SUU KAƁAKŊA 11 - Boy Lonana

Jefta

¹ Jefta ni sa ma hu mbassa Galaadta. Nam wi mbeleŋ duuna cocoo. Summi cara gawlaŋga. Bum sem ana Galaad may.

² Caŋ Galaad ta ɗumba vuɗum gor njufiina may. Hu li ma goryoŋ caamba ɗumba wul kina asi dik Jefta ki dam ana, «Aŋ ka fi jo na nde vi bumi taniɗi, kay aŋŋi goŋ cara daŋgana.»

³ Jefta tin yam ki eg gorsemma na day tuɗ kak ha ki hu mbassa Tobpa. Suu may suu dlasi kaɗina tok u Jefta ka njunumu.

⁴ Buu dagan na ca ni, goryoŋ Amonna mun duuna u suu Israelna.

⁵ Hu li ma suu vi Amonna ka duu u suu Israelna na ni suu ŋgolo suu Israelna tuɗ hal Jefta ay hu mbassa Tobpa.

⁶ Asi dam ana, «Aŋ mbay voo, li fokomi a ŋgol asgaana. Aygi tuɗ duu goryoŋ Amonna.»

⁷ Jefta di suu ŋgolo suu Galaadna ana, «Agi ni ka suu dikin ay ki vo vi buunaɗi su? Hu li ma agi ka hu yoorana agi hin mbay halanni kay me ologe?»

⁸ Suu ŋgolo suu Galaadna hin di Jefta ana, «Na daŋ may lini ami mbay egeŋ cemi ni kay aŋ tuɗ duu u goryoŋ Amonna, aŋ lini a mul mamina. Aŋ li mulla ni kay suu hu Galaadna halaŋ.»

⁹ Jefta di suu ŋgolo suu Galaadna ana, «Lini agi hoŋon ha a duu u suu vi Amonna, lini Yawe hinin suu asina ki duk kon wa ni an hin kakŋi a mul magina.»

¹⁰ Suu ŋgolo suu Galaadna hoŋ di Jefta ana, «Yawe dukuygi ni a sa ma dikina, lini ami li ka u dlara aŋ daɗtaɗi.»

¹¹ Jefta tuɗ ay u suu ŋgolo suu Galaadna. Suuna mba a tlam fokosi a mul masina, tinimmi a ŋgol asgaana lay. Jefta hoŋ di boy ma nam dam ayna ki fok Yawe halaŋ hu Mispa.

Jefta sun suuna eg goryoŋ Amonna

¹² Jefta cuk suuna vun sunda eg mul ma vi goryoŋ Amonna dam ana, «Va ma ndi duk taŋ u an a aŋ mbay duu mbas mandana ni mege?»

¹³ Mul ma vi goryoŋ Amonna di suu cukusi ha vun sundana ana, «Ni kay ana suu Israelna hu li ma asi cuk ay ki hu mbassa Egiptera ni asi mba yowon mbas manda kiyo. Col ha Arnon ta ta tew ki Yabbok ta ta tew ha ki fun mbo lum ma Yurdanna. Cemi ni agi hoŋongi mbas manda u heɓpa.»

¹⁴ Jefta hoŋ sun suu daŋŋa eg mul ma vi goryoŋ Amonna.

¹⁵ Nam dam ha ana, «An Jefta daŋ ha wanna, suu Israelna tli mbassa Moab u mbassa vi goryoŋ Amon kaɗi.

¹⁶ Hu li ma suu Israelna cuk ay ki hu mbassa Egiptera ni asi tli voɗta ki ni hu Lum ma Cerewna na tuɗ ay ni hu voɗta ki ŋgoo bagira. Asi mba tew ki ni hu Kades.

¹⁷ Suu Israelna cuk suuna ha vun sunda eg mul ma Edomma joɓom ana, Aŋ hinimi voɗta nde ami jak hu mbas maŋga. Mul ma Edomma min kaɗi. Asi hin sun suuna eg mul ma Moabma olo ni nam min ka a hinisiɗi lay. Kay ndaɗta suu Israelna buu hu Kades bolow cocoo.

¹⁸ Asi hin tin irisi ni ŋgoo bagi hu fulla gun ki keŋ mbassa Edomba u mbassa Moabba, mbay ki ii u maɗiina keŋ ndaŋgara Moabba na. Asi vi zina ha ki ni hu Arnon kal ka hu mbassa Moabbaɗi. Kay Arnonni ii hakara u mbassa Moabba.

¹⁹ Suu Israelna cuk vun sunda eg Sihon, mul ma vi suu Amorna, mul ma Hesbonna joɓom ana, hinimi ami jak hu mbas maŋga a tuɗ hu li ma ami min tuɗ huna.

²⁰ Sihon ka min suu Israelnaɗi. Nam hinisi ka a jak hu mbas mambaɗi. Nam tok suu mamsina mba mol ki hu Yahas col duuna u suu Israelna.

