NEHEMI 13 - Boy Lonana

Dlara Nehemi miniɗ iriɗ ŋgoo daganda

¹ Hu coki ndaɗta ni asi ndum magaara vi Moizza ki fok suuna, asi hin fi hu ɓiiri ana sa ma Amonna u sa ma Moabma hin ka kal duk suu vi Lonanaɗi.

² Kay ana asi mbay ka fok goryoŋ Israelna u mappaɗi lay, yonaɗi lay. Moab gus Balaam kasi a gasi vunna ni gusiya, may Looygina mbuɗ givun namma ki paɗvunna.

³ Hu li ma asi hum gaɗ ndaɗta na ni, asi ɓorow ii gegelay ma Israel ma ii busum tlumina.

⁴ Ay fok jew ni mul ma li ɓivunna, Eliyasib, ay ki tini kay gol u zigini suu vi Looyginana, nam somora u Tobiya ni na tok.

⁵ Nam min zira ŋgolla. Asi ay jew cuk tlesuu ɦasi ki ɦalla ɦawarana huwa, mbitla, tlesuu sunda, nus fuɗ wa ble ma doogona, sum veŋ ma wilina u mbulna suu ɦal voɗta ki kasi maŋ muli suu li ɓivunna, suu gi soolla u suu kak fun zira u tlesuu yowosi ay maŋ muli suu li ɓivunnana lay.

⁶ Hu coki ndaɗta na ni, an ay ka Yerusalemɗi, kay ana hu basara vi Artazerzes ta dok-hindi yam mba' ta mulla hu Babilonda ni an hoŋ ay ki eg mulna. Na may kak njokŋi an hin joɓ mulna kay koɗ tanu.

⁷ An hin hoŋŋi Yerusalem, humun hin gan kay dla cora Eliyasib laɗ eg Tobiya minim zira ki hu taraŋ zira vi Lonara.

⁸ Hurun ɓeŋ ki cocoo. An gijaŋ yow tlesuu hu zira vi Tobiyana cukusi ay ki kiɗik ɗaŋ.

⁹ An hin di olo ana mbuɗ ziginina ki teteɗ. An hin yow tlesuu sun suu hu zira vi Lonara aya, tlesuu ɦasi ɦawana u mbitla.

¹⁰ Asi jokon boyna ki ana tlesuu a ɦasi maŋ suu Levina ɦasisina kaɗi, suu Levina u suu gi soolla u suu li sunda pii kiyo, gegelay tuɗ ki hu ziim ma bagina.

¹¹ An yal suu kaɓakŋa dasi ana, «Ziŋ Lonara asi noyoɗ ki ni kay mege?» An hin tokosi eg tasi hin tinisi ki hu li ma sunda.

¹² Na ɗaŋŋi suu vi Yudana gegelay mbay u nus fuɗ wa ble ma doogona, sum veŋ ma wilina u mbulna a cukusi hu li ma ɗokka.

¹³ An ɦal gaɗta maŋ mul ma li ɓivunna, Selemiya, u sa ɓii dlara, Sadok, u ma Levina, Pedaya, sa ma njun usina ni Hanan ma goŋ Zakurna, goŋ Mataniyana a asi gol tle asina kay asi suu ɗegeena. Asi ni suu hin ɓorow ii tlena ki maŋ gorsesinana.

¹⁴ Humuŋ gaŋ ay kanu, Loonna, kay dla ndaɗta, aŋ bulum ɗegeera an laɗ kay zira vi Loonna, kay sundara kiɗi.

¹⁵ Hu buu namma ni an wi suu vi Yudana to wana hu maɗakŋa u sesiya, ni hu buu ma sabatna. Asi yow usuna tuɗum vo may, ɗag sum veŋŋa kay korra may, wana u vuɗ tulumma u tlesuu nek suu daŋŋa zeɗ zeɗ lay a tuɗusi Yerusalem hu buu ma Sabatna. An neesi yasi ki hu buu ma asi gus tlegeyesi suu tira kina.

