SOOLLA VI SALOMON 7 - Boy Lonana

Banayasina

¹ «Hoŋ aya, hoŋ aya, goora Sulamba, ami min a goloku.» Agi gol goora Sulamba ni ana mege? Ami min gol luu ma ndak luurumma ni ana mege?

Namu

² Sek ma cuki hu tuɓuruna gol jivi cocoo, goŋ sa ŋgolnara. Ufuruk ɓurumba ko ndal walak ma sa ma yalna yooromma na.

³ Fukuk kooyra na huŋuluk ko ndal til ma day wilina na. Ni tassana ma sum veŋŋa ka daɓ ki hurumbina, hayakŋi ko wa ma moli kay tamu, yam ki ŋguyra u pafnana na.

⁴ Pook ma mba cana ni ko ndal gor dukka suu jak mbana na, ni ko ndal gor ŋgoni suu cuk u dukkana na.

⁵ Delekŋi ko ndal sii tlokka gii kelnara na, irik golon ko ndal mbo lum ma Hesbonna fun grek ma ɦoŋzi ma ŋgol namma na. Cinikŋi ko ndal zi ŋgol ma fiyek ma mini hu Liban ma suu juɓ u ɦoŋzina lak ay ki kolo huna na, ma mini vok tam u Damasna.

⁶ Yak ki coli kolo ko ndal ɦinira Karmella na, tlimiɗ yakŋi ko ndal baraw ma tlawna na. Mulna irim dlaɗ ki u pidlik ma ɓali kokŋa na dlaɗ.

⁷ Galanda, ndak jivi cocoo, oo coco lay. Ndakŋi mayra furiyun hurun ɦayra.

⁸ Ndalak tli takŋi u manawra, pookŋi ko vuɗ gugutluna na.

⁹ An ɓak tan ana, «Mariyaɗ ni an ɗiŋ kolo hum manawra, an tuɗ duɗuɗ vuɗuɗu.» Pook mbuɗ ni ko vuɗ gugutluna na, musuk ma cuk ay ki cinikŋa his fayatta ko vuɗ moŋgora na.

¹⁰ Sum veŋ ma jivi ɦayna sel ay ki ŋgotloku, Gasi tuɗ ta ta guruɗ galakŋa ha ki hu liim ma buuna.

Ndaɗu Furira vi suu min tasina

¹¹ Anni maŋ galanna, nam mininni an daŋ may.

¹² Mbaya, galanna, tuɗuy ki poyra ɦoŋzina, tuɗ buuri ha ki hu ɦoŋzina.

¹³ Goloy jiv sene gugutluna, lini nam gijaŋ ɓora wa kalage? Lini ɓoom gijaŋ a mal ki kala, lini grenadinna ka ɓo may kalage. Hu li namma an hin takaŋ min manda may.

¹⁴ Vuɗ mandargor ma zoŋga ka hisiy aya, vuɗ tlesuu jivina halaŋ ka cuki fun ziiyra, suu wilina u suu basina lay. An ɗokosi ka kolo ni maŋ aŋ, galanna.