NDUMBA 21 - Boy Lonana

Suu Israelna su kay suu Kanaanna

¹ Mul ma vi suu Kanaanna hu Arad ɦoŋzi ma hu mbassa Negebpa, hum ana suu Israelna cuk ay ka hu voɗta Atarimba na, asi mba duu u suu Israelna, yow suu daŋŋa ka daŋgayna lay.

² Suu Israelna yi tlena ki kasi fok Yawe di ana, «Lini aŋ a hinimi suu asina hu duk komiya ni tlesuu hu ɦoŋzi namma halaŋ ami ɦaŋsina ki ni maŋu.»

³ Yawe hum vun suu Israelna may, nam hinisi suu Kanaanna hu duk kosiya. Suu Israelna toosi ɦoŋziisina ki ga halaŋ u tasira suu warna lay. Asi tin sem li namma ana Horma.

Guy kawi ma tlawna

⁴ Suu Israelna yow ha u ɦinira Horrara, asi gun voɗta ki fun Lum ma Cerewna na, kay a hin zi ma Edomma kira, hu voɗta ni suuna mbuɗ ki ndaana, saɓakasi ka oloɗi.

⁵ Suuna gijaŋ gurni eg Lona u Moiz ana, «Agi cukumi ay ki hu mbassa Egiptera ni kay mege? Ni a ami ba ki ŋgoo bagi tanira ɦawaa, kay ŋgoo tani fu kaɗi lay, yo kaɗi lay, fu ma ami tam tew tew wanna bisimi wa lay.»

⁶ Yawe cuk guyugi suu cona ay duk suu Israelna. Asi eɗesi, casi cocoo. Suu Israelna miɗ ki bolow cocoo.

⁷ Suu Israelna mbay eg Moiz dam ana, «Ami li coo, hu li ma ami gurni eg Yawe may, gurni egeŋ mayna. Aŋ cen Yawe nam ɦuɗumi guyugina ha ki egemiya.» Moiz cen kay suuna.

⁸ Yawe dam ana, «Aŋ yoo guy kawi ma tlawna, ɓalam ki kolo fun guna, sa ma guyna eɗem ayna hin mba gol irim kolo um wa ni, nam hin suɗ kiyo.»

⁹ Moiz yoo guy kawina gaɓam ki kolo fun guna. Hu li ma guy eɗ sa ay wa ni, sa namma gol guy kawi ma gaɓi kolona na ni suɗ ki ni na gaw.

Asi tuɗ ta ta tew u ɦinira Pisgara

¹⁰ Suu Israelna tuɗ ta ta mba vi ziisi ki hu Obot.

¹¹ Asi yow ha hu Obot tuɗ cuk hu Ye-Abarim, ni ŋgoo bagi hu fulla ii u maɗiina vi mbassa Moabpa na.

¹² Asi yow ay hu li namma yow ni mba cuk fun mbo ma Zeredna.

¹³ Asi yow ay hu li namma, mba cuk ki keŋ mbo lum ma Arnonna ni ii hakara u mbassa Moabpa, ni duk ɦoŋ Moab u suu Amorna, mbo lum namma ɓaɗ ŋgoo bagi hu fulla hu mbassa Amorra.

¹⁴ Kay ndaɗta di hu magaara duuna vi Yawe ana, «Zi ma Wahebma ni tok fun mbo lum ma Sufana u ma Arnonna.

¹⁵ Mbo namma fiyekem ɓaɗ ha hu zi ma Arna na, ni ii hakara u mbassa Moabpa.»

¹⁶ Ay hu li namma asi tuɗ ta ta Beer hu li ma yam ana goloŋgana. Hu Beer ndaɗta Yawe di Moiz ana, «Tok suuna ay tani an hin ɦasi mbona.»

¹⁷ Hu li namma ni suu Israelna gi soolla ana, Ndak goloŋga law yona aya Ami cami u soolla.

¹⁸ Ni goloŋga suu ŋgolona gaɗ asira U tokolora vi mulinara, U tokolo masira. Ha ŋgoo bagiya asi tuɗ hu Matana.

