SOOLLA 135 - Boy Lonana

Bibiŋilla vi Yawera

¹ Halleluya! Geleɗegi sem Yawe, geleɗegina agi suu sun Yawena.

² Agi suu ka lagi hu Ziŋ Yawera kurufu hu kaana hu Ziŋ Looyginara.

³ Halleluya, Yawe, nam jiviya. Gagi soolla geleɗemba, nam min suuna cocoo.

⁴ Kay Yawe man Yakob ni namu, suu Israelna ni suu mamsina.

⁵ Na daŋ may an wi ana Yawe dlam ŋgolo, Bu Suuna maygina su loogi suu daŋŋa halaŋ.

⁶ Dlara Yawe miniɗta halaŋ nam laɗu, kolo huulona lay, ga kay ndaŋgara lay, duk mbona lay, ga hu zul ŋgolla lay.

⁷ Ɗugulla tin ay hu vun ndaŋgara daɓ ayra day, ndaɗ li weleɗta ki jew hu li ma ndaɗ ka si mbonana, nam dug vun babaana ki hu li ma nam ay huna.

⁸ Nammi sa ma ci goryoŋ suu Egiptena suu ŋgolona kina, col ha kay gor suu warna ta ta kay yoorina.

⁹ Nam li dlara mbuɗ mbuɗta duk suu Egiptena, kay a kaɓakŋa kay Faraw u muli mamsina.

¹⁰ Nammi sa ma ci njaf suu daŋŋa ki cocona, ci muli suu saɓakŋa ki coco lay,

¹¹ Sihon, mul ma Amoreenna, Og, mul ma Basanna, u muli suu hu mbassa Kanaanda halaŋ.

¹² Ŋgoo dagan nam ɦasi mbas masira ki maŋ suu Israelna a jona.

¹³ Yawe, asi ka yaŋ seŋ tew tew, Yawe, asi hin yaŋ seŋ hu basara basara tew tew.

¹⁴ Kay Yawe li ɗegeera kay suu mamsina, nam wi hahaw suu mamsina.

¹⁵ Fuli suu vi suu daŋŋa ni lorra u tusuna ɦawaa, minisi ni suu warna.

¹⁶ Asi vunusi ka may ni ka njaɗɗi, asi irisi ka may ni ka wiɗi,

¹⁷ asi humusi ka may ni ka humbi, musuk na nde lay ka kal ay ki funusiɗi.

¹⁸ Suu minisina ni ko asi na may, suu tin saa masira kay fulina halaŋŋi na may.

¹⁹ Agi suu Israelna gagi deɓ maŋ Yawe, agi suu vi Aaronna gagi deɓ maŋ Yawe.

²⁰ Agi njaf suu vi Levina gagi deɓ maŋ Yawe, agi suu li ndaa Yawe, gagina deɓpa.

²¹ Ay hu Siyon day, gagi deɓ Yawe, hu Yerusalem, ɦoŋzi mamma. Halleluya.