¹⁶ Suu Tir suu kaki hu ɦoŋzinana mbay u kulufna u tlesuu gus suu daŋŋa zeɗ zeɗ lay, suu asi gususi ki hu buu ma Sabatna maŋ goryoŋ Yudana lay ki hu Yerusalem layna.

¹⁷ An yal suu ŋgolo suu vi Yudana hin dasi ana, «Agi lagi dla cora a panagi buu ma Sabatna na ni kay mege?

¹⁸ Somoyogi li dla ndaɗta ay ka ni naɗi su? Na ɗaŋŋi Looygina mbaaygi dla cora ay kaygi lay kay ɦoŋzina lay ni naɗi su? Na may agi u panda panagi buu ma Sabatna, agi mbuɗugi yara vi Lonara eg suu Israelna ŋgolla ni na.»

¹⁹ Hu li ma vun grek ma Yerusalemma gijaŋ mbuɗ ki u ŋgusuna jew buu ma Sabatna, an di ana duk ii zira, an hin di olo ana malaɗ kiɗi ta ta ŋgoo buu ma Sabatna. An tin suu man suu li sunda ɦiw fun grekŋa ka a va nek kal ay vo hu buu ma Sabatnaɗi.

²⁰ Suu gus tlena u suu gususi kina zeɗ zeɗ halaŋŋi buu njeŋge yasi dew ɗowba mba ki keŋ Yerusalem.

²¹ An neesi yasi dasi ana, «Agi buurugi ki bunsu fun gulumunna ni kay mege? Lini agi hoŋ li wa na olo ni an hin yowogiya.» Col ay hu li namma day ni asi ka mbay hu buu ma Sabatnaɗi.

²² An di suu Levina olo ana asi mbuɗ tasi ki teteɗ a mbay gol vun grekŋa a li u buu ma Sabatna may. Kay dla ndaɗta may ni humuŋ gaŋ kanu, Loonna, wan hahawan u ɗegee maŋga ŋgolla.

²³ Ni hu buu namma lay an wi suu Juif suu ɗum boyogi suu Asdodna, Amonna, Moabma.

²⁴ Nus goryosi ɓakŋi vun Asdodna, sa dukusi dew lay ma tak tam ki ana nam ɓak vun Juifna kaɗi, may ɓakŋi vun ma vi Suunana, vi suu hiŋŋana.

²⁵ An yalasi hin gasi vunna. An poŋ njufii suu dukusi ɦiw hin paɗasi tlimiɗ yasi kiyo, olo an hin suurusi ki u sem Lona ana, «Hagi gorɓii magisina maŋ goryosiɗi, yowosi maŋ goryogiɗi lay, maŋ tagiraɗi lay.

²⁶ Ni kay dla ndaɗta mul ma Israelna, Salomon, li dla cora ka ni naɗi su? Duk njaf suu bolowna halaŋŋi mul ma ko nam na kaɗi. Loomma minim coco hin tinim mulna kay suu Israelna halaŋ. Doli ɗini, nammi sa boyogii suu koyogina taɗam ki hu dla corana.

²⁷ Kagi agi may ni ami ka hum ana agi ka li dla cora ŋgol ndaɗta a mbuɗ tagi ki njenjera ii Looygina u ɗumba ɗum boyogi suu koyoginaraɗi.»

²⁸ Goŋ Yoyada maa dew, goŋ Eliyasib, mul ŋgol ma li ɓivunna na ni kunuŋ Sanbalat ma Hormina. An dikim tinim yam ha ki egen na day.

²⁹ Humuŋ gaŋ kasiya, Loonna, kay ana asi mbuɗuŋ sunda li ɓivunnara ki njenjera, u galamba vi muli suu li ɓivunna u suu Levina.

³⁰ An mbuɗusi ki teteɗ u suu koyogina an hin tinisi fun sun masira, muli suu li ɓivunna, suu Levina, gegelay fun sun mamba.

³¹ An hin hoŋ sun gu ma ɦam ɦawana balamam hu liim ma ŋgaayna, u vuɗ tlesuu jewna lay. Humuŋ gaŋ kan u jivi maŋga, Loonna.