SOOLLA VI SALOMON 1 - Boy Lonana

Soolla vi Salomon

¹ Soolla su ndarayaɗna halaŋ ta Salomon ɓiiriɗta.

Ndaɗu u namu asi ɓak tasiya Ndaɗu

² Hinim a nam mboɗon hurum u kom ma gam ay kelenna. Kay minda nam mininɗa jivi su sum veŋŋa.

³ Nam irin jivi su mbul ma his jivina. Taŋ irin fayatta ko mbul ma his jivina na. Kay ndaɗta gorɓiina halaŋ hurusi haɗ kaŋ cocoo.

⁴ Van kolo hu duk koŋu, taɗanu, liŋiya, aŋŋi mul manna. Tuɗun ha kalafi hu ziiŋga buuna, «Puluɗuy tay ki u furira.» Geleɗey min maŋga, ndaɗ guruɗ sana ki su sum veŋŋa. Gorɓiina miniŋ cocora na ni u voɗoɗ daŋ may.

Banayasina Ndaɗu

⁵ An tan waraa, may ni an jivi cocoo, goora Yerusalemba, ni ko ndal biɗii zira vi Salomonda na.

⁶ Caa yaki kay tanda warraɗi, mbuɗun ki warra ni faɗta. Gorsen suu vi sunna mbuɗ ki honira u an halaŋ halaŋ, asi tinin ki a juɓ u sene gugutlu masina. Man anna an ka juɓum umbi may.

⁷ Dan ay gige, aŋ ma hurun miniŋ cocona, aŋ taa yoori maŋsina ni arage? Aŋ koɗosi tasi faali ni arage? Kay ka an hin a viɗ voɗ na cow cow a hallaɗi, ka jak keŋ yoori suu vi banayaŋŋana ɦawa na cow cowɗi.

Banayasina

⁸ «Lini ndak ka wiɗi ni goora jivi ɦayra gi tak ay kay sem timigiina, tuɗ gor ɦuguni maksina ay eg zira vi sa ma taa yoorina na tok.»

Namu

⁹ Ta an miniɗ ɦayra, ndak jivi coco ko ndal puspus ma kulumi ma vi Farawna ganira na.

¹⁰ Kiriŋik ay ŋgay jivira duk tlesuu kali humukŋa na yuluɗ, delek gol ay jivi coco duk ɦeɗew ma cuki kelekŋa.

¹¹ Ami hin dlak pidlik ma del kokŋa ni u lorra, lam vunum ki ni u doonora may.

Ndaɗu

¹² Hu li ma mul manna ka kaki hu li ma ti funa ni mbul man ma his jivina, hisim fam ha kiyo.

¹³ Bananna irinni ko ndal mbitla his jivira na, nam buu a koɗ tamba ni duk ɦoŋ poonu.

¹⁴ Bananna, duk sene gugutluna, ni ko ɓo ŋgusugi suu his jivi cocona na.

Namu

¹⁵ Galanda, ndak jiv cocoo, jiv makŋa kal ki na nde, irik golon ay ko ndal gugukka na.

Ndaɗu

¹⁶ Galanna, aŋ may ni jivi coco ɦay, aŋ kal ki saɓaki jiviya, lay may ma buuna mini jiviya.

¹⁷ Ziiyra mini ni u gu ma dlam ŋgol coco ma sedrena sak sak, ndaɗ mini ni u gu ma jivina halaŋ.