NDUMBA 8 - Boy Lonana

Pindilla kalafi hu Mbutluɓ ma Tokkana

¹ Yawe di Moiz ana,

² «Aŋ tuɗ di Aaron ana, Aŋ a tin pindilla kiɗisiyara ni tiniɗ iriɗ fok na a ndaɗ wi ki kalafi jivi hu Mbutluɓ ma Tokkana.»

³ Aaron hin li ni na may. Nam tin pindilla ki halaŋ ko Bu Suuna di ay maŋ Moizza na may.

⁴ Gola va ma tin pindilla kamma mini ni ko wanda na. Yoorommi u lorra col ha kaŋga eg sem ma tini gaana ta ta kolo, lammi u lor mayra dlaɗ ki dlira. Ni ko yal ma Yawe takam ay maŋ Moizna na may.

Lira njaf suu vi Levina li tasi ki teteɗta

⁵ Yawe di Moiz ana,

⁶ «Yow suu hu njaf Levina ki duk suu Israelna halaŋ, lasi ki teteɗ.

⁷ Gola aŋ a mbuɗusi ki teteɗta ni ko wanda na, yamasi yo ma ɓivun ma bulum cora kina kasiya. Asi wel tlimiɗta egesira ki halaŋ, mbus barawi masisina ki halaŋ halaŋ, asi li tasi ki teteɗ.

⁸ Asi vi bolo mbutlna dew u tlesuu ɓivunna um halaŋ, fuɗ mayra yarasi u mbulnara, aŋ hin vi bolo mbutl ma mbana irim may, a li ɓivun ma bulum cora kina.

⁹ Aŋ ɦuɗ njaf suu vi Levina halaŋ ay fun Mbutluɓ ma Tokkana. Aŋ hin tok suu Israelna ay ga halaŋ may.

¹⁰ Aŋ ɦuɗ suu vi Levina ay fok Yawe, suu Israelna tin kosi kasi may.

¹¹ Ŋgoo dagan Aaron tak suu vi Levina maŋ Yawe ko ɓivun ma suu Israelna ɦam maŋ Yawena na. Asi hinni suu li tokka fok Yawena.

¹² Suu vi Levina tin kosi kay yam bolo mbutliina, ɦal mbutlii asina maŋ Yawe, maa dew a li ɓivun ma bulum cora kina, ma hiŋŋa a li ɓivun ma ŋgalam kina may. Ni a li ɓivunna ki kay njaf suu vi Levinara.

¹³ Aŋ col suu vi Levina halaŋ fok Aaron u goryomu. Aŋ takasi ko ndal puura laɗ maŋ Yawena na.

¹⁴ Duk suu Israelna halaŋŋi aŋ hin suu vi Levina ki kay tasiya, asi ki ni suu mansina.

¹⁵ Ŋgoo dagan suu vi Levina hin li sunda hu Mbutluɓ ma Tokkana, aŋ mbususi ki teteɗ, takasi fok Yawe ko puura laɗ ki mamba na.

¹⁶ Kay ɦansina ki ni manu, duk suu Israelna asi ki ni suu mansina. An yowosi ki ni kay balam gor suu vuɗ fok jew suu vi suu Israelnana halaŋ.

¹⁷ Kay gor suu vuɗ fok jew vi suu Israelna halaŋŋi mansina, gor suu warna u gor yoorina halaŋ. Hu li ma an ci gor suu vuɗ jew suu Egiptena kina ni, an ɗokosi ni manu.

¹⁸ Na may an tli njaf suu vi Levina ni kay balam gor suu vuɗ fok jew suu vi suu Israelnana halaŋ.

¹⁹ An ɦasi maŋ Aaron u goryomu, duk suu Israelna halaŋ suu vi Levina ki ni a li tokka fokosi hu Mbutluɓ ma Tokkana, a lasi ɓivun ma mbususi coosira kina may, kay ndaɗta suu Israelna ka ɦuɗ tasi ha eg li ma teteɗna a miɗ tasi ki oloɗi.»

²⁰ Moiz hin li ni ko ndaɗta na, Aaron u suu Israelna halaŋ hin gol suu vi Levina ki ni vay dasi na. Suu Israelna li u njaf suu vi Levina ni ko dlara Yawe daɗ ay maŋ Moizza na may.

²¹ Suu vi Levina mbus tasi ki teteɗ, mbus barawi masisina ki may. Aaron takasi maŋ Yawe ko puura lambara na, lasi ɓivun ma mbus cora kasi a mbuɗusi ki teteɗta.

²² Ŋgoo dagan suu vi Levina tuɗ tli sun masira fok gi Aaron u goryom hu Mbutluɓ ma Tokkana. Asi li u njaf suu vi Levina ni ko Yawe di ay maŋ Moizza na may.

Buu ma suu vi Levina li sunda huna

²³ Yawe di Moiz ana,

²⁴ «Gola njaf suu vi Levina a gijaŋ li sunda ni ko wandara na. Sa ma Levina a gijaŋ li sunda hu Mbutluɓ ma Tokkana ni hu li ma basaɗam tew dok-mba' yam vadlna.

²⁵ Hu li ma basaɗam tew ki wa dok-vadli ni nam hin sunda laɗ hu Mbutluɓ ma Tokkana may, ka tuɗ li sun kalafi oloɗi.

²⁶ Nam ndak kak eg gorsemma hu Mbutluɓ ma Tokkana may ka li sunda nek coco oloɗi. Gola ni gaɗta aŋ tlaɗ kay sunda suu vi Levina laɗ hu Mbutluɓ ma Tokkana.»