SOOLLA 99 - Boy Lonana

Lona ni mul ŋgolna

¹ Yawe ni mulna, suuna halaŋ dlak ndaana komu. Nam kak kay Serubim, sa sunda huulona, ndaŋgara ka dlak ndaana komu.

² Yawe nam ŋgol coco hu Siyon, nam kak mulna kay suuna halaŋ.

³ Ko suuna halaŋ geleɗeŋ seŋ ma ŋgolna, seŋ ki ni teteɗ.

⁴ Saɓak ma vi mulnana ni kay min gasira. Aŋ tin gaɗta ni aŋu. Gasira u ɗegeera ni hu Yakob, aŋ lasi ni aŋu.

⁵ Ŋgaagi Yawe, Looygina, goɓogi yagi ga fok dlam mamba mulla, nammi teteɗ.

⁶ Moiz u Aaron duk muli masi suu li ɓivunna, Samuel ka duk suu yam semma, asi ka yi Yawe, nam humusi wa may.

⁷ Nam ɓakasi ay kolo duk ɗugulla, asi hum u dlara nam dasirara may, hum u gaɗta nam ɦasira kara may.

⁸ Yawe Loomina, aŋ hoŋosi dira ni u taŋga, aŋ mbuɗ egesi ni a Lo ma hurum fiyekŋa, na may aŋ kaɓakŋa kay sun masira cora.

⁹ Ŋgaagi Yawe Looygina, goɓogina kay yam ɦini mamba teteɗta, kay Yawe, Looygina, nam teteɗ.