SOOLLA VI SALOMON 5 - Boy Lonana

Namu

¹ Galanda, an kal ay ki hu sene manna wa, an ka feɗ gi mir u ndondoy mansina. An ka ti se yum manna u mbulumu, an ka ci sum veŋ manna u mbiira. «Banayanna, mbaagi ay tagiya, agi cagiya, guruɗugi may, galayanna.»

Banayasina Ndaɗ mal vun zira kamu, doli nam i wa Ndaɗu

² An a buu senna ni senna ka vanɗi. An hum na ni, galanda, ka daɓ vunna, di ana, «Malan vunna, wayanda, galanda, gugukka, ŋgay manda, tan laɓ ay ki u mbaɗagira cocoo, tlimiɗ yan ki laɓi lay.»

Namu Ndaɗu

³ «An fok baraw manna ki wa, an hin hoŋ cukuɗ tanni ana mege? An mbus sen ki wa, an hin hoŋ zoɗommi ana mege?»

⁴ Galanna, kal kom ay ii holoŋ vunna, hurun gijaŋ mbusuk cocoo.

⁵ An col kolo a mal vunna ki maŋ, galanna, gogor kon u duk kon ki oyra u mbul ma his jivina hu li ma an vi vun manna.

⁶ An mal vunna ki maŋu, galanna, gola ni nam tuɗ wa, nam ka coli oloɗi. An kal ay ki tuɗ a cuɗum semba, an halammi ka fambi. An yam kolo cocoo, nam ka humbi lay.

⁷ An ŋgaf u suu juɓ yam ɦoŋzina, asi ka ŋguy yam ɦoŋzina. Asi poŋonu, dagan lay, asi fokon mindil manda kanda ki lay, suu may suu juɓ u ɦoŋzina.

⁸ Agi gorɓii suu Yerusalemma an suurugiya, lini agi famu, lini agi ŋgaf u galanna wa, dam ana an ka halam cocoo, kay an minim ɦay.

Banayasina

⁹ Ma ndak minim namma jiv su suu daŋŋa bel bel su? Namma ndak minim su suuna na bel su? Ndak suurumi ki kam may na ni amege?

Ndaɗu

¹⁰ Galan, namma tlaw cocoo, ma an minim namma ha duk suuna buɓ buɓ doogo lay ni an wam ha kiyo.

¹¹ Yamba kolora ni ko ndal lorra jivi ɦayra na, tlimiɗ yam warra ko ndal njufulla na.

¹² Irim gol ay ko ndal gugukka kak ay fun mbonara na, nam mbus tammi u mbiira, nam kakŋi kay doy ma oy u mbiirana.

¹³ Kiriŋimmi ko ndal sene ma vuɗ mbitlana na, ko ndoos ma paɗ ay kolo his jivina na. Vunummi ko ndal usu pafna day hu fullara na, nam tak ki ni ko ndal mir ma his jivi ma sa wam ka dewɗina na.

¹⁴ Del kommi ko ndal walak lorra na, ko ɦini mayra ceɗi ta yaɗ ana topazza na. Tammi ko ndal sii tlokka ceɗira na, u ɦinira safirra duku.

¹⁵ Semmi ko ndal gu garak ma um coli kolo kay lorra na, vogom gol ay ko ndal Liban na, ko gu sedrena na.

¹⁶ Ŋgotlom jivi cocoo, heɓpa ay huwa, mbalatam halaŋ jivi coco a mbuɗ huu sana. Bananna ni na, galanna, ni ko ndaɗta na, agi gorɓii suu Yerusalemma.