SOOLLA VI SALOMON 8 - Boy Lonana

¹ Ҥaa ɦaa ko aŋ li ni a wayan sun ma ci po sunna, an faŋ ay ki kiɗik wa ni an mboɗoŋ hurun furiyuŋu, na lay ni sa ka ndak a gurni unɗi.

² An hin tayaŋ unu, tuɗuŋ ay vo vi sunu, aŋ hin haɗanu. An hin ɦaŋ sum veŋ ma his jivina, ma an lam u grenadin mannana.

³ Koŋ ma gulna gii ga u yanu, ma njufna ay kan kolo a koɗonda may.

Namu

⁴ «An dagi haa agi gorɓii suu Yerusalemma, dliɗingiɗi, dliɗingi zoŋ manda ki kolo jew bay liiɗ namma ndak ayɗi.»

Zoŋga saɓakŋa ni ko miɗna na. Banayasina

⁵ «Sa ma tuɗ ay ŋgoo bagi hu fulla kom gii kel banamba cowna ni gege?» U ŋgus moŋgora an dliɗiŋ ki koloo, hu li ma suŋ vaŋ wiiriŋ huna, hu li ma vi wii cara vuɗuŋga huna.

Ndaɗu

⁶ Tinin ki huruŋ ko lomorora na, ko ndal lomorora ɓiiri kay bikiŋga na. Kay zoŋga saɓak maɗna ni ko ndal miɗna na. Ni ko ndal lina vi suu miɗina na yowmus cocoo, kuuɗ saɓak cocoo, ni ko ndal lona bayra na.

⁷ Mbo ŋgolona ka ndak a heɓ zoŋgaɗi lay, mbo lumma ka ndak a tluɓuɗɗi lay, lini sana ɦal tlegeyem suu hu ziimma ki na halaŋ a gus zoŋga lay ni ka faɗɗi.

Wayaɗna

⁸ «Wayamira ka na dew, ndaɗ ni goo tuwa, pooɗ bay kal ki tu lay. Lini sa mba kaɗ wa a halaɗu ni aygi hin njaɗ kaɗ ni ana mege?

⁹ Lini ndaɗ ni a gulumun ma ŋguy kay zinana, ni ay ndak a minim zira kaɗ u doonora. Lini ndaɗ ni a vun ma ki mali ɦoŋŋa ni aygi ndak a dugum ki u gu ma sedrena.»

Ndaɗu

¹⁰ Anni gulumun ma ŋguy kay zinana, poonni a zi ŋgol ma mini vo huna. Kay ndaɗta an irimmi a cara furyun hurum cocora.

Namu

¹¹ Sene gugutlu ma vi Salomonna ka hu Baal-Hamon, suu juɓum umma ka bolow cocoo, gegelay ni fi warak ma kay sun mambana ni sili buɓ dew.

¹² Sene gugutluna ni man daŋ may. Silira buɓpa ni maŋu, Salomon. Ta kis kis mbara ni maŋ suu ka juɓuŋ u senenana may.

¹³ Ndak mayra ka kaki hu senena wanda, banayanna min a humuk deleku. Ndak di delek ay man na di gige.

Ndaɗu

¹⁴ «Tuɗuy ki zak, galanna, aŋŋi ko ndal zaa gayaŋŋa na, ko kabew ma ɓali kay cee dukkana na, kolo kay ɦinira ɓo tlena his kaɗ jivi cocora.»