SUU KAƁAKŊA 1 - Boy Lonana

Njaf suu vi Yudana u suu vi Simeonna vi Adoni-Bezek

¹ Ŋgoo dagan hu li ma Josuwe miɗ kina ni suu Israelna joɓ Yawe ana, «Dukumi ni njaf suu vi gena hin tuɗ a duu u suu Kanaanna nige?»

² Yawe hin dasi ana, «Sa ma tuɗ fok jewna ni dee suu vi Yudana, gola an hinisi mbassa ni hu duk kosiya.»

³ Suu vi Yudana hin di suu vi wayamma, Simeon, ana, «Tuɗugi ay u amiya, mbay duuruygi suu Kanaanna, ami may ni hin tuɗ ugi hu li ma agi hin a lak huna.» Suu vi Simeonna hin tuɗ usi may.

⁴ Yuda tuɗ duuna. Yawe hinisi suu Kanaanna u suu Perizna ki hu duk kosiya. Ay hu Bezekŋi asi ci suuna na buɓ buɓ doogo.

⁵ Asi fi suu vi Adoni-Bezekŋa hu Bezek asi duu u asiya. Asi ci suu Kanaanna u suu Perizna kiyo.

⁶ Adoni-Bezek piira. Asi dikim gak gak tuɗ vam kemmi kaam cifiɗ kom kiyo u gogor sem lay. Asi kaasi kiyo.

⁷ Adoni-Bezek yoo tam di ana, «Muli suu asi kaasi gogor kosi u gogor sesi kina na dok-kiɗisiya ay vaa tlesuu tira suu yakki kaŋgana ni u tabul manda, dlara an laɗta Lona hoŋonda kan wa may.» Asi mbaaram ay ki hu Yerusalem. Nam mba miɗ ki ni huwa.

Suu Yudana tli mbassa Yerusalemba ura Hebronda kiyo

⁸ Suu Yudana mba ndug Yerusalem ɓaɗaɗ kiyo. Asi ci suu huna ki u ŋgewina, ŋgal ɦoŋzina ki may.

⁹ Ŋgoo dagan suu Yudana hoŋ ga a tuɗ duu u suu Kanaan suu cuki kolo kay ɦinira, suu hu Negebma u suu hu mbas mayra ga hu ɦuɗugumbara.

¹⁰ Ŋgoo dagan suu Yudana tuɗ duu u suu Kanaan suu ka cuki hu Hebronna. Sem li ma Hebronna ay jew ni ana Kiriyat-Arba. Asi ci Sesay, Ahiman u Talmay.

Otniyel ti zi ma Debirna

¹¹ Ay hu li namma suu Yudana tuɗ ndug zi ma Debirna. Zi namma ay yam jew ni ana Kiriyat-Sefer.

¹² Kaleb di ana, «Sa ma dik Kiriyat-Sefer kina ni an ɦam goonda, Aksa, ki a cara.»

¹³ Otniyel ma goŋ Kenazna, wayaŋ Kaleb ma goona tli ɦoŋzi namma ki ni namu. Kaleb hin ɦam gooromba Aksa a cara may.

¹⁴ Hu li ma ndaɗ mbay ki vo varam may ni, ndaɗ ka dogom vunum coco ana joɓoɗ buɗu nam ɦasi li ma senena. Ndaɗ mbay cuk ki ga kay kor maɗta. Kaleb joɓoɗ ana, «Ndak minni mege?»

¹⁵ Ndaɗ hin dam ana, «Wan hahawan na wige, kay aŋ ɦan ha ki ni hu mbassa Negebpa, ɦan li ma yo na nde mayge.» Kaleb hin ɦaɗ li ma kolona u li mbo ma kaŋgana halaŋ.

Njaf suu vi Yudana u suu vi Benjaminna ti mbassa

¹⁶ Suu Kenna njaf ma vi kunuŋ Moizna yow ay hu ɦoŋzi Jerikona u suu Yudana, ŋgoo bagi hu mbassa Yudara hu ɦoŋzi hu Aradta na. Asi mba vi ziisi ki duk suu ŋgoo bagina.

¹⁷ Yuda tuɗ ko tasi u wayamma Simeon. Asi dik suu Kanaanna suu ay cuki hu mbassa Sefatta. Asi ŋgal ɦoŋzi namma ki u tlesuu hurumma bel bel, sa tli va ka kombi, tin sem ɦoŋzi namma ki ana Horma.

