NDUMBA 24 - Boy Lonana

¹ Balaam wi ki ana Yawe minni ana nam paɗ vunum ki kay suu Israelna ni paɗiya ni, nam tuɗ ka ki keŋ ko nam li ay fok jewra na a hal tlara fokka oloɗi. Nam pereɗ irim ha ŋgoo bagi na.

² Tli irim kolo na ni wi suu Israelna cuki ni u deeresiya deeresiya, Musuk Lonara mbay kay Balaam.

³ Nam gijaŋ ɓak u ndal boyna ana, «Gola ni boy ma vi Balaam ma goŋ Beorna, boyna vi sa ma irim wi ha ki cocona.

⁴ Ni boyna vi sa ma ka hum boy ma vi Lonna. Ma wi boy ma sa ma saɓakŋa ka takammana. Hu li ma nam buuri gana liŋirira, irim mal kiyo.

⁵ Mbutluɓ maŋŋa jivi cocoo, Yakob. Suu Israelna liigi ma buuna jivi ɦay.

⁶ Ziigi viira fun tam ko ndal mbo lumma ɓaɗta na. Ni ko ndal ŋgusugi suu zaari hu sene ma doŋ lummana na. Ni ko ndal gu ma Yawe u tamba pam doŋ lummana na. Ko gu ma yam ana sedre ma pii doŋ lummana na.

⁷ Ni ko mbo ma ɓaɗ ay ki hu zulum tuɗ u tlesuu zaarina na. Mulla vi suu Israelna ni sura vi Agag, mulla Israella tuɗ ha ni fok na ɗow ɗow.

⁸ Lona cukusi ay ki duk suu Egiptena. Saɓak masina ni ko vunda na. Asi ci njaf suu duu u asina kiyo, kususi sokosi ki lay, mbuuru masira vasi halaŋ halaŋ.

⁹ Asi lak ay gaa, buurira ni ko ndal dlona na, sa ma ndak a colom ki kolona ni gege? Paɗvunna ka kay sa ma paɗ vunum ki kagina, gi vunna maŋ sa ma gagi vunnana may.»

¹⁰ Balak hurum ɓalak ki eg Balaam cocoo, nam ko kom di ana, «An yaŋ ay ni ana aŋ gan vunna maŋ suu babali mansina, aŋ hin paɗ vunuŋ ki kasi yaŋ ca ni na hindi day.

¹¹ Di ni na ni aŋ tuɗ vooŋga, an di gin ana an min a ŋgaaŋ cocoo, may cemi ni Yawe dooroŋ ŋga ndaɗta ki kaŋ wa.»

Balaam ɓak kay tlara jivira hin li eg suu Israelnara

¹² Balaam hoŋom dira ana, «An di ay ki ka jew maŋ suu aŋ sunusi ha kannaɗi su?

¹³ Lini Balak a ɦan gursu mamma u lorra hu ziimba ki halaŋ lay ni an ka jak gaɗta vi Yawera kiɗi. Lini nam dan a mbaa ni jivira ɗowba cora, ni an ka di va maa kay tanɗi. Va ma Yawe danna ayna an hin dammi nam mayɗi su?

¹⁴ Jiviya cemi ni an tuɗ wa vi suu mansina, may ni mbay an daŋ dlara suu asina hin laŋga eg suu maŋsinara ka kiyo.»

¹⁵ Nam hin di dlara joɓba di ana, «Gola ni boy ma Balaam ma goŋ Beorna damma, boy ma sa ma wi ha ki fokom dayna damma.

¹⁶ Ni boy ma vi sa ma ka hum boy ma vi Lonna. Ni sa ma ka wi dlara vi ma ka Kolo Dayna. Ma ka wi tlesuu ma Saɓakŋa Kom Belna ka takam sinana, hu li ma nam buu gaa liŋirira wa ni irim mal kiyo.

¹⁷ An wiya, na may ni ka kay cecemira tuɗi. An saarasiya na may asi ka egen tokgi. Ay vi Yakob ciw velna day ki kolo wa. Vi Israel tokolora mulla tli ki kolo wa. Ndaɗ bulum lina vi Moab kiyo, hin ci goryoŋ Setna kiyo.

¹⁸ Edom hinni mbassa ki tlira. Suu babali mam suu hu Seirna hin tlasi ki lay. Israel hin tak saɓak mamma kiyo.

¹⁹ Njaf Yakob hin ti mulla, nam hin ba u tlesuu hin hu ɦoŋzinna ki halaŋ.»

Balaam ɓak kay suu babali suu vi suu Israelna

²⁰ Balaam hin wi suu Amalekŋa nam gijaŋ di dlara joɓpa kasi ana, «Amalekŋi a goo ŋgolna fok njaf suuna halaŋ, may dlara hin mbay fok kamba ni ɓalakka.»

²¹ Nam hin wi suu Kenna di dlara joɓpa kasi ana, «Liiŋ ma buuna minni saɓak cocoo, ziiŋ minni ni kolo kay gogoyra.

²² Doli ɗi ni Kain hin ki ni a usu ma ŋgal kura, suu Asirina hin yowoŋ suu maŋsina ki daŋgayna.»

²³ A daɓ daganda, nam hin di boy ma joɓpa ana, «Hahawra ŋgolla, sa ma hin kak iiri hu li ma Lona li sun mambana ni gege?

²⁴ Lum kawina yow ay hu Kitim. Asi hin mba las suu hu Asirina, las suu hu Eberna lay, asina hin ba ki ni a fafaɗta.»

²⁵ Balaam gi tam hoŋ vo hu mbas mamba. Balak hin gi tam tuɗ may.