SUU KAƁAKŊA 20 - Boy Lonana

Suu Israelna duu u dee suu vi Benjaminna

¹ Suu Israelna halaŋ ko ndal sa ma dewna na cuk ay ki tok tasiya col ha Dan ta ta Berseba u suu hu mbassa Galaadta halaŋ fok Yawe hu Mispa.

² Muli suu ŋgolo suu fok suunana, dee suu Israelna halaŋ, tok tasi ha hu tokka vi suu vi Lonana, suu wi yal duuna ɦayna na 400.000.

³ Dee suu vi Benjaminna hum ana suu Israelna halaŋ tok ki hu Mispa. Suu Israelna joɓ ana, «Dami ay gige u dlara ci maɗ ndaɗta col ni ana mege?»

⁴ Sa ma Levina ma njuf cara caɗ ki wandara di suu tokina ana, «An kal u caanda hu ɦoŋzi ma Gibeana hu mbassa vi suu vi Benjaminna. An buu ni huwa.

⁵ Suu maliyaŋ zi ma Gibeana mba ndugun njeŋgee, ŋguy yam zi ma ami buuri huna ki na cutl. Asi min a can kiyo, hin van caanda buu u ndaɗu ta ta jakaɗ ki maɗna.

⁶ An tli caanda ay mba ŋgaɗaɗ iriɗ ki duk ɓorowoɗ ha ki maŋ dee suu Israelna halaŋŋi na kay asi li ni dla cora duk suu Israelna, dlara ka u voɗto ɗira.

⁷ Agi halaŋŋi agi suu Israelna hoŋogi dira kay boy namma. Lagi boy namma ni tani gaw lay.»

⁸ Suuna halaŋ yow kolo ko ndal sa ma dewna na di ana, «Aygi halaŋ ca ni sa ma hoŋ vo hu ziim kaɗi, sa ma wi taraŋam kaɗi.

⁹ Gola ni dlara aygi tuɗ laɗ eg suu Gibeanara, aygi tuɗ duurusi ni u paɗ dewna.

¹⁰ Hu dee suu Israelna halaŋŋi, suuna kis ni ay yow ay usi doogo doogo, suuna buɓmi ay yow ay usi kis, suuna buɓ buɓ doogo ni ay yow ay usi buɓ dew may. Suu asina ni suu hin ɦal tlesuu tira ha maŋ suu tuɗ duu Gibeana may. A li njaf suu vi Benjaminna ko ndal dla coosira asi laɗta na may. Asi laɗ ni eg suu Israelna halaŋ.»

¹¹ Suu Israelna halaŋ taɓ u tasi ko ndal sa ma dewna na a tuɗ duu u ɦoŋzi nammara.

¹² Suu Israelna sun suuna ki duk dee suu vi Benjaminna dew dew halaŋ dasi ana, «Dlara ci maɗna ta li dukugi ndaɗta ni taarage?

¹³ Cemi ni agi vi suu may suu li dla cora suu dlasi kaɗi asina ɦamisina ami casi kiyo. Suu ka dukugi hu Gibeana, ami min a tli dla cora ndi kay suu Israelna ndaɗta kiyo.» Suu vi Benjaminna ka min a hum vun gorsesi suu Israelnaɗi.

¹⁴ Njaf suu vi Benjaminna tok tasi hu Gibea, min a tuɗ duu u suu Israelna.

¹⁵ Hu coki ndaɗta suu vi Benjaminna mba hu ɦoŋzi ŋgolona ndum tasi kiyo. Suu wi dla duuna varasi halaŋŋi 26.000. Ni ndum suu hu zi ma Gibea halaŋŋa ka huɗi. Ndum suu kis kis kiɗisiya suu wi duuna ka dukgi lay.

¹⁶ Duk suu asina halaŋ suu duu suu kosi guluna ka duk na kis kis kiɗisiya, duk suu asina gegelay ndak a gik tlimiɗ yamba u gogoyra ni kom ka kal ndoɗokgi.

¹⁷ Suu Israelna halaŋ ndum tasi may. Ndum njaf suu vi Benjaminna ka dukgi. Asi suu wi duuna halaŋŋi 400.000. Ni asgaari suu haɗ dla duuna kina.

¹⁸ Suu Israelna tuɗ hu Betel a joɓ Lona kay a wi ki ana dee suu hin tuɗ gijaŋ duuna u suu vi Benjamin jewna ni dee taarage. Yawe hin manni dee suu vi Yudana.

¹⁹ Suu Israelna yow kolo maɗii na feɗet tuɗ buu ga ŋgoo Gibea na tok.

²⁰ Asi cuk tasi a duu u suu vi Benjaminna u irisira kaay palaŋ palaŋga na tew tew may, tuɗ ndug Gibea.

²¹ Suu vi Benjaminna cuk ay ki hu Gibea. Buu ma jewna ni asi ci u suu Israelna na 22.000.

²² Suu Israelna hoŋ tok tasi olo, hoŋ ɓorow irisi ki gadla gadla olo, tuɗ njaa hu liisi ma asi buu ay fok jew huna.

²³ Suu Israelna tuɗ kolo tii tasi fok Yawe maɗii day ta ta fiɗigiya. Asi hoŋ joɓ Yawe ana, «Ami ndak a hoŋ tuɗ duu u gorsemi suu vi Benjaminna olo su?» Yawe hoŋosi dira ana, «Tuɗugiya, duurugi u asiya.»

²⁴ Hu buu ma mbana ni suu Israelna mbay ndug tasi u suu vi Benjaminna olo.

