SOOLLA 22 - Boy Lonana

Loonna, Loonna, aŋ noyon ki ni kay mege?

¹ Soolla vi sa ma fok suu gi soollana, soolla gaɗ ŋgarapii a dukka col tira, ni soolla vi David.

² Loonna, Loonna, aŋ noyon ki ni kay mege? An yi kolo ana, njununu, aŋ ɦuɗ ha ki egen na day ni amege?

³ Loonna, an ka yaŋ faaliya, aŋ humunɗi ni kay mege? An yi njeŋge lay ni fi hoŋ di ka tuɗi.

⁴ Na may aŋŋi sa ma teteɗna, aŋ ka kaki kay dlam maŋga mulla. Suu Israelna halaŋ ka gi soolla geleɗeŋga.

⁵ Somoyomi suu jewna hin tasi ay ni koŋu, aŋ hin buɗusi ay ki may.

⁶ Asi yi ay kolo egeŋu, aŋ hin buɗusi ay ki may, asi tin hurusi ni kaŋu, asi hin mbuɗ ka zoloɗi.

⁷ Anu, anni njufulna ɦawaa, ka sa warɗi, suuna ŋgulun cocoo, noyon ki lay.

⁸ Gegelay ma ŋgafana ni pananu, asi san unu, saɗ yasi ki irin na na.

⁹ Asi dan ana, «Mbuɗ iriŋ eg Yawe, nam hin buɗuŋ kiyo, nam hin suɗuŋ kiyo, kay nam miniŋu.»

¹⁰ Aŋu, aŋ golon ay kalafi huu sunu, aŋ golon hu li ma an ay ci pona lay.

¹¹ Ay hu li ma an kal ay ki huu sun na gawni, an hin tanni hu duk koŋu, ay kurufu huu sun lay ni aŋŋi Loonna.

¹² Kak ha ki egen na dayɗi, kay dlara fanda ka tok, sa ma njunun kaɗi.

¹³ Suu duuna suu ko bolo mbutlina nana ŋguyun wa, suu masisina kuluɓ ay kan ko mbutlugi suu ay Basanna na.

¹⁴ Asi mal vunusi ay ki ko ndal dlona na, asi sawalla hal dlara vanda.

¹⁵ Saɓak manna ni ko yona na daɓ ki wa, sokon paɗ ki hin liim ki lay. Mukulun mbuɗ ko do dabaŋga na, nam yoo ki hurunu.

¹⁶ Saɓakan so ki ko luɓuna na. Sinin narak ha ki kolo u yirɗin na faat. Aŋ gan ki duk buɗna ko suu ki miɗina na.

¹⁷ Suu cona halaŋ ŋguyun yan kiyo, asi ci tasi ay kan ko diginina na. Asi dakan kon lay, dakan sen lay.

¹⁸ An ndak ndum sokon ki dew dew halaŋ. Suuna ka wanu, asi ka golonu.

¹⁹ Asi ɓorowon baraw manna ki kosiya, baraw man ma daŋŋa asi cam ki ɓelera.

²⁰ Na may aŋ, Yawe, kak ha ki egen dayɗi. Ҥi, Saɓakanu, mbay njununu, mbay zak.

²¹ Suɗun iiri manda ki ko ŋgewna, suɗun tliwin ki ko diginina.

²² Holoton ay ki fun dlona, suɗun ki ko mek vunda. Aŋ hoŋon dira.

²³ An min daŋ seŋ ki maŋ gorsenna, an min geleɗeŋ ki duk suu tokina halaŋ.

²⁴ Agi suu li ndaa Yawena, geleɗegina, agi njaf suu vi Yakobma halaŋ, ŋgaagina, asi njaf suu Israelna halaŋ, lam ndaaramu.

²⁵ Nam noy sa ma wihawra ka ki hu las mambaɗi, nam ka ŋgay tam ki ko sa ma wihawraɗi lay, nam humum vunum hu li ma nam ka yi kolona.

²⁶ An min li dlara an vi vunun kaɗta. An min ŋgaaŋ ki fok suu tokina halaŋ, suu laŋ ndaaraŋŋa.

²⁷ Suu hoŋ yasi gaana ka ti ki u mayasiya. Suu hal Yawena ka ŋgaamu. Suu agina ni suu kak iri u furira din dinna.

²⁸ Ndaŋgara u taɗta halaŋ humuɗ gaɗu, hoŋ ay eg Yawe, njaf suuna halaŋ hin goɓ ga fokomu.

²⁹ Mulla ni maŋ Yawe, nam kak mulna kay njaf suuna halaŋ.

³⁰ Suu li furira hu duliyarana halaŋ hin goɓ kaŋga fokomu. Suu ka fi suɗtaɗina lay, hin mba goɓ ki ga fokomu.

³¹ Njaf maa dew hin sun Yawe, asi hin njaɗ boy namma ka maŋ njafasi lay.

³² Asi hin di ki kay ɗegee mamba, di suuna asi mba li dlara Lona miniɗta.