SUU KAƁAKŊA 12 - Boy Lonana

Duuna duk suu Galaadna u suu vi Efrayimma, Jefta miɗ kiwa

¹ Suu Efrayimma min tasi ay a duuna, asi calaɗ mbay ki Safon. Asi di ha maŋ Jefta ana, «Aŋ duu u goryoŋ Amonna yami ka a ami tuɗ duuna u aŋgi ni kay mege? Ami tuɗ ha ŋgalaŋ ziŋŋa ni kaŋu.»

² Jefta hoŋosi dira ana, «Ami u suu mansina dlara ay dukumi u goryoŋ Amonna ni cocoo. Hu li ma an yagi a mbay njun kanda ni agi min kaɗi.

³ An wi ana agi ka min a mbay njununɗi ni an ba ki ni iiri manda ndim tan u goryoŋ Amonna ni na. Yawe ɦansina ki hu duk konu. Agi hin mbay kolo tani a duu u anni kay mege?»

⁴ Jefta tok suu Galaadna halaŋ gijaŋ duuna u suu vi Efrayimma. Suu Galaadna su kay suu vi Efrayimma kay asi di ana, «Agi suu Galaadna ni suu ɦawana suu Efrayimma dikigi kiyo. Agi ay ni duk njaf suu Efrayimma u suu vi Manasena.»

⁵ Suu Galaadna mba lak ki fun voo lum ma Yurdanna ii ma vi suu Efrayimma na gay. U suu may suu suɗ ha ki dew dew duk suu vi Efrayimma li di ana, «An tuɗ taɓa lumma.» Suu Galaadna joɓosi ha ana, «Agi ni suu Efrayimma su?» Asi hoŋ dirawa ana, «Ҥawaa.»

⁶ Ni asi dam ha ana aŋ di ay ana, «Cibolet», nam di ana, «Sibolet», kay nam ka ndak a yi sem namma ki jiviɗi. Ni asi vi sa namma ŋgaɗam ki fun voona hu li namma ni na gaw. Hu buu namma ni asi ci suu vi Efrayimma na 42.000.

⁷ Jefta, ma Galaadna, kaɓakŋa kay suu Israelna ni basara karkiya. Nam hin miɗa, asi pammi hu ɦoŋzi ŋgol maa dew hu Galaad.

Ibsan

⁸ Ŋgoo Jefta dagan sa ma varak a kaɓakŋa maŋ suu Israelna ni Ibsan, sa ma Betlehemma.

⁹ Nam u gor njufiina kom na dok-hindi, gorɓiina dok-hindi may. Nam ɦal gorɓii mamsina ki zi njufna ni maŋ njaf suu daŋŋa, ɗum boyogina ay u goryom suu njufiina ni vi njaf suu daŋŋa may. Nam kaɓakŋa maŋ suu Israelna ni basara kiɗisiya.

¹⁰ Ibsan hin miɗa. Asi pammi hu Betlehem.

Elon

¹¹ Ŋgoo Ibsan sa ma varak a kaɓakŋa ni Elon ma Zabulonna. Nam kaɓakŋa maŋ suu Israelna basara doogo.

¹² Elon ma Zabulonna hin miɗa. Asi pammi hu Elon hu mbassa Zabulonda.

Abdon

¹³ Ŋgoo Elon sa ma varak a kaɓakŋa maŋ suu Israelna ni Abdon ma goŋ Hillelna ma Piratonna.

¹⁴ Goryommi dok-fiɗi, gor ŋgologi mamsina ni dok-hindi may. Asi fuli kay korra ni dok-kiɗisiya may. Nam kaɓakŋa kay suu Israelna basara kalavandi.

¹⁵ Abdon ma goŋ Hillel ma Piratonna miɗ ni asi pammi hu mbassa Efrayimba, kay ɦinira Amalekka.