SUU KAƁAKŊA 16 - Boy Lonana

Samson tuɗ ki hu Gaza

¹ Samson tuɗ hu Gaza. Nam i kal vi cara gawlaŋga, nam buu u ndaɗu.

² Suu nde ndeŋŋa di suu Gazana ana, «Samson kal ay ka tani.» Asi ŋguy ki kamu, ka juɓum vun grek ma ɦoŋzinana njeŋge halaŋ. Njeŋge tew tew ni asi lak na en ka ɓak tasi ana, «Juɓuygi maɗiira fo ki wa ni aygi cam kiyo.»

³ Samson buuri mam ga si, tew duk ŋgikka may ni nam col kolo mba vun grekŋa, kus vun grekŋa ki, tlam kelem tuɗ ta ta gam ha ki kolo kay ɦinira vok taɗ u zi ma Hebronna nara.

Dalila gi u Samson kiyo

⁴ Ŋgoo dla ndaɗta ni Samson min goo ta dew a cara, seɗ ana Dalila. Ndaɗ cuki ni hu ɦuɗugumba Sorekka.

⁵ Muli suu Filistin suu vadlna mbay eg Dalila daɗ ana, «Ganyam Samson joɓom ana, saɓak mamma col ay saɓaki na ni arage? Ami li a vamu ni hin li ni ana mege? Ami min maŋam ki vam ɗagamu. Ndak li dla ndaɗta wa ni ami hin warakaku, mul ma dewna ɦak gursura doonora kis kis doogo yam dew.»

⁶ Dalila di Samson ana, «Gan u dla mayra saɓakaŋ cocora saɓaki nara ay ki gege? Lini sana a maŋaŋ ki ka saɓak maŋ ma namma li oloɗira ni li ni ana mege?»

⁷ Samson daɗ ana, «Lini sana ɗagan ga wa u zew mbuurura ma ŋgolomma na kiɗisiya ni an mbuɗ ki maŋi ko ndal suu hiniŋŋa na may.»

⁸ Muli suu Filistinna ɦaɗ zew ma wili ŋgolom namma ay na kiɗisiya. Dalila ɗagam ga u zew namma.

⁹ Suu a vamma buu ni ŋgoo ziimba gaw may. Ndaɗ yam kolo di ana, «Samson, suu Filistinna ka day ay kaŋu.» Nam njaa zew namma ki ni ko ndal zew ma ay ki ŋgali u kura ɦawa na. Ni asi bay fam dlaamba nam li saɓakŋa u ndaɗta tuwa.

¹⁰ Dalila di Samson ana, «Aŋ ganan yanni gani ɦawaa. Aŋ danni dlara kaboyna. Cemi ni dan gasi dla mayra aŋ hin mbuɗ ki maŋi ko suuna na mayra ay ki ɗaŋgi su?»

¹¹ Samson hin daɗ ana, «Lini sana njunun u zew ma paari wili ma sa li sun ka u nam tuɗina wa ni, an mbuɗ ki maŋi ko ndal suu daŋŋa na may.»

¹² Dalila yow zew ma wilina ɗagam kaŋga hin dam ana, «Samson, suu Filistinna ka vaŋu.» Suu a vamma ni kalafi usi gaw. Nam njaa zew ma ɗagi komma ki ni ko ndal barawra paarira ɦawa na.

¹³ Dalila di Samson ana, «Aŋ hin dan dlara gasira ni saɓage, ta ta cemi ni aŋ danni dlara kaboyna. Dan ay gige a njunuŋga ni laŋŋi ana mege?» Samson daɗ ana, «Lini ndak cilin yanda gi kiɗisiyara ki wa, dlaɓaɗ dukuɗ u va ma cil baraw damba, njunuɗ ki ga u galina vi sa ma cil barawna may ni an mbuɗ ki maŋiya, hin ki ni ko suuna ɦawa na may.»

¹⁴ Ndaɗ maaram senna, gam yam ki kiɗisiya, laɗ iriɗ ki u va sak yamba njunuɗ ki u galina may hin dam ana, «Samson, suu Filistinna ka vaŋu.» Nam dliɗ ay kolo ii senna, paɗ va sak yamba kiyo, njaa galina ki may.

¹⁵ Dalila dam ana, «Aŋ hin di ana aŋ mininu, huruŋ ka u an dewɗi may ni nanage? Gola aŋ mbaɗan ki yaŋ ca ni hindi. Aŋ ka min a takan va ma aŋ li saɓakŋa coco u nam wanna kiɗi lay.»

