SOOLLA VI SALOMON 6 - Boy Lonana

Banayasina

¹ Galakŋa tuɗ ni arage? Cara jiv su ndarayaɗna bella, galakŋa tuɗ irimmi arage? Ami min a njunuk a halla may.

Ndaɗu

² Galanna tuɗ ni ga hu sene mamma, hu liim ma his jivi ɦayna. Nam tuɗ a taa yoorina a duɗ vuɗ tlegeyemba may.

³ Anni maŋ galanna, galanna ni man may. Nam ma ka taa yoorina duk pafnana.

Nam ta jivira vi galamba kiyo Namu

⁴ Ndak jiv cocoo, galanda, jiv ko ndal ɦoŋzi ma Tirsana na. Jivi ko ndal Yerusalem na. Jiv makŋa ki ko ndal ɦoŋzi ma mba' namma na.

⁵ Mbuɗ irik ay golon gige, gol makka guruɗun yan ki wa. Tlimiɗ yakŋi ko ndal dogoni ɦuni suu ay u tasi bolowna na, ka fel ay kolo kay ɦinira Galaadta.

⁶ Siikŋi ko ndal yoori timigii suu col ay hu li ma mbussana na. Asi halaŋ taɓi ko tasi mba' mba' sa ka ɓorowosi kiɗi.

⁷ Kiriŋik gol ay kurufu hu gojoli ma boɗi kakŋa na ni jivi ɦay.

⁸ Gorɓii suu goryoŋ mulinana na dok-karkiya, boyogi suu ŋgolo suu malayaŋ zina dok-kalavandi, ii kem gorira bolow cocoo.

⁹ Na may guguk manda ndaɗ ni na dew daŋ. Ndaɗ ko suɗ ni na dew, ndaɗ weleɗ coco ii ca mayra vuɗuɗta. Gorɓiina waɗ na ni furiyuɗ cocoo, gorɓii suu goryoŋ mulinana u boyogi suu malayaŋ zina ŋgaaɗ cocoo.

Banayasina

¹⁰ «Cara gol ay ko faɗta day maɗiira nara ni gege? Jivira ko tilna na, weleɗ ko ndal faɗta na. Jivi coco ko ndal tlesuu ɓiiri cana na.»

¹¹ An kal ay ki hu senena a gol tlena na ni, asi ka day wan sura, a gol gugutlura ana ndaɗ ka ɓo wan su, a gol ana lini grenadinna ka ɓo may sura.

Ndaɗu

¹² An ka wi tan ana ni anura oloɗi, tan heɓ ki egen cocoo. Ndaɗ maɗ a goora vi suu ɦizinara lay ni yan ka huɗi.