɓpa.

⁵ Suu Israelna di ana, «Duk njaf suu Israelna halaŋ, njaf suu tuɗ ay ka kolo hu tokka fok Yaweɗina ni suu taarage?» Hu li namma asi suu ki ana, «Suu tuɗ ay ka hu Mispa fok Yaweɗina, casi ki ciya.»

⁶ Suu Israelna wi hahaw gorsesi suu vi Benjaminna. Asi di ana, «Cemi ni dee suu Israelna njaf suu taa ka dukuygiɗi dew.

⁷ Suu hin ka iirina aygi hin li ni yal me a fasi boyogina usira nige? Aygi suu taygi ki fok Yawe ana aygi ka ɦasi goryoygi a ɗumbaɗi may nige?»

⁸ Asi joɓ tasi ana, «Duk dee suu Israelna ni sa ma tuɗ ay ka hu tokka fok Yawe hu Mispaɗina ni gege?» Asi fi ni ana dee suu vi Yabesna ay hu mbassa Galaadta ni sa mba ka hu tok ndaɗtaɗi.

⁹ Hu li ma suu Israelna ndum tasi kina ni asi fi ni ana dee suu vi Yabesna suu cuki hu Galaadna sa ay ka dukusi dewɗi.

¹⁰ Suu tokina sunusi asgaarina ha egesi na 12.000 dasi ana, «Tuɗugi tuɗ cagi suu Yabesna suu hu zi ma Galaadna ha kiyo, boyogina u kem gorira halaŋ halaŋ.

¹¹ Gola agi hin li ni ko ndal wanda na. Agi ci njufiina u boyogi suu buu ki u njufiinana ki halaŋ, may gorɓii suu jeŋi suu buu ka u sa njuf tuɗina agi hinisi iiriya.» Asi tuɗ li ni ko ndal ndaɗta na may.

¹² Duk suu Yabes suu cuki hu Galaad asina, asi fi gorɓii suu buu ka u sa njuf tuɗina ni na kis kis fiɗi. Asi mbaarasi ay hu kaŋ masina hu Silo, ni hu mbassa Kanaanda.

¹³ Suu taɓi suu Israelna cuk suu vun sunda eg goryoŋ Benjaminna suu ha ki ŋgay u ɦinira Rimmonna. Asi tuɗ dasi ana, «Cemi ni dla ka duk taygi oloɗi.»

¹⁴ Suu vi Benjaminna mbay voo. Asi ɦasi gorɓii suu hinisi ay iiri duk suu Yabes suu cuki hu Galaadna. Na may asi ndak ka kasi belɗi.

¹⁵ Suu Israelna wi hahaw suu vi Benjaminna kay Yawe ɓorowosi taɓ masira dewra ki wa.

¹⁶ Suu ŋgolo suu fok suu Israelna di ana, «Cemi ni ca ka hu njaf suu vi Benjaminna na dewɗi ni, aygi hin lasi ni nanage? Hin faygi boyogina ay maŋ suu hin iirina ni arage?

¹⁷ Aygi mba hal yal ma ɗok njaf suu vi Benjaminna ay ka hin a dee ta vi suu Israelna taa ndi kiɗi.

¹⁸ Na may aygi ka ndak a ɦasi goryoygi a ɗumbaɗi, kay ay suu taygi ki ana sa ma ɦal gooromba maŋ sa ma Benjaminna a cara tana cam kiyo.»

¹⁹ Humusi gasi kay hu basara tew tew ni luu ma vun basara vi Yawena ka hu Silo, zi ma cuki mbayawna vi Betel na, Lebona dali na may ii u maɗiina hu voɗta col ay Betel a tuɗ Sekemba na may.

²⁰ Asi hin ne suu vi Benjaminna ana, «Agi tuɗugi buurugi ha ki ga hu sene gugutluna.

²¹ Agi gologi jiviya, hu li ma gorɓii suu Silona cuk ay ki wa a luuna ni, agi cukugu ay ki kiɗiki, gegelay ni vi go tama kom dew dew a caamba gaw duk gorɓii suu Silo asina. Agi tuɗ vo hu mbassa vi Benjaminda u asi ni na gaw.

²² Lini somoyosi u gorsesina mba kalamiya ni ami hin dasi ana, Ҥawaa, ami cenegiya ɗiligi irigi eg suu vi Benjaminna kay ay ɦasi boyogina ka ki halaŋ hu li ma aygi duu ay u suu Yabesna wanna belɗi. Agi ɦasi goryogi ka u bik kogi a ɗumbaɗi may ni sa ka ndak a di ana agi ɓalak gaɗta agi vi vunugi kaɗta naɗi.»

²³ Suu Benjaminna li ko ndal asi neesira na may. Asi yow boyogina ki usi halaŋ duk gorɓii suu mbay luuna hu Silona, mbaarasi ay ki vo varasiya. Asi hoŋ vo hu mbas masira hoŋ min ɦoŋziisina ki kolo balamamu.

²⁴ Suu Israel suu halaŋŋa gegelay ni hoŋ vo hu mbas mamba mamba hu deera nam col ay hura, kak hu ndaŋga mamba ɦambara.

²⁵ Hu coki ndaɗta ni mul ka kay suu Israelna tuɗi. Gegelay li ni dlara nam minda.