¹⁸ Suu Yudana duu tasi u ɦoŋzi ma Gaza, Askelon u Ekronna u mbassa keŋesi tok tokka lay.

¹⁹ Yawe ka u asiya. Asi tli mbassa ɦinira ki halaŋ halaŋ. Na may asi ndak ka a tli mbassa hu li ma ɦawanaraɗi, kay suu huna u pus pus kawina usiya.

²⁰ Ko ndal Moiz di kara na, asi ɦal mbassa Hebronda ni maŋ Kaleb ma dik goryoŋ Anak suu hindina kina.

²¹ Na may suu Jebusna suu cuki Yerusalemma goryoŋ Benjaminna dikisi ka kiɗi. Suu Jebusna hin cuki hu Yerusalem u suu vi Benjaminna dew ta ta cemi.

²² Dee suu vi Yosefna yow tuɗ duu u Betel, may Yawe li u asiya.

²³ Dee suu vi Yosefna sun suuna tuɗ gol zi ma Betelna ay ki fok jewe. Sem zi namma asi yam jew ni ana Luz.

²⁴ Suu tuɗ a cekeɗtana wi sana dew kal ay ki bunsu hu ɦoŋzina. Asi dam ana, «Takami voɗta kal vo hu ɦoŋzinara, ami may ni hin laŋ dla mayra ɗegeera egeŋ may.»

²⁵ Nam hin takasi voɗta kal ha vo hu ɦoŋzinara may. Asi ci suu vo hu zinana ki u ŋgewna. Sa ma takasi voɗtana asi hinim tuɗ u dee mamba halaŋ may.

²⁶ Sa namma tuɗ ki hu mbassa vi suu Hitna i ka zina ha ki huwa, hin tin sem ɦoŋziim namma ana Luz. Ta ta cemi sem zi namma ni na.

Gola ni suu may suu Israelna dikisi ka kiɗina

²⁷ Suu vi Manasena tew ka a dik Bet-Sean, Taanak, Dor, Ibleam u Megido u suu ŋguyusina kiɗi. Suu Kanaanna hin cuki hu mbas ndaɗta gak gak.

²⁸ Hu li ma suu Israelna mbuɗ saɓak coco lay ni, asi ka ndak a dikisi oloɗi, may asi tinisi sunda nekka kasi zeɗ zeɗ kama.

²⁹ Suu vi Efrayimma tew ka a dik suu Kanaan suu dukusina kiɗi lay. Asi ka cuki hu mbassa Gezerra duk suu vi Efrayimma gak gak.

³⁰ Suu vi Zabulonna tew ka a dik suu cuki hu Kitron u Nahalna kiɗi lay. Suu Kanaanna ka cuki duk njaf suu vi Zabulonna gak gak. May ni asi tinisi sunda nekka kasi zeɗ zeɗ kama.

³¹ Suu vi Aserna tew ka a dik suu Akona u suu Sidonna, suu Alabma, suu Akzibma, suu Helbana, suu Afekŋa u suu Rehobma kiɗi.

³² Kay ndaɗta asi ka cuki ni duk suu Kanaan suu hu mbas ndaɗtana.

³³ Suu vi Neftalina tew ka a dik suu Kanaan suu cuki hu Bet-Semek u Bet-Anatna kiɗi. Asi cukŋi dukusiya tinisi sunda nekka kasi zeɗ zeɗ kama.

³⁴ Suu Amorna ɦuɗ suu vi Dan na ha kolo kay ɦinirana ɗow ɗow ka hinisi a asi mba cuk ki kaŋga hu li ma ɦawanaɗi.

³⁵ Suu Amorna cuki hu mbassa Har-Heres, Ayalon u Kaalbim, tuɗ fok nde ni njaf suu vi Efrayimma u suu vi Manasena kak ki mulla kasiya. Asi tinisi sunda nekka kasi zeɗ zeɗ.

³⁶ Ii hakara vi suu Amorna do ay ko taɗ ni u mbassa vi suu vi Edomma. Fiyekeɗ jak u mbassa vi suu Edomma na tuɗ ga u maɗiina na, tew ay ki eg ɦinira Ҥuɗura cocora na.