SOOLLA VI SALOMON 3 - Boy Lonana

Doyra daɗ ana ndaɗ tuɗ a halamu Ndaɗu

¹ Kay lay man ma buuna duk njeŋgera an ka halamu, sa ma hurun minim ɦayna. An halam ta ta ni fam kaɗi.

² An col kolo ŋguy ɦoŋzi ŋgolna hu voɗta lay, hu li ma sukŋa lay, an hal sa ma hurun minim ɦayna. An halam cocoo, fam kaɗi.

³ An ŋgaf u suu ka poy njeŋge a juɓ u ɦoŋzinana, «Agi wagi ma an minim ɦayna kaɗi su?»

⁴ An gasi un na ew ni ŋgaf ma hurun minim ɦayna ni na gaw. An vam kommi na gaw, ka min a gam kom oloɗi, tuɗum ay ki ta ta kalafi hu zi mayra sun vuɗun huruɗta.

Namu

⁵ «An dagiya, gorɓii suu Yerusalemma, suu jivi ko ndal dukka nana dliɗingi zoŋ manda koloɗi, gangi humun kolo jew bay li namma ndak ayɗi.»

⁶ «Sa ma col ay kolo ŋgoo bagi hu fulla ko ndal ndoos kura nana ni gege? Vaɗ ay ki hisna ko ndal mir u mbitla his jivira na.»

Ndaɗu

⁷ Gola ni lay ma vi Salomonna suu gaaraŋŋa na dok-karkiya, suu saɓak cocona ŋgufum yam ki na cutl, suu saɓak suu ay duk suu Israelnana.

⁸ Asi halaŋ ka u ŋgewna kosiya, tasi ki mini a duuna. Gegelay ka u ŋgew mamma njuni hurumu, a doo tam ko ndaa ma njeŋgena.

⁹ Mulna, Salomon, min lay mam ma ganam kolo gani u namma ni u gu ma ay Libanna.

¹⁰ Sem ma tin kaŋgana yoori ni u doonora, ŋgorom ma ki bunsuna ni u lorra, hurum ma buuna ni u baraw ma tlawna. Gorɓii suu Yerusalemma min lay mamma ni asiya, asi lammi u minda cocoo.

¹¹ Gorɓii suu Siyonna cukugi ay ki kiɗiki, gologi mulna Salomon. Nam ka u jumba mulla sum tinimba ay kamba kamu, ni hu buu ma nam a vi caambana, hu buu ma hurum furi cocona.