SOOLLA VI SALOMON 2 - Boy Lonana

¹ Anni ko ndal ɓo gu Saronna na. Ni ko paf ma hu ɦuɗugumbana na.

Namu

² Ko ndal pafna coli vay dam duk tlesuu siinara na, bananda an miniɗ ɦayra ha ki duk ndarayaɗ gorɓiina ni na may.

Ndaɗu

³ Ko ndal ŋgus moŋgora coli duk ŋgusugi suu daŋŋa, galanna, ha ki coli duk ndarayam gor njufiina ni na may. An kak u ŋgusummi hurun furi cocoo, vuɗum jivi funun su tlesuu daŋŋa bel bel.

⁴ Nam tuɗun hu zira ci summa, nam tuɗun hu li namma ni u minda.

⁵ Ҥan ti ma jivina u vuɗ gugutluna a ɦan saɓakŋa, koɗon tan u vuɗ maŋgora, kay ana tuguɗi zoŋga ka lanu.

⁶ Kom ma guluna ay gii ga u yanu, kom ma njufna ay kan kolo a koɗonda may.

Namu

⁷ An dagi haa, agi gorɓii suu Yerusalemma, an suuragi u sem dukka nana, dliɗingi zoŋ manda koloɗi, gangi humun kolo jew bay liiɗ namma ndak ayɗi.

Gola nam ka mbaa Ndaɗu

⁸ Humugi haa, ɓak ay cow ni del bananna, nam ka tuɗ aya. Taɓa ay kolo kay ɦinira tuɗ ay kay mbura cowna.

⁹ Tuɗ ay ko ndal zaa gayaŋŋa ɦawa na, wam ay ni ko ndal duk gaana na. Gola nam ka coli ŋgoo goŋga, nam ka gol ha duk ɦoŋ gu ma ii zira na.

¹⁰ Cemi ni nam ka njaɗan aya, «Tuɗuya, galanda, go jivva mbay tani.

Namu

¹¹ Ndolla daɓ wa, mbo lona jak ki wa da.

¹² Ɓo tlena cemi yak ki wa. Li ma gi soolla ndak wa, del gugukka ka tii ay ŋgoo bagiya.

¹³ Vuɗ tulumma saɗ ki wa, gugutluna halaŋ ka ɓoo, ɓoom ka his ay jivi cocoo, tuɗuya, galanda, go jiffa mbay tani.

¹⁴ Guguk manda tii ay kolo kay ɦinira, ta ka ŋgay hu zul ɦinira, takan irikka jivi ɦayra ay gige. Di delekka jivira ay na di an humuɗ na humge, takan vogoŋ ma jivina an golomu.»

Suɗu

¹⁵ «Vangi bayakka u goryoɗu, asi ka ɓalak senena kiyo, gugutlu maygina halaŋ cemi ka ɓoo.»

Ndaɗu

¹⁶ Galanna, ni manu, anni mam may. Nam taa yoori mamsina ay ni duk pafna.

¹⁷ Hu li ma faɗta heɓ wa, ŋgusna mbuɗ ki ŋgol wa ni aŋ mbaya, galanna, tuɗ ay ko duk gaana na. Ko ndal zaa gayaŋŋa na ay kolo kay ɦinira.