SUU KAƁAKŊA 2 - Boy Lonana

Sa Sunda vi Bu Suuna di suu Israelna kay poy masira cora

¹ Sa sunda vi Yawe col ay hu Gilgal mba hu Bokim di ana, «An cukugi ay ki hu mbassa Egiptera. An mba selegi ki hu mbassa an suu tan vi vunun kaɗ u somoyogira. An di ana, an hin fokŋi ka bus galam manda an vaɗ u agira kiɗi.

² Agi may ni ka vagi banara u suu cuki hu mbas ndaɗta jewnaɗi, agi toosi givin ma togolla masi kiyo. Agi may ni min ka a humun boy mannaɗi. Agi a lagi na ni dla mege?

³ An hin ɓak tan ana, na ni an ka dikigi suu asina ki fokogi oloɗi. Asi hinni a suu ganagi yagina. Agi hin cuk kaŋga hu ganyam masira, hin goɓosi fuli masisina lay.»

⁴ Hu li ma sa sunda vi Yawe vunum ndi ga may ni, suu Israelna tum tiina na halaŋ halaŋ. Asi tii cocoo.

⁵ Asi tin sem li namma ana Bokim. Hu li namma gaw ni asi li ɓivunna maŋ Yawe.

Miɗ ma Josuwe miɗna

⁶ Josuwe dik suu Israelna gegelay ni tuɗ hu mbas mamba nam ɦambara.

⁷ Hu li ma Josuwe ka iirina ni suu Israelna halaŋ sun Bu Suuna. Suu ŋgolo suu wi dlara mbuɗ mbuɗta Yawe laɗta suu hin ka ŋgoo Josuwe daganna, asi sun Yawe u asi jivi lay.

⁸ Josuwe ma goŋ Nunna, sa ma sun Yawena, miɗ ni basaɗam li kay ndaŋgara halaŋŋi kis duk doogo.

⁹ Asi pammi hu mbas mamba ɦamba a joommara hu Timnat-Heres duk ɦini mayra vi suu vi Efrayimma, mbayaw keŋ ɦinira Gaassa na.

¹⁰ Suu basi asina halaŋ cuk ga u somoyosi wa, gor ŋgologi masi suu hin kana varak yow kolo ni asiya. Na may asina ka wi Yaweɗi, ka wi dlara mbuɗ mbuɗta nam laɗ ay u somoyosiraɗi lay.

Suu Israelna noy Bu Suuna kiyo

¹¹ Suu Israelna li dlara ka ii Yawe jiviɗira, asi gijaŋ a sunni Baalgina.

¹² Asi noy Yawe, Lo ma vi somoyosina kiyo, ma cukusi ay ki hu mbassa Egiptera. Asi pereɗ iirisi ki u loogi suu vi suu ɦawana, suu may suu ŋguyusina. Asi goɓ ga fokosiya. Asi ɓalak huu Yawe kiyo.

¹³ Asi noy Yawe kiyo. Asi sunni Baal u Astart.

¹⁴ Yawe hurum ɓeŋ ki egesiya. Nam hinisi ki ko suu ɦurum tlena vi suuna asi ɦurumusi kiyo. Nam gususi ha ki ko suu babali masisina suu ŋguy kasina. Saɓakasi ma col eŋ fok suu babali masisina ka oloɗi.

¹⁵ Asi tuɗ aragelay ni ko Yawe ha kasi a tinisi dlara cora kasira ko nam Yawe di ay ki fok jew suu tam kira na. Yoo masira mbuɗ ŋgol cocoo.

¹⁶ Yawe hin manasi Suu Kaɓakŋa fokosi a buɗusi ki ko suu ɦurumusina.

¹⁷ Suu masi suu kaɓakŋa lay ni asi ka humusi vunusiɗi, kay asi tin irisi ki ni u loogi suu ɦawana na ɗow, goɓosi ni asiya. Asi viɗ tasi ki na zak, hin voɗta somoyosi tlaɗta kiyo. Somoyosi hum ay ni gaɗta vi Yawera. Asi may ni ka min a li ko asi naɗi.

¹⁸ Hu li ma Yawe manasi suu kaɓakŋa fokosina ni, Bu Suuna ka u sa ma kaɓakŋa hu li nammana. Nam buɗusi ki ko suu babali masisina hu li ma sa kaɓakŋa ka iiri tuna halaŋ. Kay Yawe humusi tii masi ma ko suu babali suu ka lasasina. Yawe humusi yoo masira.

¹⁹ Na may hu li ma sa ma kaɓakŋa namma miɗ ki wa ni asi hoŋ hu dlaasira cora gaw, co sura vi somoyosira olo. Asi tuɗ irisi u loogi suu ɦawana sunusi lay, goɓ ga fokosi lay. Hu poy masira ni va ma asi saŋam ka na dewɗi.

Lona tuk suu Israelna

²⁰ Yawe hurum ɓeŋ ki eg suu Israelna. Nam di ana «Njaf suu asina ɓeŋ galamba an vaɗ u asira ki wa. Galamba an tiniɗ ay u somoyosi dayra. Asi min ka a humun vununɗi.

²¹ An may ni ka min a dikisi suu babali masisina ha ki fokosiɗi. Njaf suu ɦawa suu Josuwe hinisi kana halaŋ.»

²² Hinisi ni kay a tuk suu Israelna u asira, kay a wasi ki ana asi ka li u voɗta vi Yawera ɗowba ɦa wa sura? Asi ka tuɗ hu voɗ ndaɗta ko somoyosi lira na may su?

²³ Yawe hin njaf suu ɦawa asina ka dukusi bay dikisi kiyo, nam ɦasi ay ka ki ko Josuweɗi.