SUU KAƁAKŊA 10 - Boy Lonana

Tola

¹ Ŋgoo Abimelek sa ma varakŋa ni Tola, goŋ Puana, goŋ Dodona hu dee suu vi Issakarna, col kolo a suɗ suu Israelna ki ni namu. Nam ay cuki ni hu mbassa Samirra duk ɦinira Efrayimba.

² Nam kaɓakŋa maŋ suu Israelna basara dok-mba' yam hindi. Nam hin miɗa. Asi pammi hu Samir may.

Yair

³ Sa ma varak ŋgoo Tolana ni Yair. Nammi goo ma Galaadna. Nam kaɓakŋa maŋ suu Israelna basara dok-mba' yam mba'.

⁴ Goryom suu njufiina ni dok-hindi fuli kay korra dok-hindi may. Asi ti mulla kay ɦoŋzina zeɗ zeɗ dok-hindi may. Asi tin sem ɦoŋzi ma zeɗ zeɗ namma ana Ҥoŋzi ma vi Yairna ta ta cemi hu mbassa Galaadta yammi na.

⁵ Yair hin miɗa. Asi pammi hu Kamon.

Suu Amonna mba ndug suu Israelna

⁶ Suu Israelna hoŋ li dlara ka ii Yawe jiviɗira olo. Asi sun loogi suu ɦawana gi Baal u Astart, loogi suu Aramma u loogi suu Sidonna, loogi suu Moabma u loogi suu vi goryoŋ Amonna, loogi suu vi suu Filistinna. Asi noy Yawe kiyo, ka min a sunum oloɗi.

⁷ Huu Yawe ɓeŋ ki eg suu Israelna. Nam gususi ki ko suu Filistinna u goryoŋ Amonna.

⁸ Suu asina las suu Israelna suu ii u maɗiina ŋgoo lum ma Yurdanna ta ta basara doogo yam kalavandi. Suu ha cuki ŋgoo lumma hu mbassa vi suu Amonna hu Galaadna bel.

⁹ Goryoŋ Amonna calaɗ lum ma Yurdanna ay ki a mba duu u suu vi Yudana, vi Benjaminna u suu vi Efrayimma. Suu Israelna gijaŋ yoo tasi cocoo.

¹⁰ Suu Israelna tii fok Yawe di ana, «Ami lami sulukŋa ni egeŋu, kay ami hin Lona mamina ki tani, hin goɓ mi Baal.»

¹¹ Yawe di suu Israelna ana, «Hu li ma suu Egiptena, suu vi Amonna u suu Amorna, suu Filistinna,

¹² suu Sidonna, Amalek u suu Madiyanna lasagina ni agi yangi kolo na ni an hin suɗugi ka kiɗi su?

¹³ Agi hin noyon kiyo, sunugi ni loogi suu ɦawana. Kay ndaɗta an ka min a suɗugi ki oloɗi ni na.

¹⁴ Tuɗugi tiirigi eg loogi magi suu agi ŋgaɓasina. Asi mbay njun kagi hu li ma agi ka yoo cemi wannana.»

¹⁵ Suu Israelna hin di Yawe ana, «Gasi daŋ may, ami li ni sulukŋa. Aŋ li dlara aŋ minda u huruŋ egemi ko aŋ minda na. Na may ni aŋ buɗumi ki karami.»

¹⁶ Asi njay loogi suu daŋ suu vo varasina kiyo. Asi gijaŋ a sun Yawe ma ka wi lassa vi suu Israelna u irimbina.

¹⁷ Goryoŋ Amonna yi tasi halaŋ mba baa ki ga hu Galaad. Suu Israelna tok tasi mba baa ki hu Mispa tana may.

¹⁸ Suu ŋgolo suu Galaadna u suu masisina ɓak tasi ana, «Sa ma hin ndak a duu u goryoŋ Amonna ni gege? Sa namma hinni a mulna vi suu cuki hu mbassa Galaadta halaŋŋa gawɗi su?»