SUU KAƁAKŊA 18 - Boy Lonana

Mika u njaf suu vi Danna

¹ Hu coki ndaɗta ni suu Israelna mul ka kasiɗi. Suu vi Danna ka hal mbassa cuk zina may kay hu li namma ni asi bay fi mbas taa ki kosi kay tasi duk suu Israelna tuwa.

² Goryoŋ Danna sun suuna ay na vadl, suu hu njafasi suu wi dla duuna ɦayna, dasi ana, «Tuɗugi gologi yam mbassa.» Suu asina yow ay ni hu Sora u Estaol. Asi poy ni a wi mbassa ki jivira. Suu vadl asina mbay kay ɦinira Efrayimba, mba cuk hu zina vi Mika, buu ni vo varamu.

³ Hu li ma asi tew tok eg ziŋ Mikana ni asi hum del sa ma Levina. Asi ɦuɗ tasi ay egem dam ana, «Sa ma mbaaraŋ ki tanina ni gege? Aŋ li ni me ki hu li namma nige? Sa ma vaŋ ki kom tanina ni gege?»

⁴ Nam hoŋosi dira ana, «Ni Mika. Nam tinin ka a li dlara ni nana. Cemi ni nam tlanu, an mbuɗ ki ni a mul mam ma li ɓivunna.»

⁵ Asi hin dam ana, «Joɓ Lona kami gige, koyra ami tuɗuɗ wandara na ni kami jivi su?»

⁶ Mul ma li ɓivunna dasi ana, «Tuɗugi u heɓpa, koyra agi tuɗuɗ wandara ii Yawe ka cuki kagiya.»

⁷ Suu vadl asina jak foko tuɗ hu ɦoŋzi ma Laisna. Suu Laisna laki jivi u heɓpa ko ndal suu Sidonna na. Asi laki jiviya, va ma ŋgenesi kaɗi lay. Mul ma ɦeɓesi kaɗi lay. Sa ma ɦuɗ tam ay egesi a kak mul kasi kaɗi lay. Suu Laisna ki cuki ni na day eg suu Sidonna. Asi ka cuki kay saɗi.

⁸ Suu vadl asina hoŋ ay eg gorsesina hu Sora u Estaol. Gorsesina joɓosi ana, «Agi saa ana mege?»

⁹ Asi hoŋosi dira ana, «Yowoygi koloo, tuɗuygi nduguygisina. Mbassa ami waɗ ay wandara ni mbassa jivi cocoo. Agi may ni dagi vaɗi, ɓikigi vun dikigiɗi lay, ka hin a ndaana doorogi a cuk hu mbas ndaɗta a kaki huruɗtaɗi lay.

¹⁰ Suu agi tuɗ fasi huna ni suu heɓ cocoo, voɗta ki malira ni na mbiŋ. Kay Lona ɦagi mbas ndaɗta ki ni hu duk kogiya. Mbas ndaɗta ni mbassa njaf tlena halaŋ li hura. Va ma bay jiv hu kaɗi.»

¹¹ Njaf suu vi Danna yow ay hu Sora u Estaol ni suu duuna halaŋŋi kis kis karkiya.

¹² Asi yow ha ni tuɗ cuk hu Kiriyat-Yerim hu mbassa Yudara kay ndaɗta asi hin yi li namma ana Mahane Dan ta ta cemi. Li namma ni u fiɗigina keŋ Kiriyat-Yerim na.

¹³ Ay hu li namma asi mbay kay ɦinira Efrayimba, mba tew hu zina vi Mika.

¹⁴ Suu vadl suu ay ki hu jew a gol mbassa Laissa di gorsesina ana, «Hu zigini asina ni zi taa dew ni tlesuu teteɗ suu li ɓivunna ka huwa ni agi wi su? Efodna u fuli masina u ɓalaŋŋana may. Cemi ni agi ndak wi dlara agi a laɗta ni agi ɗaŋ.»

¹⁵ Asi tuɗ irisi keŋ na ni, cuk hu ziŋ goozoŋ ma Levina vo vi Mika, joɓom ana, «Aŋ ka nanage?»

