SUU KAƁAKŊA 15 - Boy Lonana

Samson sa sukulumu

¹ Buu dagan na nde tew hu til ma feɗ wa blena may ni, Samson tuɗ a gol caamba, mbay u goo ɦuna umu, joɓ kunumma ana, «An min a kal vi caanda hu liiɗ ma buuna.» Na may kunumma hinim ka a kal voɗi.

² Nam di Samson ana, «Na daŋ may an ɓak tan ana aŋ huruŋ ki ni ɓalaki egeɗu, an ɦaɗ ki maŋ gogoo maŋŋa sunuŋŋa wa. May ni wayaɗta goora ni jivi suuɗ ɗow ɗi su? Aŋ vaɗ ndaɗta kay sem wayaɗta ɗi su?»

³ Samson dasi ana, «Ndaɗta ni ndolon ka u suu Filistinna olo ɗi. An min lasi dla cora egesiya.»

⁴ Samson tuɗ yow senekŋa ay na kis kis hindi. Nam ɗag dolla taɓ njaw senekŋa mba njunusi dolla njawasiya.

⁵ Nam hin do kura eg dol ndaɗta, cuk senekŋa ha kolo duk sene ma vi suu Filistinna hu maɗakŋa ŋgal wa ma moli ga hu maɗakŋana ki lay, ŋgal ma kolo bay zi tuna ki lay. Sene gugutluna ŋgal ki lay, ŋgal conona ki lay.

⁶ Suu Filistinna joɓ tasi ana, «Sa ma li dla ndaɗta nana ni gege?» Asi hoŋosi dira ana, «Li dla ndaɗta ni Samson ma kunuŋ Timnana kay nam vam caamba ɦaɗ ki maŋ saam ma sunumma.» Suu Filistinna yow ay mba ŋgal ca ndaɗta kiyo u buɗ halaŋ.

⁷ Samson dasi ana, «Agi li dla ndaɗta na ni agi may ni an ka hin sa sukul ma saam u aginaɗi.»

⁸ Nam mba dukusi, casi cocoo, hin tuɗ buu ha ki hu zul ɦinira Etamba.

Samson su kay suu Filistinna hu mbassa Lehira

⁹ Suu Filistinna yow ay mbay hu Yuda mba ndug ɦoŋzi ma Lehina.

¹⁰ Suu Yudana joɓosi ana, «Agi mbay a duu u ami ni kay mege?» Suu Filistinna hoŋosi dira ana, «Ami mbay a vi ni Samson. Ami min a lammi ko nam lamira na may.»

¹¹ Suu Yudana yow u tasi na buɓ buɓ hindi tuɗ hu zul goyra Etamba, tuɗ di Samson ana, «Aŋ ka wi ana suu Filistinna ti mulla kaygi ni asiyaɗi su? Ami laŋŋi mege?» Nam hoŋosi dira ana, «Ko ndal asi lan dla cora egenda na, an min lasi ni na may.»

¹² Asi dam ana, «Ami mbay ni a vaŋga min tuɗ ɦaŋ ki ni masiya.» Samson dasi ana, «Suu tagi ki fokon tani ana, agi ka can u tagiraɗi kama.»

¹³ Asi hoŋom dira ana, «Ҥawaa, ami minni a vaŋ kemmi, ɗagaŋ tuɗ ɦaŋŋi maŋ suu Filistinna, ami ka caŋ kiɗi.» Asi ɗagam ay ki u zew ma wilina na mba' taɗam ay ki kiɗik hu zul ɦinira.

¹⁴ Hu li ma asi mbay tok eg Lehi may ni, suu Filistinna tum ay kolo gufuɗta sawalla koloo. Musukka vi Yawera kal huu Samson. Zew ma ɗagam kom ay ki u namma mbuɗ ki ko ndal zew ma ay ki ŋgali duk kurana na. Zew ma ɗagi komma jal ki halaŋ halaŋ.

¹⁵ Nam fi sok kiriŋ korra cuki kaŋga u wili tamu. Nam yowom kom yow ni, ci suuna u sok kiriŋ korra na buɓ.

¹⁶ Samson sawalla kolo di ana, «U kiriŋ korra dewra an ci suuna na buɓ. U kiriŋ korra dewra an ci maɗna cocoo.»

¹⁷ Hu li ma vunum ndi ga may ni, nam gik kiriŋ kor ndaɗta ha ki egem na day. Asi hin tin sem li namma ana Ramat-Lehi ni ana yam mbura kiriŋ korra kaɗta.

¹⁸ Ŋgoo dagan wanni Samson laara cam cocoo. Nam cen Yawe di ana, «Aŋ ɦal saɓakŋa maŋ saaŋ ma sunda a su kay suuna ni aŋu, cem wanda an laɓ ki ko laara ni laɓiya, hin ki ni duk ko suu ɗiwisi bay cawra.»

¹⁹ Lona wak duk ɦinira eg Lehira na ŋgukŋi, mbona baɗ ay ki hu ni na gaw. Samson ci yona ci ni hoŋ fi saɓakŋa. Kay ndaɗta asi tin sem li namma ana, goloŋga Korera, yo ma vi sa ma yi kolona, mbo namma ka ta ta cemi hu Lehi ndaɗta.

²⁰ Samson kak a sa ma kaɓakŋa kay suu Israelna hu lina vi suu Filistinna ni basara dok-mba'.