NDUMBA 9 - Boy Lonana

Buu ma li Luu ma Pakŋa huna

¹ Yawe ɓak ay u Moiz ŋgoo bagi kay ɦinira Sinayra, ni hu basara mbara hu cokira asi cuk ay ki hu mbasa Egiptera, hu til ma jewna, nam dam ana,

² «Ko suu Israelna li luu ma Pakŋa ni hu buu ma ŋgaamma.

³ Ni hu buu ma doogo yam fiɗina hu til namma, ŋgarpiira agi li luu ma namma. Agi li luuna ni ko gaɗta dagira kay luu ma Pakŋa na dege dege.»

⁴ Moiz di suu Israelna ana asi li luu ma Pakŋa.

⁵ Asi li luu namma ay ni ŋgoo bagi u ɦinira Sinayra, ni hu buu ma doogo yam fiɗina hu til ma jewna ŋgarpiira. Suu Israelna li ni ko Yawe dasi ay fun Moizza na may.

⁶ Na may suu dukusi ɦiw ni tin kosi ay eg maɗna, asi mbuɗ ki njenjee, asi ka ndak a li luu ma Pakŋa hu buu nammaɗi, hu buu namma gaw ni asi di gi Moiz u Aaron ana,

⁷ «Ami cemi ni ki mbuɗi njenjee kay ami ŋgen komi ay eg sa ma miɗina. Ami ki doori a mbaa tlegeyemi ay maŋ Yawe hu buu ma karamma ko suu Israelna halaŋ lira naɗi ni kay mege?»

⁸ Moiz dasi ana, «Juɓugi tuwa an hum dlara Yawe hin daɗ ay kay boy maginara ay tuwa.»

⁹ Yawe di Moiz ana,

¹⁰ «Aŋ di suu Israelna ana, hu li ma sana kal tam ay hu dlara njenjera wa ŋgen tam ay eg sa ma miɗi wa, ɗowba nam ki hu koyra dayra, dla ndaɗta ni magi lay maŋ goryogi suu ka ŋgorogi daganna lay, nam ndak li luu ma Pakŋa a ŋga Bu Suuna.

¹¹ Li luuna ni hu buu ma doogo yam fiɗina hu til ma mbana ŋgarpiira, asi kom goo timiina u fu ma bay kuffa dukumma, u usu ma galaana may.

¹² Asi ka hin tliw maa buu koloɗi, asi a kom tliwna ni ka kus ii sokŋa kiɗi lay. Asi li luu ma Pakŋa ni ko gaɗta di kam ana lam nara na may.

¹³ May lini sana ki teteɗ tuɗ ka ki koyɗi lay, min ka a li luu ma Pakŋaɗi, sa namma hin cam ki duk suu mamsina. Kay nam ɦal ɓivun mamma ka maŋ Yawe hu buu ma ŋgaam kinaɗira. Sa namma hin zii warak ma vi dla coombana ni namu.

¹⁴ Lini koy ma ki cuki zina dukugina min a li luu ma Pakŋa a ŋga Yawe ni, nam mba li ni u gaɗta di kay luu nammara may. Gaɗta kay luu ma Pakŋa ni fun taɗ dew, kay sa vona lay kay koyna ni na lay.»

Ɗugulla kolo kay Mbutluɓ ma Tokkana

¹⁵ Hu buu ma asi min Ziŋ Lonara kina ni ɗugulla kuluɓ ki kolo kaɗ na dlim kolo kay Mbutluɓ ma Galamba. Njeŋge ni ɗugulla li kiɗikka kasi ta ta fo lina u ndaɗta.

¹⁶ Ɗugulla ay li kasi ni ko ndaɗta na tew tew, njeŋge ni ndaɗ li kiɗikka kasi u kura.

¹⁷ Hu li ma ɗugulla ka ki kay Mbutluɓ ma Tokkana wa ni, suu Israelna mbee hu buu namma gak gak, li ma ɗugulla tuɗ col huna ni asi vi ziisi ni hu li namma gaw may.

¹⁸ Suu Israelna mbee zina ni u dira vi Yawera, li ma asi a cuk huna ni u dira vi Yawera lay. Hu li ma ɗugulla ka kay Ziŋ Lonara gak gakŋa ni asi ni hu gak gak may, ka jok usiɗi.

¹⁹ Hu li ma ɗugulla ka kay Ziŋ Lonara gak gakŋa ni, suu Israelna ka sun Yawe gak gak may. Asi ka jok usi hu li ma daŋgi.

²⁰ Buu maari ni ɗugulla kak kay Ziŋ Lonara ni buu maa ew daŋ, asi cuk na ni u dira vi Yawera, asi hin mbee zakŋi u dira vi Yawera lay.

²¹ Hu buu maari ni ɗugulla kak kay Ziŋ Lonara ni buu dew ɦawaa fiɗigi ta ta maɗiiya, maɗii ni ndaɗ ka ki wa ni asi mbee gaw may, ɗowba ndaɗ buu dew may basa dew may ka ki wa ni asi mbee gaw.

²² Hu li ma ɗugulla ka kay Ziŋ Lonara tini tuna, buuna mba' ɗowba til kala basara ni asi ka jok usiɗi may. Lini ndaɗ ka ki wa gawi ni asi mbee gaw may.

²³ Asi cuk hu lina ni u dira vi Yawera, asi mbee ni u dira vi Yawera lay. Asi li sunda sun Yawera ni u haɗta Yawe ka haɗasira ay fun Moizza na ɗegee may.