SOOLLA 17 - Boy Lonana

Cenda vi sa ma li va kaɗina

¹ Cenda vi David. Yawe ma ɗegeena, humun boy manna haa, tin humuŋu, humun cen manda. Ni cenda u hurun halaŋ, bay mbaɗta.

² Hinin kaɓak manna mba ni fokoŋu, kay iriŋ ka wi dlara ɗegeera.

³ Aŋ golon hurunu, njeŋge lay aŋ ka wanu, aŋ golon hurunu, fi co ka huɗi. Vunun ka di dlara coɗi lay.

⁴ An wi dlara suuna laɗta kay ndaɗta an gol tanu, an min li ni u gaɗ maŋga, an ka tuɗ hu voɗta vi suu las suunaɗi.

⁵ An tuɗ ni hu voɗ maŋga tew tew, sen jok ka ki keŋgi.

⁶ An ceneŋu, kay aŋ ka hoŋon dira. Ҥi, Lona, gi humuŋ ay gaa, humun boy manna.

⁷ Tak oo maŋga kiyo, aŋ sa ma suɗ suu ŋgay tasi egeŋŋa. Koŋ ma njufna suɗ suu laŋ ndaaraŋŋa, ki ko suu babali masisina.

⁸ Ŋgomon jiviya ko aŋ ka ŋgom wawal iriŋga na, ŋgayan ga u garaŋaŋu.

⁹ Suɗun ki ko suu hal a baan kina. Ko suu duu u an suu ŋguyun yanna.

¹⁰ Asi dug hurusi ki eg suuna, vunusi njaɗni njaɗta ŋga tara.

¹¹ Hu li ma an tuɗ huna halaŋ asi ŋguyun yanu, asi halni dlara a gan ki kaŋgara.

¹² Asi ni ko dlona na, min a komon kiyo, ko goo dlo ma buuri a juɓ tliwna na.

¹³ Col koloo, Yawe, ŋgafasiya, hoŋosi ha ki dagani. Suɗun ki ko suu co asina u ŋgew maŋŋa.

¹⁴ U koŋ aŋu, Yawe, suɗun ki ko suu asina. Asi halni tlesuu asi minisina halaŋ. Hu li ma asi ka hu duliyara, oyosi saa masira u lassa. Las ndaɗta hin ha kay goryosi lay. Goryosi hin hiniɗ ha maŋ masisina may.

¹⁵ Anu, anni sa ma jivina, kay ndaɗta an hin waŋu. Hu li ma an dliɗ ki kolona, an furiya kay an waŋ iriŋu.