SUU KAƁAKŊA 13 - Boy Lonana

Vuɗta vi Samson

¹ Suu Israelna gijaŋ li dlara ka ii Yawe jiviɗira olo. Yawe hinisi hu duk ko suu Filistinna basara dok-fiɗi.

² Sana dew ka hu Sora. Nammi hu deera vi Danda, sem ana Manoa, caamba ka vuɗɗi, goo ka koɗɗi.

³ Sa sunda vi Yawe ndi ki ii ca ndaɗta daɗ ana, «An wi ana ndak ki ni gendergee, goo ka kokgi, na may ndak hin vi wiina, hin vuɗ goona.

⁴ Cemi gaw ni ndak ci sum veŋ oloɗi, ci sum ma yaɗi lay, ti va ma njenjeɗi lay.

⁵ Kay ndak hin vi wiina, hin vuɗ goona, goo namma sa ka tinim vel kay yambi, go njuf namma hin ki ni maŋ Lona ay ni huu sum day. Nammi sa ma hin gijaŋ a suɗ suu Israelna ki ko suu Filistinnana.»

⁶ Cara hoŋ ay voo, mba cuɗ boy namma maŋ njufuɗ di ana, «Sa ma vi Lonna ndi ay ki irinu. Nam tli tammi u sa sunda huulona tam laŋ ndaa cocoo. An joɓom ka ana nam col ay ni arageraɗi kama. Nam takan sem kaɗi may.

⁷ Nam dan ana, Ndak hin vi wiina, hin vuɗ goona. Cemi gaw ni ndak ci sum veŋ oloɗi, ci sum ma yaɗi lay, ti va ma njenjeɗi lay, kay go njuf namma hin ki ni maŋ Lona ay ni huu sum day ta ta hu buu ma nam miɗna.»

⁸ Manoa hin cen Lona di ana, «Lo ma oora, Yawe, sa sunda vi Lona ma aŋ sunum ay egemina hoŋ ay hu dew, nam mbay haɗami dlara gogoo namma hin vuɗ wa ni ami hin lamba egemba.»

⁹ Lona hum cenda vi Manoa. Sa sunda vi Lona hoŋ ay eg cara olo, ni ndaɗ kaki ga ŋgoo bagi hu senena, njufuɗ Manoa ka egeɗɗi may.

¹⁰ Na cecem gaw ni cara liŋ tuɗ di boy namma maŋ njufuɗ ana, «Gola sa ma mbay faɗta egenna ndi ay ki irin wa olo.»

¹¹ Manoa col kolo tuɗ u caamba hu li namma, mbay eg sa sunda vi Lona dam ana, «Ni aŋ sa ma ɓak ka maŋ ca ndaɗtana su?» Nam hoŋom dira ana, «Ni anu.»

¹² Manoa hoŋ joɓom ana, «Cemi ni dlara aŋ daɗta hin a li ki may ni gaɗta kay gogoo nammara ni ana me ɗaŋge? Dlara ami hin laɗ eg goo namma ni taarage?»

¹³ Sa sunda vi Yawe di Manoa ana, «Tlesuu an dasi ka maŋ cara na halaŋŋi ndaɗ lasiɗi.

¹⁴ Ndaɗ ka ti tlesuu vuɗ gugutluna dukusina ɗi, ndaɗ ci sum veŋgi, ci sum ma yaɗi, ti va ma njenje ɗi lay. Ndaɗ mba li u tlesuu an daɗsina wanna halaŋ.»

¹⁵ Manoa di sa sunda vi Yawe ana, «Mariyaɗ ni aŋ vi taŋ juɓumi nde ami coɓoŋ goo ɦu ay funuŋ coɓ.»

¹⁶ Sa sunda vi Yawe di Manoa ana, «Lini aŋ ɗelen lay ni an ka hin taŋ fuuŋŋaɗi, lini aŋ min a li ɓivun ma ŋgalam ki ŋgalina ni aŋ lammi maŋ Yawe.» Na ni Manoa ka wi ana ni sa sunda vi Yaweraɗi.

¹⁷ Nam joɓom ana, «Seŋŋi ana mege kay ami hin ŋgaaŋ ka hu li ma boy ma aŋ damma li kina mayɗi su?»

¹⁸ Sa sunda vi Yawe dam ana, «Aŋ a joɓon kay senni kay mege? Nammi sem ma ŋgayna.»

¹⁹ Manoa vi goo ɦuna may, hal tlesuu daŋŋa may, nam tuɗ li ɓivunna kolo kay ɦinira maŋ Yawe maŋ sa ma sun mamba mbuɗ mbuɗtana. Manoa u caamba gol irisiya ni.

²⁰ Sin kura col ay hu givin ma togolla ta ta kolo huulona. Sa sunda vi Yawe tuɗ ha kolo duk sin ku ndaɗta may. Manoa u caamba wi dla ndaɗta na ni kuluɓ irisi kaŋgaa.

²¹ Sa sunda vi Yawe ndi ka ii gi Manoa u caamba dagan oloɗi. Manoa wi ki ana gasi ni Sa sunda vi Yawe.

²² Manoa di caamba ana, «Ay ca ni hin miɗ ki ɗaŋ kay ay wi Lona u iriya.»

²³ Caamba hin dam ana, «Lini Yawe min a cay kiyo ni nam ka vay ɓivun mayna ma ŋgalam ki ŋgalinaɗi, vay puu mayraɗi lay. Nam ka ndak a takay dlara ki naɗi lay. Nam ka vay ay egem na zak a takay haɗta wan ndaɗtaɗi lay.»

²⁴ Cara hin vuɗ goona, tinim sem ana Samson. Gogoo namma wula. Yawe paɗ vunum ki kamu.

²⁵ Musukka vi Yawe mba kay Samsonni hu li ma nam ka hu ɦoŋzi ma Danna duk ɦoŋ gi Sora u Estaol tana.