¹⁹ Ha hu Matan asi tuɗ Nahaliyel hu Bamot.

²⁰ Hu Bamot ni asi tuɗ hu ɦuɗugumba tuɗ fun sene ma vi suu Moabma nara. Ҥinira Pisgara yaɗ wi ay ki kolo fiyekka hu li namma dew ni ndaɗu.

²¹ Suu Israelna cuk suuna ha eg Sihon mul ma Amorna dam ana,

²² «Hinimi ami jak hu mbas maŋga, ami ka cuk duk senenaɗi lay, ka tuɗ duk gugutlu maŋŋaɗi lay, ami ka ci mbo goloŋgaɗi lay. Ami tuɗumi ni hu voɗta ŋgolla na ɗegee a calaɗ ki hu mbas maŋgara.»

²³ May Sihon ka min a suu Israelna jak hu mbas mambaɗi. Nam tok suu mamsina ay halaŋ cuk ay ki a ŋgaf suu Israelna ŋgoo bagi hu fulla. Nam mbay hu Yahas mba gijaŋ duuna u suu Israelna.

²⁴ Suu Israelna cam suu mamsina u ŋgewina cocoo, tlam mbas mamba ki may, col ha Arnon day ta ta Yabok tuɗ tew ay ki ii hakara u suu Amonna, kay ii haka masira ki saɓak cocoo.

²⁵ Suu Israelna tli ɦoŋzi ma ŋgolo ma Amorna ki halaŋ halaŋ. Asi cuk ziisi ki hu ɦoŋzi ma vi suu Amorna halaŋ, hu Hesebon u zi ma ay njuni usina halaŋ.

²⁶ Kay Hesebonni ɦoŋzi ma vi Sihon mul ma Amorna, ni sa ma li duuna jew u mul ma Moabma, tlam mbas mamba ki halaŋ ta ta Arnon.

²⁷ Kay ndaɗta suu gi soolla gaɗ ana, «Mbaagi ay hu Hesebon ko suuna min zi ndaɗta olo ɦoŋzi ma vi mulna Sihonna, minim ki koloo, lam ki saɓak coco olo.

²⁸ Ay jewra sin kura kal ay ki hu Hesebon, sin kura col ay ni hu mulla vi Sihonda, ŋgal ɦoŋzi ŋgol ma Arna ma ka hu Moabma ki u suu ŋgolona suu kolo kay ɦinira Arnonda ki lay.

²⁹ Hahawra kagiya agi suu Moabma, agi ba ki wa, agi suu goɓ Kemosna, lo ma ɦawana. Goryogi suu njufiina yow liŋa wa, suu tamagina vasi ki balna wa lay, mul ma Amorna, Sihon lay.

³⁰ Ami munusi u mburura asi njay liŋŋa ay Hesebon ta ta Dibon. Asi halaŋ ba ki wa. Ami tli mbassa ki halaŋ ha Nofa ta ta Medeba».

³¹ Suu Israelna cuk ziisi hu mbassa vi suu Amorna.

³² Moiz cuk suu cekeɗta a asi tuɗ gol ɦoŋzi ma vi Yazerna. Ŋgoo dagan suu Israelna tli ɦoŋzi ma ŋgolna u ma gorina ki halaŋ. Asi dik suu Amorna ki kay mbas masira halaŋ.

³³ Asi mbuɗ irisi tli voɗta tuɗ hu mbassa Basanda. Og, mul ma Basanna cuk ay ki u suu mamsina a duu u asira. Nam mba duu ki u asi ni hu mbassa Edreira.

³⁴ Yawe di Moiz ana, «Lam ndaarambi, an hinimma koŋ u suu mamsina halaŋ u mbas mamba halaŋ lay, aŋ hin lasi ni ko aŋ li Sihon mul ma Amorna ay hu Hesebon wanda na may.»

³⁵ Suu Israelna ci Og ki u goryom halaŋ u suu mamsina halaŋ. Sa ma suɗ ka ki na dewɗi. Tlasi mbas masira ki halaŋ halaŋ.