SOOLLA VI SALOMON 4 - Boy Lonana

Namu

¹ Ndak jivi cocoo, galanda, ndak jivi ɦay. Irik ko ndal gugukka na, ay ŋgayra duk gojoli ma boɗi kakŋa. Tlimiɗ yak ko ndal dogoni ɦuguni suu mok ay u tasi bolowna na, fel ay kolo kay ɦinira Galaadta.

² Siikŋi ko ndal yoori timigii suu col ay hu li ma mbususi ki a cawasi tlimiɗisi kina na. Asi halaŋŋi taɓi ko tasi mba' mba' sa ka ɓorowosi kiɗi.

³ Vunuk ki mbusi jojora na ɦes, vunuk gol ay kurufu hu gojoli na ni jivi cocoo, ŋgayra na yalaɗ, kiriŋik tini jivi ɦay.

⁴ Delek ki coli kolo ko ndal zira vi David ta mini ŋguy huruɗukka na. Mbarina gaɓi huruɗ na buɓ, mbari ma vi suu gaaraŋ suu wi duuna halaŋ.

⁵ Pook u dlamba mbara ko ndal dliɓma na, ko gor ŋgoni suu vi dukkana suu ka taarasi duk pafnana na.

⁶ Faɗta heɓ wa ni, ŋgus ma fiɗigina mbuɗ wa may ni an min a tuɗ ha kay ɦini makka, mir u mbitla his jivira ka hura.

⁷ Galanda, ndak jivi cocoo, va ma co ka egek na ndeɗi.

⁸ Mbay ki egen tani, galanda, hin ɦinira Libanda ha kiyo, mbay egenu. Cuk ay ki kaŋga kay ɦinira Amanara, ta Seira ura Hermonda, hin li ma dlona huna ha kiyo, hin ɦinira zindilna kaɗta ha kiyo.

⁹ Golla, ndak golon ay na dewra, ni musukun ka tin kaŋgaɗi. Wayanda, galanda, ɦeɗew makka cuki kelekka an waɗ na ni, ndaɗ vanni daŋgayna.

¹⁰ Mayak van ki cocoo, galanda, mayak guruɗun ki su sum veŋŋa, his mbul mak ma egekŋa jivi su mbul ma his jivina bel bel.

¹¹ Galanda, vunukŋi ko ndal mbul yumma na, mbul yumma u mbiira ka funuku, baraw ma takŋa his ko ndal Liban na.

¹² Galanda, ndakŋi sene ma kaana ki ŋguy kamma, goloŋga vunuɗ ki dugira, yo ma yam ki dlaɓiina.

¹³ Mbo makŋa ka yorok u sene ma grenadinna nam ka vuɗa, tlesuu his jivina u gi nard ka huwa.

¹⁴ Nard u koso palatta, derekka u ŋgusugi suu daŋŋa ii mbitla his jivira u gi mir u aloena lay. Tlesuu jivi cocona halaŋ ka huwa.

Ndaɗu

¹⁵ Ndakŋi mbo ma ka yorok hu senena na, ni goloŋga ɓaɗ mbona ta col ay hu Libanda.

¹⁶ Dliɗ ki koloo, semeɗ ma mbayawna, mbaya semeɗ ma col ay dalina. Mbay sii hu sene manna. Ko hum tlena mbuɗ weleɗa. Ko, galanda, mbay hu sene maɗna, mbuɗ ti vuɗ tlesuu huruɗ minisina.