Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

NDUMBA 36 - Boy Lonana


Gaɗta kay gorɓii suu yow jona hin ɗum njufna kina

1 Suu ŋgolo suu fok suu hu njaf Galaad ma goŋ Makirna, goŋ Manasena, ni duk suu may suu hu njaf Josefna, mbay fok Moiz u suu ŋgolo suu fok suu Israelna di boyna ana,

2 «Yawe di ka maŋ sa ŋgol manna ana ɓorow mbassa ki maŋ suu Israelna ɓorowoɗ ni u paɗta paɗ dewnara. Sa ŋgol manna fi voɗta ay ko Yawe ana, jo wayamina Selofad ɦam ni maŋ goryom suu tamagina.

3 Doli lini asi ɗum sa ma ki hu deera daŋga wa ni, joosina hin mbuɗ ki ni vi sa ma daŋŋa ka vi somoyomira oloɗi, hin li ki ni maŋ suu asi ha ki ɗumi usina, ka ni duk ndum mamira oloɗi.

4 Hu li ma basara hoŋ mbassa vi tayra ta luu ma vi suu Israelna mba wa ni, joosina hin cuk ha kini kay ma vi suu asi tuɗ ha ki usi wannana, ka li hu jo ma vi somoyomina oloɗi.»

5 Moiz u dlara Yawe dambara nam haɗ suu Israelna ana, «Gor ŋgologi suu vi Josefna boy masina ni u voɗomu.

6 Gola ni gaɗta Yawe daɗ ay kay boy ma vi gorɓii suu vi Selofadna. Asi ndak a ɗummi sa ma hursi vamma, na may sa namma mba li ni hu njaf ma vi busina.

7 Kay ana duk suu Israelna ni jo ma ay hu njaf suu hiŋŋa ka jok ki hu deera daŋgi, suu Israelna gegelay ni hin kaki ni hu joom ma hu njafamma hu deera vi somoyosira.

8 Go tama mayra yow jo buɗta hin ɗum njufna ni hu njaf ma vi buɗna may. Ni suu Israelna gegelay ni hin fi jo ma vi somoyomma.

9 Jo ma ay vi suu wannana ka jok ki hu deera daŋgi. Suu Israelna gegelay ni kakŋi hu jo ma vi somoyomma.»

10 Gorɓii suu vi Selofadna li ni ko Yawe di ay maŋ Moizza na may.

11 Mala, Tirsa, Hogla, Milka u Nowa, gorɓii suu vi Selofadna lakŋi u goryoŋ buyusi mbanana.

12 Asi ɗummi suu hu njaf ma vi Manase ma goŋ Josefna. Joosina hinni hu deera vi busira gak gak.

13 Gola ni nera u gaɗta Yawe daɗ ay fun Moiz maŋ suu Israelnara, ay ŋgoo bagi hu fulla Moabpa, fun lum ma Yurdanna vok tam u zi ma Yerikona.

Bible Moussey © Bible Society of Chad, 2002.

Bible Society of Chad
ကြှနျုပျတို့နောကျလိုကျပါ:



ကြော်ငြာတွေ