SUU KAƁAKŊA 19 - Boy Lonana

Suluk ma vi dee suu vi Benjaminna

¹ Hu coki ndaɗta ni suu Israelna mul ka kasiɗi. Sa ma Levi maa dew cuk ziim ha ki dogoo ŋgoo ɦinira Efrayimba na day. Nam ɗum cara dew ko cara mbara na ay ni Betlehem.

² Caam ndaɗta ka hum umbi. Garak duk tasiya ndaɗ pii vi buɗu li tilna ha ki hu na fiɗi hu Betlehem hu mbassa Yudara.

³ Njufuɗ tuɗ ha uɗ a vaɗ yara, tayaɗ ay vo may. Nam tuɗ ni u tam ha saam ma sunda u koora usi mba may. Caamba vam vo vi buɗu. Kunumma wam na ni mba ŋgafam u furira cocoo.

⁴ Kunum ma bu caambana vam koyra vo varam ta ta buuna hindi. Nam tiya, ci lay, buu lay.

⁵ Hu buu ma fiɗina ni asi yow kolo maɗii feɗet. Sa ma Levina min tam a tuɗ vora. Kunumma hin dam ana, «Lakagi ti fu funugi na nde ni agi hin tuɗɗi su?»

⁶ Asi lak gaa ti lay, ci lay ko tasi u kunumma dew. Kunumma hin dam ana, «Vi taŋ kemmi buu hu dew, ɓalak huruŋgi.»

⁷ Sana min tam ki a tuɗta may ni kunumma yam egem gak gak nam ka gin a minɗi lay ni, hin buu hu li namma.

⁸ Hu buu ma vadlna ni nam coli kolo maɗii feɗet a tuɗta. Kunumma hin dam ana, «An ceneŋu ti va funuŋ ew tuwa. Basaɗagi egen tuwa.» Asi ti ko tasi halaŋ.

⁹ Sana min tam ki a tuɗta, namu, caamba u saam ma sunda may. Na may ni kunumma, bu caamba, hin dam ana, «Gola faɗta cemi ni leŋ ki wa. Agi ka juɓ maɗiira tuɗi su? Ɓalak huruŋgi, vin maɗii ni agi hin tuɗa, aŋ hin fi ziiŋu.»

¹⁰ Sana ka min a buu oloɗi. Nam col kolo gi tamu u caamba kor mamba mbara u tlena mini kaɗna may. Asi mba tew vok zi ma Jebusna na, ni hu Yerusalem.

¹¹ Hu li ma asi tew eg Jebus na tokŋa ni, faɗta kali cocoo. Sa Sunda di sa ŋgol mamma ana, «Baygi cukuygi vi suu Jebusna tani, buuruygi huwa.»

¹² Sa ŋgol mamma hin dam ana, «Ay ka ndak a col vi suu asinaɗi kay asi ni ka njaf suu Israelnaɗi. Ay tuɗuygi ta ta hu ɦoŋzi ma Gibeana.

¹³ Baygiya, tiniygi iriygi ha hu ɦoŋzi maa dew ni buuruygi huwa. Aygi tuɗ buu ni hu Gibea ɗowba hu Rama.»

¹⁴ Asi tuɗ gak gak tuɗ na day ni faɗta hal a ɗikka may, asi mba ki tok eg Gibea hu ɦoŋzi ma vi suu Benjaminna.

¹⁵ Asi hoŋ irisi a tuɗ buu hu Gibeara, sa ma Levina kal ha voo tuɗ kak hu li ma sukŋa. Sa ma min a vam vo varam kaɗi lay.

¹⁶ Gola ni sa ma maana ay ŋgoo bagi hu sene mamma, mbay voo. Sa namma ni sa ma kay ɦinira Efrayimba. Nam ki cuki zina ni hu Gibea may. Suu maliyaŋ zi namma ni dee suu vi Benjaminna may.

¹⁷ Nam gol irimu ni wi koyogina ki laki hu li ma sukŋa ca. Sa ma maana joɓosi ana, «Agi tuɗ ni arage? Agi col ay ni arage?»

