SOOLLA 89 - Boy Lonana

Galamba vi Lonara u David

¹ Soolla haɗta vi Etan ma Ezrana.

² Yawe, an min gi soolla geleɗeŋga na tew tew. Vunun min a di ki kay ɗegee maŋga hu basara ŋgolo.

³ Na daŋ may jivi maŋga ka haɗanu, aŋ tin ɗegee maŋga ha kolo huulona.

⁴ Aŋ di ana, «An njun galamba u suu an manasi kina, an su tan ki u David, saan ma sunda, ana,

⁵ an hiniŋ njafaŋ ka ni a fafaɗta. An kakaŋ hu dlamba mulla ni kay basara halaŋ.»

⁶ Yawe, ko huulona lay geleɗeŋ dlaaŋ ta mbuɗ mbuɗta, suu teteɗ suu tokina mba ŋgaaŋ ɗegee maŋga.

⁷ Sa ma ka kolo ko Yawe nana ni gege? Duk loogi suu ɦawana ma tli tam u Yawena ni gege?

⁸ Hu tokka vi suu teteɗna Lona va ma ŋga u nam kaɗi, tlesuu ŋguyuŋŋa halaŋ ka laŋ ndaaraŋu.

⁹ Yawe, Lo ma vi suu sunda huulona, sa ma saɓak ko aŋ, Yawe nana ni gege? Ŋguy ki kaŋ halaŋŋi ɗegee maŋga.

¹⁰ Aŋ ka ŋgo mbo lum ŋgolna ni aŋu, hu li ma nam ka bilna kolona, aŋ seŋem ga ni aŋu.

¹¹ Aŋ ci suu Egiptena ki halaŋŋi aŋu, aŋ njay suu duu u aŋŋa ki u bik koŋ ma saɓakŋa.

¹² Huulona ni maŋu, ndaŋgara ni varaŋ lay, duliyara u begera ka huruɗta halaŋ lasi ni aŋu.

¹³ Mbayawra u dalira aŋ lasi ni aŋu, ɦinira Taborra ura Hermonda ka li furira u seŋu.

¹⁴ Aŋŋi malaŋ saɓakŋa, koŋ ma njufna su ki kay dlara halaŋ.

¹⁵ Dlam maŋga mulla huruɗ ni jivira u ɗegeera, gasira u ɗegeera ka tak ki hu dlara aŋ laɗta halaŋ.

¹⁶ Furira ka kay suu may suu goɓoŋ u hurusi dewna, asi hin tuɗ ni u kiɗik maŋga, Yawe.

¹⁷ Asi luu luu ma furira u seŋ hu buuna halaŋ, kay ɗegee maŋga asi hin col koloo.

¹⁸ Na daŋ may aŋ ka ɦami saɓakŋa tew tew, u min maŋga ami ka su kay suu babali mamsina.

¹⁹ Mbari mamina ni Yawe, mul mamina ni ma Teteɗna vi suu Israelna.

²⁰ Fok jewra aŋ ɓak suu maŋsina hu doyra, aŋ di ana, «An hin njun u suu hurusi ɦiŋŋa, An man goozoŋŋa duk suu mansina.

²¹ An fi David a saan ma sunda, an mbuɗum ki teteɗ ni u mbul man ma teteɗna.

²² Kon ka tini egem tew tew a njun umba, kon hin ɦam saɓakŋa may.

²³ «Sa ma babali mam ka ndak a su kambi, suu gonok mamsina ka hoŋom yam gaɗi lay.

²⁴ Kay an cam suu gonok mamsina ha ki fokomu, suu ŋgulumma an casi ki halaŋ.

²⁵ «Jivira u ɗegee manda ka egem tok, nam hin duu ni u senu.

²⁶ An hin ɦam lum ŋgolna ni mamu, ay hu lum ŋgol ma dukŋa ta ta mbo lum ma Efratana ni varamu.

²⁷ «Nam hin yan ana, Bunu, Loonna, ɦini may ma suɗunna.»

²⁸ An may ni nam hin lini a goron ma ŋgolna, ni sa dlam ŋgol su muli suu kay ndaŋgara halaŋŋa.

²⁹ «Ɗegee manda ka u nam tew tew, galam manda u namba ka bulum kiɗi.

³⁰ An hin golom njafam ha na gak gak, dlam mamba mulla ka tli kiɗi a fafaɗta.

³¹ «Lini goryom hinin gaɗ manda kiyo, ka tuɗ u ɗegee mandaɗi,

³² lini asi ŋgelen vun gaɗ manda ka li u gaɗ manda jiviɗi,

³³ an hin gaɗasi ni u tokolora. Asi hin fi waɗta kay coosira.

³⁴ «Lay ni ka hin ɗegee manda u namba ki kaboyɗi, ka mbuɗ galam manda u namba ki kaboyɗi.

³⁵ An ka ɓeŋ galam mandaɗi, an ka mbuɗ va ma kal ay ki fununnaɗi lay.

³⁶ Kay an suu tan ki u teteɗ manda, yan dew ni a fafaɗta. Ҥawaa, an ka mbaɗ David u dlara an dambaraɗi.

³⁷ Njafam hin hin ka na gak gak, dlam mamba mulla hin ki fokonni ko faɗta colira na,

³⁸ ko tilna ka tew tew coli eŋga na, ni va ma ka diki kay ɗegeera hu ɗugullana.»

³⁹ Na may aŋ Lona hin noy saaŋ ma aŋ Fuurumma kiyo, aŋ hin mbuɗ huruŋ egemu.

⁴⁰ Aŋ mbuɗ galam maŋga u saaŋ ma sunda kiyo. An cukum jumba mul mambanara ki ga duk doroɓma, mbuɗuɗ nje njee.

⁴¹ Aŋ toom gulumun ma kay ziimmana ki gaa, aŋ ŋgalam ziim ma coli eŋŋa kiyo.

⁴² Suu jak hu voɗta ɦurum tlena kiyo, suu mam suu vok zina ka panamu.

⁴³ Aŋ ɦal saɓakŋa maŋ suu babali mamsina, suu gonok mamsina halaŋ ka furiya,

⁴⁴ aŋ mbuɗum ŋgew mamma kawi komma kam tok. Aŋ njun ka kam hu li ma duunaɗi.

⁴⁵ Aŋ daɓam bibiŋil mamba ki wa, gam dlam mamba mulla ki ga wa lay.

⁴⁶ Aŋ hoŋom buurum ma u zoŋ tamma ki dagani, cemi an mbuɗum ki zolona wa.

⁴⁷ Ҥi, Yawe, aŋ ŋgay taŋ ki na gak gakŋi amege? Hin yaaŋga a tuɗ fok na gak gak su?

⁴⁸ Saa ay kay buurun ma hu daŋgarana, aŋ min sa warna ni kay buu ew ɦawaa.

⁴⁹ Sa ma kak iiri na gak gak ka miɗɗina ni gege? Sa ma suɗ ki ko lina vi suu miɗina ni gege?

⁵⁰ Bu Suuna, jivi maŋga ay fok jew dayra tuɗ ni arage? Aŋ su taŋ ki fun David kay ɗegee maŋga.

⁵¹ Bu Suuna saa kay suu sun maŋsina ka lassa, kay suu maŋ suu aŋ ka golosina halaŋ.

⁵² Yawe, suu babali maŋsina ka lasaŋ suu maŋsina, asi tof yoyona kay saaŋ ma Lona Fuurumma.

⁵³ Gi deɓpa maŋ Yawe a fafaɗta. Amin u Amin.