SOOLLA 79 - Boy Lonana

Yoora kay zi ma Yerusalemma ɓeŋ kira

¹ Soolla vi Azaf. Ҥi, Lona, suu bay vina cuk ki hu mbassa vi suu maŋsina wa, asi mbuɗuŋ Ziiŋ ma Teteɗna ki njenjera, to zi ma Yerusalemma ki ga lay.

² Asi caŋ suu sun maŋsina ki cocoo, tliwisi hin ha ki kolo ni maŋ laygi suu pii kolona, tliw suu maŋ suu ɗegeena hin ki ni maŋ tle bagina.

³ Asi vo busu suu maŋsina ki kay yam zi ma Yerusalemma halaŋ, suu maŋsina sa ka pasi gaɗi lay.

⁴ Suu vok ziimi suu ŋguyumina halaŋ ka ŋgulumiya, suu ŋguy kamina halaŋ ka panamiya.

⁵ Ҥi, Yawe, ya ndaɗta tuɗ ta ta tew ni ara na gage? Yaaŋga ŋgalami tami ko kura nara hin hinimi ni saɓage?

⁶ Mbuɗ yaaŋga ha kay suu ka waŋgina, ha kay muli suu ka goɓoŋ aŋ Lonaɗina.

⁷ Kay asi ɦurum zi ma vi Yakobma ki wa, yow tlesuu vi suu Israelna ki halaŋ.

⁸ Ŋgaami cora somoyomi laɗta kamiɗi. Mbay na zak wami hahawamiya, kay ami ni suu hin ki dagan cocona.

⁹ Njun umiya Lona, sa ma suɗumina. Kay a suuna ŋgaaŋ seŋu. Buɗumi kiyo, bulumumi coomira kiyo a ami ŋgaaŋŋi seŋu.

¹⁰ Ka hin suu ka waŋ aŋ Lonaɗina joɓomi ana, «Loosina arage» ɗi. A njaf suu ɦawana wi dlara ni umiya sa sukul suu maŋ suu asi casi kina.

¹¹ Hin a yira vi suu daŋgay maŋsina tew ha egeŋu, bikiŋ ŋgol cocoo. Hin suu daŋgay maŋsina lak iiriya.

¹² Suu ŋguyumi suu ka panaŋ seŋŋa aŋ warakasi u coosira seŋ kiɗisiya, Bu Suuna.

¹³ Ami suu maŋsina, yoori suu ka hu katlaŋ maŋgana, ami hin geleɗeŋ na gak gak, di ki kay ŋgol maŋga hu basara halaŋ.