SUU KAƁAKŊA 14 - Boy Lonana

Samson ɗum cara

¹ Samson tuɗ hu Timna, ŋgaɓ goora ha dew duk gorɓii suu Filistinna.

² Nam tuɗ di boy namma maŋ gi bum u sum ana, «An ŋgaɓ goora dew a caanda duk gorɓii suu Filistinna ha hu mbassa Timnara. Cemi ni agi tuɗ ɗumungi goo ndaɗta.»

³ Gi bum u sum dam ana, «Aŋ ka ndak a fi cara duk gorɓii suu vi gorseŋŋana vo taniɗi su? Aŋ tuɗ ɗum cara ay ki duk suu Filistinna suu ɗiwisi bay cawra ni nanage?» Samson hin di bum ana, «Vanni goo ndaɗta kay ni ta hurun miniɗta.»

⁴ Gi bum u sum ka wi ana dla ndaɗta col ay ni ko Yaweraɗi kay nam hal ni dlara du del tam u suu Filistinna. Hu coki ndaɗta suu Filistinna ti mulla kay suu Israelna ni asiya.

⁵ Samson col u gi bum u sum a tuɗ ga hu Timnara wanni, mba tew hu sene gugutlu ma Timnana may ni, dlo ma ndulna ŋgafam ay u ŋgomba.

⁶ Musukka vi Yawe kal hurumu. Samson va ka kombi lay ni, vi dlona hawam ki duk ko suuna a haw gor ɦugunina kira na. May nam cuɗ dla ndaɗta ka maŋ gi bum u sumbi.

⁷ Nam tuɗ hu Timna njaɗ u goora. Ndaɗ irim jivi ɦay.

⁸ Buu dagan ca ni nam hoŋ ay a ɗumuɗta. Nam es keŋ gol ɦaa dlo ma nam camma, gola ni yumma cuk ki hu ɦaa dlona vi mbulna ki hu may.

⁹ Nam paɗ yumma ay komu tuɗ ay na ni tam ay irim voɗo. Hu li ma nam mba tew eg gi bum u summa ni u ma hin ay komma nam ɦasina. Asi ti may. May nam dasi ka ki ana nam paɗ yumma ay ni hu ɦaa dlona naɗi.

Ganyamba maŋ suu Filistinna

¹⁰ Bu Samson tuɗ vi goora hu li ma ɗumba. Samson li tina maŋ suuna a vogoɗona may kay gorzoŋina halaŋ li ni na.

¹¹ Hu li ma nam mba may ni, asi yow suuna dok-hindi a ndal egemba.

¹² Samson dasi ana, «An min dagi dlara ganyam ta ha na dew, lini agi ganda uɗ ki wa ni an ɦagi barawna ii cukka na dok-hindi, ɦagi baraw gobodta ŋgolora kayam dew dew may hu buu ma kiɗisiya ma aygi a li luuna wanna.

¹³ Lini agi faɗ uɗ ka kiɗi ni agi hin ɦan barawna ii cukka dok-hindi, gobodta kayam dok-hindi may.» Asi hoŋom dira ana, «Di ganyam ndaɗta aya ami humuɗu.»

¹⁴ Samson dasi ana, «Va ma tira kal ay ki huu va ma kom suuna, va ma jeɓeɗna kal ay ki huu va ma saɓakŋa.» Tew buuna ki na hindi ni gorzoŋina fi u ganyam ndaɗta ka tuɗi.

¹⁵ Tew hu buu ma fiɗina may ni asi di caŋ Samsonda ana, «Tuɗ ganyam njufuk nam gami u ganyamba nam daɗ wanda ay kiyo, li ka naɗi ni ami ŋgalak ki u zi vi bukŋa may halaŋ. Agi yami ay ni a yowomi tlegeyemi kira su?»

¹⁶ Caŋ Samsonda cuɗum um ha u tiina dam ana, «Aŋ doli ka mininɗi, aŋŋi sa ma gonokka u anna ɦawaa, ganyamba aŋ daɗ maŋ gorzoŋi suu Filistinna wanda aŋ hin ganda uɗ ka kiɗi ni kay mege?» Nam hoŋoɗ dira ana, «An gaɗ uɗ ka ki maŋ gi bun u sunɗi lay, may ndak ɗow ni an gakka uɗ kiyo.»

¹⁷ Ndaɗ ka tii kam gak gak tew hu buu ma kiɗisiyana halaŋ a gaɗ u ganyam ndaɗta kira. Hu buu ma kiɗisiyana ni nam gaɗ u ganyam ndaɗta kiyo. Kay ndaɗ dogom vunum cocoo. Ndaɗ tuɗ gi u ganyam ndaɗta ki maŋ suu Filistinna may.

¹⁸ Hu buu ma kiɗisiyana faɗta a ndi gara wanni, suu hu ɦoŋzi nammana di Samson ana, «Va ma jeɓeɗ su mbul yumma ni mege? Va ma saɓak su dlona ni mege?» Nam hoŋosi dira ana, «Lini agi zum gin u do mbutl mandaɗi ni agi ka ndak a fi u ganyam ndaɗtaɗi.»

¹⁹ Musuk Yawera kal hu Samson. Nam tuɗ ki hu Askelon, ci suu huna na dok-hindi, yowosi barawi masisina, mba ɦasi maŋ suu gi u ganyamba kina. Hurum ɓeŋ ki cocoo nam hoŋ vo vi bumu.

²⁰ Caŋ Samson ndaɗta asi hin ɦaɗ ki ni maŋ banam ma kosokosona ma sunum ɦayna.