²¹ Yawe, Lo ma vi suu Israelna, ɦal Sihon ki hu duk ko suu Israelna u suu mamsina halaŋ suu Israelna casi kiyo. Suu Israelna tli mbassa vi suu Amorna suu cuki hu mbas ndaɗta na kiyo.

²² Asi tli mbassa vi suu Amorna ki halaŋ halaŋ col ay Arnon day ta ta Yabbok, col ha ŋgoo bagi hu fulla ta ta fun mbo lum ma Yurdanna may.

²³ Yawe, Lo ma vi suu Israelna, dikimi suu Amorna ɦami mbas masira kiyo. Aŋ min a vamira ki komi may su?

²⁴ Aŋ ka kak u mbassa looŋŋa, Kamos, ɦaŋgara mayɗi su? Tlesuu Yawe Loomina ɦamisinana ni ka tlegeyemi mayɗi su?

²⁵ Aŋ gol taŋŋi ŋgol su Balak ma goŋ Sipporna, mul ma Moabma. Nam li ya ka u suu Israelnaɗi, nam duu ka u amiɗi.

²⁶ Hu li ma suu Israelna ay cuki Hesbon u zi ma ŋguy kasina halaŋ, hu Aroer u zi ma ŋguy kasina halaŋ, ay hu ɦoŋzi ma cuki fun lum ma Arnonna halaŋ li basara ni kis kis hindi ni agi tli mbas ndaɗta ay ka kiɗi ni kay mege?

²⁷ Lini anu ni an laŋ dla co ka egeŋgi. Aŋ lan dla cora ay egenni aŋ na ɗow, hal a li duuna u anu. Ko Yawe, sa ma kaɓakŋa, kaɓak ma duk hoŋ suu Israelna u goryoŋ Amonna ni namu.»

²⁸ Na lay ni mul ma vi goryoŋ Amonna ka min a hum boy ma vi Jeftanaɗi.

Suura Jefta suu tam kira

²⁹ Musukka vi Yawe mbay kay Jefta, nam jak ay hu Galaad u Manase na hin jak ay hu Mispa ta Galaadta hu li namma nam kal ki hu ndaŋgara vi suu Amonna.

³⁰ Jefta suu tam fok Yawe di ana, «Lini gasi aŋ ɦan suu Amonna ki hu duk kon wa ni

³¹ hu li ma an hoŋ ay ki vo jivi bay va lan wa, va ma kal ay ki fun ziin ŋgafan ay ki jewna va namma ki ni maŋ Yawe an ɦam ki ni a ɓivun ma ŋgalam ki ŋgalina.»

³² Jefta kal hu mbassa vi goryoŋ Amonna a duu u asira. Yawe hinimsina ki hu duk komu.

³³ Nam casi ta ta col ha Aroer tuɗ tew ay ki hu Minit, ɦoŋzi ŋgolona dok-mba' ta ta tew ay ki Abel Karamim. Ni duu ŋgolna ɓalak tlena cocoo. Suu Amonna yasi hom kaŋga fok suu Israelna wa.

³⁴ Jefta a hoŋ ay vo varam hu Mispara wanni, gooromba kal ay ki ŋgafammi ndaɗu, luu ma ci dadarina may. Ndaɗ kom dew a gooromba ni ndaɗ gaw. Goo ma daŋ ka kombi.

³⁵ Hu li ma nam waɗ ay na ni nam haa barawi mam suu tamma kiyo hin di ana, «Ҥii, goonda ndak kalan hu dlara hahawra wa. Ndak mbuɗ ki ni duk suu mbaaran yoora kanna. An di boy namma ki ni fok Yawe an ka ndak a hoŋ vunun daganɗi.»

³⁶ Ndaɗ dam ana, «Bunu aŋ ɓak ki coco fok Yawe, lan ko boy ma kal ay ki funuŋŋa na. Kay ana Yawe saaŋ sukuluŋ ay ki wa ko suu babali maŋsina goryoŋ Amonna.»

³⁷ Ndaɗ hin di buɗ ana, «An min joɓoŋu, aŋ hinin til mba' an tuɗ ŋgoo bagi kay ɦinira u ndarayan gorɓiina tii tan kay way manda.»

³⁸ Nam daɗ ana, «Tuɗa.» Nam hiniɗ tuɗ ii tilna mba'. Ndaɗ tuɗ u ndarayaɗna tii taɗ kay way maɗta ha ki kolo kay ɦinira.

³⁹ Til ma mbana daɓ may ni, ndaɗ hoŋ ay vo vi buɗu. Nam laɗ ni ko ndal nam suu tam kira na may. Ndaɗ buu ka u sa njuf tuɗi. Dla ndaɗta hin duk suu Israelna ni a fafaɗta.

⁴⁰ Hu basara tew tew ni gorɓii suu Israelna tuɗ tii goŋ Jefta ma Galaadnara buuna fiɗi fiɗi hu basara.