SOOLLA 7 - Boy Lonana

Cenda vi sa ma ɗegee ma ka lasna

¹ David gi sool ndaɗta ni ko Kus ma hu njaf Benjaminna.

² Yawe, Loonna, an ŋgay tanni egeŋu, suɗun ki ko suu lasanna, buɗun kiyo.

³ Kay nam van hawan ki ko dlona naɗi, kay sa daŋ ma njun kan kaɗi.

⁴ Yawe, Loonna, lini an li na ni, lini dla cora li kon wa ni.

⁵ Lini an li dla cora eg sa ma ka kaki u anna ni, lini an ɓalak vaŋ ndarayan suu gonokka ki bay uɗuni,

⁶ Ni saan ma gonokka cuɗun un, ay vanu. Ko nam baan iiri manda kiyo, ko nam bulumunda kaŋga duk ndaŋgara.

⁷ Yawe, col kolo u yaaŋga, col kolo eg suu babali mansina. Dliɗ taŋ ki kolo kanu, aŋŋi sa ma tin ɗegeerana.

⁸ Ko suu hu duliyara suu ŋguyuŋŋa halaŋ, aŋ mbuɗ ay kolo kasiya.

⁹ Yawe kaɓakŋa kay suuna. Takan jivi manda kiyo, Yawe, u ɗegee manda kay an li va kaɗi.

¹⁰ Doo dla cora suuna landa egenda kiyo. Col suu ɗegeena eŋe. Aŋ ma wi huu suuna kurufuna, Lo ma ɗegeena.

¹¹ Mbari manna ka ni eg Lona, ma suɗ suu hurusi ɗegeena.

¹² Lona ni sa ma kaɓakŋa ɗegeena. Nammi Lona ma ndak a ɓeŋ hurum hu buuna tew tew.

¹³ Ni kay suu babali mamsina, nam guu si ŋgew mamma. Nam tin deŋ mbuuru mamba a munda.

¹⁴ Nam ka min kawi ma ci maɗna, nam minni mbuuru mayra ŋgal zira.

¹⁵ Sa ma li dla cora ka vuɗ sulukŋa, nam vi wiina u dla cora, nam vuɗ ni kaboyna.

¹⁶ Nam ka vek zulla kaŋga day, nam tamba hin ndi hu zul ndaɗta, ni nam tok.

¹⁷ Dla coomba hoŋŋi kay tamba, suluk mamma vam kaŋga wa.

¹⁸ An may ni gi deɓ Yawe kay jivi mamba, an gi soolla maŋ Yawe ma Kolo Dayna.