¹⁸ Asi hoŋom dira ana, «Ami col ay ni Betlehem hu mbassa Yudara. Ami tuɗ ni hu zi ma ha ki dogoo ɦinira Efrayimba wanna. Anni sa ma hu zi nammana. An ay ni Betlehem hu mbassa Yudara. Cemi ni an hoŋi voo. Sa ma min a van vo varam kaɗi.

¹⁹ Doli ɗi ni, ami u haɗ ma ɦal maŋ kor mamirana kami lay. An ka u fuunna u sum veŋ manna kan lay, maŋ caaŋga sunda lay, maŋ saaŋ ma sunda wanna lay, haw va ma cami kaɗi.»

²⁰ Sa ma maana hoŋ dira ana, «Ko heɓpa li u aŋu. An ndak a goloŋ hu buu ma dew namma. May ni aŋ ka buu ki hu li ma sukŋa taniɗi.»

²¹ Nam cukusi vo varamu, cuk haɗna fun korra may. Koyogina mbus sesi kiyo, ti lay, ci lay.

²² Hu li ma asi laki koɗ tasi na ni, gola ni suu dlasi kaɗi suu ɦoŋzinana mba ŋguy zina ni na gaw. Ci vun grekŋa eŋga di sa maa ma malaŋ zina ana, «Gami sa ma kal varaŋ wanna ay ki kiɗiki, ami min buu u namu.»

²³ Malaŋ zina kal ay ki mba dasi ana, «Ҥawaa, gorsenna an cenegiya, lagi dlara co ndaɗtaɗi. Sa namma kal ni varanu. Agi ka lam dlara co ndaɗta egembi.

²⁴ Gola goonda ka vo jeŋiya, bay buu u sa njuf tuwa. An gagira ay ki kiɗiki, agi ɓalakaɗ ni ndaɗ na ɗow. Lagi dlara hurugi miniɗta u ndaɗu. May sa ma kal vo varan wanna, agi ka lam dlara co ndaɗta egembi.»

²⁵ Suu asina ka min a humum vunumbi. Sa ma Levina vi caamba kemmi gasira ay ki kiɗiki. Asi vaɗ kemmi varak tasi kaɗ na varak varak ta ta fo maɗiira u ndaɗta tew ŋgarapii may ni asi hiniɗ taɗ gi ga nja kosi ni na gaw.

²⁶ Maɗii feɗet ni cara mba zuɗ ga vun grekŋa ni na lunjuk gaw fun zi ma njufuɗ ka buuri huna ta ta maɗiira fooɗ gi huwa.

²⁷ Njufuɗ coli kolo maɗii feɗet mal vun grekŋa ay kiyo, min a tuɗ vora, gola ni fi caamba gii ga vun grekŋa si. Koɗ baari huruɗ ɦawa na.

²⁸ Nam daɗ ana, «Col kolo, tuɗuya.» Cara ka hoŋom diɗi lay. Nam tlaɗ kolo kay korra tani, gi tam ay vo ni na gaw.

²⁹ Mba tew vo varam may ni, nam vi caamba, ŋgaɗaɗ kiyo, ɓorowoɗ dokoɗ ki duk na doogo yam mba', sunuɗ dokoɗ ha ki kay yam mbassa vi suu Israelna na halaŋ.

³⁰ Suuna halaŋ gegelay wi dla ndaɗta na ni joɓ tasi ana, «Dlara ko ndaɗta na li ka ɦoyɗi. Sa wi dlara ko ndaɗta na ka dewɗi lay. Tin ay hu li ma suu Israelna cuk ay ki hu mbassa Egiptera day ni sa wi dlara na ka dewɗi.» Sa ma Levina di suu nam sunusi dok cara ha ki dew dewna ana, «Dagi suuna gige col ay hu li ma suu Israelna cuk ay ki Egiptena ni agi wi dlara ko ndaɗta na dew su? Saaragi kay dla ndaɗta, di boy ma hurugina ay may.»