¹⁶ Hu li ma ndaɗ ka loɓom tam hu buuna tew tewna, Samson ana, mariyaɗ ni nam miɗ kiyo.

¹⁷ Samson ɦal hurum ki maɗ halaŋ, hin daɗ ana, «An wanni sa tinin vel ka kay yan ɦoyɗi, kay ɦan ki maŋ Lona ay ni huu sun day. Lini sa welen yan ki wa ni saɓakan namma ka li egen oloɗi. An hin mbuɗ ki maŋira ni ko suuna na may.»

¹⁸ Dalila wi ana nam daɗ ki ni gasira ni ndaɗ sun kay muli suu Filistinna dasi ana, «Mbaagi ay ɗaŋ, wandara ni nam mal hurum ki egen wa.» Muli suu Filistinna mbay vo varaɗu, asi mbay ni u gursura kosi gaw.

¹⁹ Ndaɗ maa Samson senna ɓalaɗu, yi sana ay mba kaaram yamba gi kiɗisiya ndaɗta kiyo. Nam gijaŋ mbuɗ ki maŋira, saɓak mam ma ay egem namma kal ki ni na gaw.

²⁰ Dalila dam ana, «Samson, suu Filistinna ka vaŋu.» Nam dliɗ ay ki kolo ii senna di ana, «An min suɗ tan ki ko ndal jewra na.» Doli nam wi ka ana Yawe ɦuɗ tam ki egem wara kaɗi.

²¹ Suu Filistinna vam kemmi, coom irim ki dlaɗ jak. Asi tuɗ ga u nam hu Gaza. Njunum u galina mba', gam a luɗ fuɗta a nam pereɗ ɦinira luɗna hu daŋgayna.

²² Hu li ma asi kaaram yam kina, tlimiɗ yam gijaŋ ɗuffa ay may.

Sa sukul ma daɓ daganna u miɗ ma Samson miɗna

²³ Muli suu Filistinna tok tasi a li ɓivunna maŋ loosina Dagon, a li furira may. Asi ɓak duk tasi ana, «Looygina ɦaygi Samson saaygi ma babalira ki hu duk koygi wa.»

²⁴ Suuna wi Samson na ni, asi ŋga loosina di ana, «Looygina ɦaygi saaygi ma babalira ki hu duk koygi wa, nammi sa ma bulumuygi mbas maygira kina, sa ma caygi suu maygina ki cocona.»

²⁵ Hu li ma asi ka furi coco nana, asi di ana, «Yagi Samson aya. Nam mbay laygi dlara sanda nde.» Asi sun ana tuɗ hal Samson ay hu zira daŋgayna. Suuna wam na ni, furi cocoo. Asi mba colom ki eg garak ma duk gayra hu ziŋ loosinara.

²⁶ Samson di gogoo ma taɗamma ana, «Taɗan haa, tinin kon eg garak ma dukŋa ma zira coli kamma, an gis tan huwa.»

²⁷ Huu Ziŋ Lonara ki oy u suuna njufiina u boyogina, muli suu Filistinna ka kalafi hu halaŋ lay, laki kay yam zira mbuyra suuna ni va ma buɓ buɓ hindi, njufiina u boyogina suu mbay a san u Samsonna.

²⁸ Samson cen Yawe di ana, «An ceneŋu, Bu Suuna Yawe, humuŋ gaŋ ay kanu, mbuɗ balaman saɓaki kay an a sa sukulun u suu Filistinna karam dew ni a fafaɗta Loonna. An sa sukulun ni kay irinda mbara.»

²⁹ Samson hin lam garak ma duk gayra hu zira mba' namma. Nam gis tam eg ma dew may vi ma hiniŋŋa ay kom ma guluna may, ma mbana kom ma njufna gaw may.

³⁰ Samson di ana, «Ko an miɗ ko tan u suu Filistinna dew.» Nam dlaɗ garakŋa ay na ni, zira bow kay muli suu Filistinna u suu molina halaŋ. Suu nam casi hu miɗimma bolow su suu may suu nam casi u iiri tamma.

³¹ Gorsemma u suu vi bumma mbay tlam ki tani tuɗ pam ha ki kolo duk ɦoŋ gi Sora u Estaolna, ni hu zulla vi bum Manoara. Samson kaɓakŋa maŋ suu Israelna ni basara dok-mba'.