²⁵ Hu buu ma mba' namma suu vi Benjaminna cuk ay ki may, mbay ŋgafasiya. Asi ci u suu Israelna 18.000 olo. Ni suu wi yal duuna halaŋ.

²⁶ Suu Israelna u suuna halaŋ tuɗ kolo hu Betel. Hu li namma asi mol ga tii fok Yawe. Asi li laara hu buu namma ta ta tew fiɗigiya. Asi li ɓivun ma ŋgalam ki ŋgalina u ɓivun ma daŋŋa zeɗ zeɗna, ɓivun ma mbaa heɓpa fok Yawe.

²⁷ Suu Israelna joɓ Yawe. Hu li namma ɗaŋŋi, Zandukka vi Yawera ka tini huwa.

²⁸ Pinhas, goŋ Eleazar ma goŋ Aaronna, ka coli fokoɗu. Asi di ana, «Ami ndak a tuɗ duu u suu vi Benjaminna olo su? Ɗowba ami hin dla ndaɗta su?» Yawe hoŋosi dira ana, «Tuɗugiya, kay vini wanni an hinigisina ki hu duk kogiya.»

²⁹ Suu Israelna buu suu masisina ki kay zi ma Gibeana, ŋgufum ki halaŋ.

³⁰ Hu buu ma hindina ni suu Israelna tuɗ a duu u suu vi Benjaminna. Njaa tasi ki ni ko fok jew dayra na olo.

³¹ Suu vi Benjaminna cuk ay ki a ŋgafasira may. Asi tuɗ ha ki na day eg zi ma Gibeana, gijaŋ a ci suu Israelna ko fok jewra na, ci ki usi na dok-hindi, ii hu voɗta tuɗ Betella na. Suu hiniŋŋa ha ii Gibea na may.

³² Suu vi Benjaminna ɓak tasi ana, «Gola aygi hin casi ni ko fok jewra na olo.» Suu Israelna ɓak tasi ana, «Piiriygiya, mbaɗasi ay ki day eg zina tuwa.»

³³ Suu Israelna liŋ ay ba ba mba njaa tasi ki ni Baal-Tamar. Suu Israel suu ay u fiɗiginana ndug Gebea na gaw may.

³⁴ Suu duu suu Israelna suu buɓ buɓ doogona mba tew Gibea may. Duuna vi kasi cocoo. Suu vi Benjaminna ka wi ana ɓaraŋga a vasi karamiraɗi may.

³⁵ Yawe ci suu vi Benjaminna ki fok suu Israelna. Hu buu namma suu Israelna ci suu vi Benjamin suu wi duuna ɦayna na 25.100.

³⁶ Suu vi Benjaminna wi ki ana asi ti suu Israelna wa. Suu Israelna hin duu ma duurum u asina kay asi wi ki ana zi ma Gibeana ha ki ni tli ko suu masisina.

³⁷ Suu ay buuri ga asina cuk hu ɦoŋzi ma Gibeana to zina kiyo, ci suuna coco may.

³⁸ Suu ka buuri ga asina vi vunusi duk tasi ana hu li ma asi tli zina wa ni gi kura li ndoosna kolo a tak kira.

³⁹ Suu Israelna jew ni ganyam suu vi Benjaminna, hinisi asi ci maɗna usi na dok-hindi. Suu vi Benjaminna di tasi ana, «Gola aygi hin casi ni ko fok jew dayra na olo.»

⁴⁰ Na may ndoos kura col ay kolo hu ɦoŋzina a tak kira. Hu li ma suu vi Benjaminna hoŋ ay liŋŋa daganna, gola ni ndoos ku zina wul kolo wan.

⁴¹ Suu Israelna lasi ni mbeleŋ ma dikisina. Suu vi Benjaminna ndi ga fokosi wa kay asi wi ki ana ɓaraŋga hoŋŋi kasiya.

⁴² Asi tin irisi liŋŋa fok suu Israelna ŋgoo bagi hu fulla. Na may yara tasi wa, suu ŋgafasi ay fokosina casi ay voɗ gak may.

⁴³ Suu Israelna ŋguf suu vi Benjaminna casi ta ta tuɗ tinisi ha ki ŋgoo Gibea ii u maɗiina na.

⁴⁴ Suu may suu duu suu vi Benjamin suu wi dla duuna ɦayna, suu ɦiŋ cocona casi ki ni ko ndaɗta na. Asi halaŋŋi 18.000.

⁴⁵ Suu vi Benjamin suu daŋŋa pii irisi ŋgoo bagi hu fulla a tuɗ hu Rimmon na. Dukusi ni suu ta buɓ buɓ vadl ni casi ki duk hu voɗta. Asi dik u suuna hinna gak gak tew hu Gidom, ci suu ki hu buɓ buɓ doogo olo.

⁴⁶ Ndum asgaa suu vi Benjaminna suu basi hu buu nammana halaŋŋi 25.000. Ni suu ɦiŋ suu wi duuna ɦayna halaŋ halaŋ.

⁴⁷ Na lay ni suu kis kis karkiya suu pii tin irisi u ɦinira Rimmonda nana hin suɗa. Asi lak u ɦini ta Rimmon ndaɗta gak gak tilna fiɗi.

⁴⁸ Suu Israelna hoŋ ay kay njaf suu vi Benjaminni casi kiyo, cuɗusi usi ki hu ɦoŋzina na dew dew halaŋ halaŋ. Ci suu warna lay, yoorina lay, tlesuu asi fasi fokosina halaŋ. Olo ni asi ŋgal ɦoŋzi ma fasi huna ki halaŋ lay.