SOOLLA 139 - Boy Lonana

Wira vi Lona ta mbuɗ mbuɗta

¹ Soolla vi sa ma fok suu gi soollana, soolla vi David. Yawe, aŋ lanni aŋu, aŋ wanu,

² lini an buuri gaa, kaki koloo, halaŋ aŋ ka wanu. Ay ki day ni aŋ wi dlara an laɗta ki dew dew halaŋ,

³ aŋ ka golon voɗ manda u liin ma buuna halaŋ, aŋ golon voɗ manda hu liiɗna halaŋ.

⁴ Boy ma vunun dam ka tuɗina lay, Yawe, aŋ wam ki wa ɗow.

⁵ Dagan lay, fokon lay, aŋ ka u an tok, aŋ tin koŋ kanu.

⁶ Wiiŋŋa mbuɗ mbuɗta su ki kanu, ndaɗ ha ki kolo kan day an ndak ka a faɗɗi.

⁷ An ndak a tuɗ ki day eg musuk maŋŋa ni arage? An ndak a pii ki a ŋgay tan ki koŋga ni arage?

⁸ An tuɗ ni kolo huulona ni aŋ ka ni huwa. An tuɗ hu lina vi suu miɗina lay, aŋ ka huwa.

⁹ Lini an pii ki kolo u garaŋga a tuɗ kak ha ki ŋgoo mbo lum ŋgolna lay, aŋ ka ki huwa.

¹⁰ Hu li namma ni koŋ ka un hu lay, saɓak maŋŋa ka ŋgomonu.

¹¹ An ɓak tan ana, «Mariyaɗ ni ndufunda kuluɓ ki kanu, ko kiɗikka ŋguyunda mbuɗ ki ndufunda.»

¹² Lini ndufunda lay ka iriŋ aŋ ndufunɗi, njeŋgera ki iriŋ kiɗik ko faalira na. Ndufunda ni ko kiɗikka na.

¹³ Aŋ minin gilisinni aŋu, aŋ golon ay huu sunni aŋ lay.

¹⁴ An gaŋ deɓ cocoo kay aŋ lanni a va ma jivi su tlesuu daŋŋa. Sun maŋga aŋ laɗta mbuɗ mbuɗ cocoo, na daŋ may an waɗ ki jiviya.

¹⁵ Sokon halaŋ ma iriŋ ŋgay kaɗi, hu li ma aŋ lan ay ki ŋgayna, lan ay ki duk ndaŋgara kaŋga dayra.

¹⁶ Hu li ma an bay li huu sun tuna lay ni aŋ wanu. Buu manna kay ndaŋgarana ki ɓiiri koŋ hu magaa maŋga lay, ni bay buu namma gijaŋŋa tu lay.

¹⁷ Lona, dlaaŋga aŋ ŋgaaɗta su ki kan cocoo, fiyekeɗ suun ki na day.

¹⁸ An min a ndumuɗu ni ndaɗ bolow su ŋgetlna, an dliɗ ki kolo na ni aŋ egen zow.

¹⁹ Lona, lini aŋ a ci suu bay ɗegeena kiyo, agi, suu ci maɗna ni, ɦuɗ tagi ha ki egen na nde.

²⁰ Suu babali maŋsina yaŋ seŋŋi u ganyamba ɦawaa, asi yam na ni a ɓeŋ kini suuna.

²¹ Yawe dukun kini gonokka u suu babali maŋsina, suu gonokka u aŋŋa mayasi ka kanɗi.

²² An ka minisiɗi ni u voɗoɗu, asi mbuɗ ni suu babali mansina.

²³ Lona golon hurunu, wan hurun kiyo, tukunu, wan saa manda.

²⁴ Gola, lini an ka tuɗ hu voɗta cora, tuɗun hu voɗ mayra ka din dinda.