¹⁶ Na ni suu duu suu kis kis karkiya suu hu njaf ma vi Danna ŋguy ki vun grekŋa ni na gaw may.

¹⁷ Suu vadl suu ay ki fok jew a gol yam mbassana cuk kalafi yow tlesuu fuli asina ay kiyo, efodna u fulina, ni mul ma li ɓivunna ka ki coli vun grekŋa eg suu asgaarina may. Asi suu kis kis karkiya, asina ka laki ca may.

¹⁸ Suu may suu cuk ay kalafi vi Mikana yow fulina, efodna, fuli ma yoori u doonona u fulina ma ndalina kosi na ni, mul ma li ɓivunna joɓosi ana, «Agi li na ni dla mege?»

¹⁹ Asi hoŋom dira ana, «Seŋ vunuŋ haa, dug koŋ ha funuŋ ni na gaw, tuɗ ay ni umi tani, aŋ mbuɗ ni a bumi may a mul mami ma li ɓivunna may. A aŋ li a mul ma li ɓivunna vi sa ma dewna may, li ɓivunna kay dee suu Israelna soppa may ni iriŋ jivira ni taarage?»

²⁰ Mul ma li ɓivunna boy namma irim jiviya. Nam yow efodna may, tli fulina ma yoorina may, kal duk suu duuna u asi ni na gaw.

²¹ Suu vi Danna cuk tasi ni na gaw, cuk kemba ha foko, yoorina ha kay ceresiya. Suu zii tlena ha ŋgorosi dagan may.

²² Asi tuɗ ay ki eg ziŋ Mikana na day ni, nam min tam ay u suu mamsina liŋ ay usiya.

²³ Nam yi suu vi Danna ay koloo. Asi pereɗ irisi dagan joɓ Mika ana, «Va ma laŋŋa ni mege? Suu uŋ asi cana minni mege?»

²⁴ Nam hoŋosi dira ana, «Agi yowon loogi man suu an minisina ay ni amege? Agi tayan mul man ma li ɓivunna ay lay ni kay mege? Va hin ha ka kon voɗi. Agi hin joɓon ana ni mege ni nanage?»

²⁵ Suu vi Danna hoŋom dira ana, «Ami ka min a aŋ njaɗ ay oloɗi. Aŋ seŋ taŋ ha kaɗi ni suu waŋ dlaaŋga kaa, aŋ hin ba iiri maŋga ki u suu maŋsina halaŋ.»

²⁶ Suu vi Danna yasi kay tuɗ masira gak may. Mika wi ana asi saɓak suumu ni hoŋ ay dagan vo ni na gaw may.

Ҥoŋzi ma vi Danna u liim ma li ɓivunna

²⁷ Suu vi Danna yow tlesuu fuli suu vi Mikana ay yow ni vi mul ma li ɓivunna ay may, asi mba ndug ɦoŋzi ma Laisna, ci suu laki hu u heɓ masirana kiyo, ŋgal ɦoŋzi namma ki may.

²⁸ Mbassa Lais ndaɗta ni hu ɦuɗugumba Bet-Rehobpa ki ni na day eg Sidon, suu huna ka taɓi u saɗi. Kay ndaɗta sa ma mbay a njun kasi kaɗi may. Suu vi Danna hoŋ min ɦoŋzina vi ziisi ki huwa.

²⁹ Asi jok sem zi ma asi yam jew ana Lais namma ki ana Dan u sem busi ŋgolo ma goŋ Yakobma.

³⁰ Asi cuk fuli suu vi Mikana a goɓosira. Yonatan goŋ Gersonna, goŋ ŋgolo Moizna mbuɗ a mul ma li ɓivunna vi suu Danna ni namu. Njaf suu vi Yonatanna hin a li ɓivunna gak gak tew hu li ma suuna yowosi ki ŋgayrana.

³¹ Asi ɗok fuli suu vi Mikana hu liisi ma li ɓivunna ma yam ana ziŋ Lonara Silora.