SUU KAƁAKŊA 17 - Boy Lonana

Mika u liim ma fulina

¹ Sana dew ka cuki duk ɦinira Efrayimba sem ana Mika.

² Fali taa dew ni nam di sum ana, «Humuk gak kay gursu doonora kis kis doogo yam dew ta asi kulukka wanda, doono ndaɗta ka konu. Anni sa ma tli gursu ndaɗtana.» Sum di ana, «Goonna, ko Lona, Yawe, paɗ vunum ki kaŋu.»

³ Mika hoŋ gursu doonora kis kis doogo yam dew ndaɗta maŋ sumu. Sum hin dam ana, «An u tanda hin doono ndaɗta ki ni maŋ Yawe ni kay gooronna a yoo foto lona u doonona. An tuɗ cemi ni ɦamba.»

⁴ Hu li ma nam ɦal doono ndaɗta maŋ summa ni, ndaɗ yow kis kis mba, tuɗ ɦam maŋ sa ma yoo tlena. Sa namma hin yooroɗ fulna, laɗ fotona u doonona may, mba tin va namma hu zira vi Mikara.

⁵ Sa namma yam Mikana, nam tin ɦinira ceɗina vo varamu hu liim ma li ɓivunna. Nam min efod dew u ful ma daŋŋa may, vi goorom maa dew mbuɗum a mul ma li ɓivunna fokomma may.

⁶ Hu coki ndaɗta ni mul ka kay suu Israelnaɗi. Gegelay li dlaamba ha vo kay tammi u min mamba.

⁷ Sa ma hu dee Levina dew ka ki cuki ŋgayra hu mbassa Betlehemba hu ɦoŋzi ma Yudana.

⁸ Sa namma kal ay ki hu Yuda, hin mbassa Betlehemba, jok um ki a tuɗ hal li ma ŋgay ma daŋŋa. Nam mba kay ɦinira Efrayimba. Nam tuɗ ay na ni mba ndi ni kay zi ma vi Mikana.

⁹ Mika joɓom ana, «Aŋ col ay ni arage?» Nam hoŋom dira ana, «Anni sa ma Levina col ay Yuda hu mbassa Betlehemba. Anni hu voɗta tu a hal li ma zina a cuk a ŋgayna.»

¹⁰ Mika hin dam ana, «Li ni na ni aŋ kak varan gawɗi su? Aŋ hinni a bun may, a mul man ma li ɓivunna may. Hu basara dew ni an ɦaŋ sili doogo doogo, ɦaŋ baraw ma cuk taŋŋa may, ɦaŋ tina may.»

¹¹ Sa ma Levi namma vi kam a kak vi Mikara. Nam gol sa namma ni ko ndal goryom na may.

¹² Mika ɦal sunda maŋ goo namma. Goozoŋ namma mbuɗ ki ni a mul mam ma li ɓivunna. Nam kakŋi vo hu zina vi Mika.

¹³ Mika hin di ana, «An wi kan ana Yawe hin lan dlara jivira egenu kay ana sa ma Levina ka varan a mul ma li ɓivunna.»